ວັນທີ 4 ຕຸລາ 2022 ນີ້, ຢູ່ທີ່ສະໂມສອນກົມຊ່າງແສງ ກົມໃຫຍ່ເສນາທິການກອງທັບທີມນັກກິລາເຫຼົ່າຮົບຊ່າງແສງ ໄດ້ສະຫຼຸບຖອດຖອນບົດຮຽນໃນການທີ່ເຂົ້າຮ່ວມແຂ່ງຂັນກິລາການທະຫານນາໆຊາດທີ່ ສ ຣັດເຊຍ, ໂດຍການເປັນປະທານຂອງ ສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ, ມີ ສະຫາຍ ພົນຈັດຕະວາ ວຽງໄຊ ໄຊສະໝອນ ຫົວໜ້າກົມຊ່າງແສງ, ບັນດາຄະນະຊີ້ນຳ ແລະ ນັກກິລາເຂົ້າຮ່ວມ.
ສະຫາຍ ພັນເອກ ບຸນທະວີ ໂພໄຊ ຮອງຫົວໜ້າກົມຊ່າງແສງ, ຫົວໜ້າຄະນະຊີ້ນຳນັກກິລາກອງທັບປະຊາຊົນລາວ ໄດ້ກ່າວວ່າ: ການຈັດຕັ້ງການແຂ່ງຂັນກິລາການທະຫານສາກົນ ແມ່ນກິລາທາງດ້ານການທະຫານປະຈຳປີ ຂອງກະຊວງປອ້ງກັນປະເທດ ສ ຣັດເຊຍ ເປັນເຫດການທີ່ໄດ້ຈັດຂື້ນຄັ້ງທຳອິດໃນ ປີ 2015 ເຊີ່ງມີ 17 ປະເທດເຂົ້າຮ່ວມ ແລະ ມີ 6 ປະເທດເຂົ້າຮ່ວມສັງເກດການ. ການແຂ່ງຂັນກິລາການທະຫານສາກົນນີ້ແມ່ນເພື່ອສະແດງໃຫ້ເຫັນເຖິງຄວາມເຂັ້ມແຂງ, ຄວາມສາມາດໃນການນຳໃຊ້ພາຫະນະ, ອາວຸດຂອງກອງທັບແຕ່ລະປະເທດ.
ນອກຈາກການແຂ່ງຂັນກິລາການທະຫານສາກົນແລ້ວ ຍັງມີການຈັດວາງສະແດງບັນດາພາຫະນະອາວຸດຍຸດທະພັນລຸ້ນເກົ່າແກ່ແຕ່ສະໄໝສົງຄາມ ແລະ ພາຫະນະ-ອາວຸດ ທີ່ທັນສະໄໝ ຂອງກອງທັບສະຫະພັນຣັດເຊຍ. ສະເພາະການແຂ່ງຂັນກິລາການທະຫານຂອງເຫຼົ່າຮົບຊ່າງແສງນັ້ນ ປະກອບມີ 3 ປະເພດ ຄື: ຂ້າມຜ່ານແມ່ນຳ້, ເສັ້ນທາງທີ່ປອດໄພ ແລະ ຮູບແບບເຕັກນິກຊ່າງແສງ ເຊິ່ງມີການນຳໃຊ້ພາຫະນະກົນຈັກຂອງເຫຼົ່າຮົບຊ່າງແສງທີ່ຮັບປະກັນໃຫ້ແກ່ການສູ້ຮົບໂດຍການເປັນເຈົ້າພາບຂອງກອງທັບສະຫະພັນຣັດເຊຍ ແລະ ເປັນສ່ວນໜຶ່ງ ຂອງການແຂ່ງຂັນກິລາປະຈຳປີ ຂອງກອງທັບນາໆຊາດ. ການແຂ່ງຂັນກິລາການທະຫານຊ່າງແສງ ນີ້ມັນໄດ້ເນັ້ນໜັກເຖິງຄວາມຊຳນິຊຳນານ ໃນການນຳໃຊ້ບັນດາພາຫະນະ-ອາວຸດຊ່າງແສງ ເພື່ອຮັບປະກັນໃຫ້ແກ່ການສູ້ຮົບປະສານເຫຼົ່າລວມທັງສະແດງເຖິງຄວາມແຂງແຮງ, ຄວາມວ່ອງໄວ, ຄວາມອາດສາມາດໃນການຜ່ານບັນດາສິ່ງກີດຂວາງຕ່າງໆ. ສຳລັບກອງທັບປະຊາຊົນລາວ ເວົ້າລວມ, ເວົ້າສະເພາະເຫຼົ່າຮົບຊ່າງແສງພວກເຮົາ ຖືກເຊີນເຂົ້າຮ່ວມສັງເກດການໃນ ປີ 2018 ເປັນຕົ້ນມາ ແລະ ໃນປີ 2019 ເປັນຄັ້ງທຳອິດທີ່ກອງທັບປະຊາຊົນລາວໄດ້ສົ່ງທີມເຫຼົ່າຮົບຊ່າງແສງເຂົ້າຮວ່ມແຂ່ງຂັນກິລາປະເພດຮູບແບບ ເຕັກນິກ ຊ່າງແສງ ເຊິ່ງມີຈຳນວນພົນທັງໝົດເຂົ້າຮ່ວມ 21 ສະຫາຍ.
ໃນປີ 2022 ນີ້ແມ່ນຄັ້ງທີ 4 ທີ່ກອງທັບປະຊາຊົນລາວໄດ້ສົ່ງທີມນັກກິລາເຫຼົ່າຮົບຊ່າງແສງເຂົ້າຮວ່ມການແຂ່ງຂັນ, ມີ 6 ປະເທດເຂົ້າຮ່ວມ ແລະ ສາມາດຍາດໄດ້ອັນດັບທີ 3. ໃນຜົນງານຜ່ານມາທີມເຫຼົ່າຮົບຊ່າງແສງກອງທັບປະຊາຊົນລາວເຮົາກໍ່ສາມາດຍາດໄດ້ຜົນງານດີພໍສົມຄວນ ຖ້າທຽບໃສ່ບັນດາປະເທດທີ່ມີຄວາມພ້ອມໃນດ້ານຕ່າງໆ ເຊັ່ນ: ມີສະໜາມຫັດແອບ ແລະ ມີບັນ ດາພາຫະນະອຸປະກອນຄົບຖ້ວນ. ກອງປະຊຸມໄດ້ສະຫຼຸບຖອນຖອດບົດຮຽນຕໍ່ກັບຜົນງານ ແລະ ຈຸດຄົງຄ້າງທີ່ຈະຕ້ອງໄດ້ປັບປຸງໃຫ້ມີຄຸນນະພາບກວ່າເກົ່າ. ໂອກາດນີ້, ສະຫາຍ ຮອງຫົວໜ້າກົມໃຫຍ່ເສນາທິການກອງທັບ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຊີ້ນຳ ແລະ ນັກກິລາ ທີ່ໄດ້ຕັ້ງໜ້າເອົາໃຈໃສ່ໃນການເຂົ້າຮ່ວມແຂ່ງຂັນ ແລະ ເປັນຜົນງານອັນສຳຄັນຂອງກອງທັບເຮົາ, ພ້ອມທັງເນັ້ນໜັກໃຫ້ຍົກສູງພາລະບົດບາດການຮ່ວມມື ເປັນມິດທີ່ດີລະຫວ່າງເຫຼົ່າຮົບຊ່າງແສງຂອງກອງທັບປະຊາຊົນລາວ ກັບບັນດາເຫຼົ່າຮົບຊ່າງແສງປະເທດເພື່ອນມິດ ທີ່ເຂົ້າຮ່ວມແຂ່ງຂັນ, ກຳໄດ້ບັນດາເນື້ອໃນ, ລຳດັບບາດກ້າວໃນການນຳໃຊ້ພາຫະນະ, ອາວຸດທີ່ທັນສະໄໝເພື່ອເອົາມາໝູນໃຊ້ເຂົ້າໃນວຽກງານອົບຮົມຫັດແອບໃນກົມກອງມີຄວາມກ້າວໜ້າ ແລະ ທັນສະໄໝ.
