ພັກ, ລັດຖະບານ ຍາມໃດກໍໃຫ້ຄວາມສຳຄັນ ແລະ ເອົາໃຈໃສ່ສົ່ງເສີມວຽກງານການສຶກສາ ແລະ ຖືເອົາຄູສອນເປັນກົກ ໃນການຍົກສູງຄຸນນະພາບຂອງການສຶກສາ ກໍຄື ການພັດທະນາ ແລະ ສົ່ງເສີມວຽກງານການສິດສອນ ໂດຍສະເພາະ ການເພີ່ມທັກສະຄວາມຮູ້ໃຫ້ແກ່ຄູ ເຊັ່ນ: ຝຶກອົບຮົມໃນຫົວຂໍ້ຕ່າງໆ, ທັງເອົາໃຈໃສ່ຕິດຕາມກວດກາ ສະພາບການຮຽນ-ການສອນຂອງຄູເປັນປະຈຳ ເຊິ່ງຄູໄດ້ມີບົດບາດສໍາຄັນໃນການສ້າງອະນາຄົດໃຫ້ຄົນແຕ່ລະຮຸ່ນ ໃນພາລະກິດສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ ຈົນຖືກສັງຄົມຂະໜານນາມວ່າຄູແມ່ນແມ່ພິມຂອງຊາດ.
ເນື່ອງໃນໂອກາດວັນຄູແຫ່ງຊາດ 7 ຕຸລາ 2022 ຄົບຮອບ 28 ປີ, ທ່ານ ສຸກພະໄຊ ວໍລະບຸດ ຜູ້ອຳນວຍການໂຮງຮຽນ ມັດທະຍົມສຶກສາສົມບູນດອນໜູນ ໄດ້ໃຫ້ສຳພາດຕໍ່ກັບນັກຂ່າວສຳນັກຂ່າວ ສານປະເທດລາວ ວ່າ: 20 ກວ່າປີແຫ່ງຄວາມພາກພູມໃຈ ທີ່ໄດ້ປະກອບສ່ວນເຂົ້າໃນການພັດທະນາຊັບພະຍາກອນມະນຸດ ກໍຄື ໜໍ່ແໜງຂອງຊາດ ຕົນເອງໄດ້ສຸມທຸກສະຕິປັນຍາ ເຂົ້າໃນການສິດສອນ ເພື່ອເຮັດໃຫ້ນັກຮຽນເປັນນັກຮຽນດີ-ຮຽນເກັ່ງ, ມີຄວາມຮູ້-ຄວາມສາມາດ ກາຍເປັນຄົນດີຂອງສັງຄົມ. ຄູ ບໍ່ພຽງແຕ່ມີບົດບາດສິດສອນສົ່ງຄວາມຮູ້ໃຫ້ນັກຮຽນເທົ່ານັ້ນ ແຕ່ຄູຍັງເປັນແບບຢ່າງທີດີໃນການດຳລົງຊີວິດ, ການປະຕິບັດໜ້າທີ່ວຽກງານ ແລະ ການປະຕິບັດກົດລະບຽບຕ່າງຂອງໂຮງຮຽນ, ລວມທັງກົດໝາຍຕ່າງໆຂອງລັດ; ທັງນີ້, ເພື່ອເປັນຕົວແບບທີ່ດີໃຫ້ກັບບັນດານັກຮຽນ ໄດ້ເອົາເປັນແບບ ຢ່າງ.
ນອກນີ້ ຄູ ຍັງໃຫ້ຄວາມສະໜິດຕິດແທດກັບບັນດານັກຮຽນ ເຊິ່ງມີນັກຮຽນຈຳນວນໜຶ່ງ ໄດ້ມາຂໍຄຳປຶກສາຈາກຄູ-ອາຈານ ເຊັ່ນ: ເລື່ອງການຮຽນ, ເລື່ອງໝູ່ ລວມໄປເຖິງກິດຈະກຳຕ່າງໆຂອງໂຮງ ຮຽນ. ເຖິງຢ່າງໃດກໍຕາມ ໂຮງຮຽນມັດທະຍົມສຶກສາສົມບູນດອນໜູນ ກໍຍັງມີສິ່ງທ້າທ້າຍ ແລະ ຂໍ້ ຫຍຸງຍາກຫລາຍດ້ານ ທີ່ຕ້ອງໄດ້ຮັບການແກ້ໄຂ ເປັນຕົ້ນແມ່ນ ບັນຫາຄູເຫລືອບໍ່ພໍ, ນັກຮຽນຫລາຍ, ຫ້ອງຮຽນຍັງບໍ່ພຽງພໍ ທັງມີຄວາມແອອັດ ເຮັດໃຫ້ນັກຮຽນຈຳນວນໜຶ່ງບໍ່ສົນໃຈການຮຽນ.
ທ່ານ ນາງ ຈິກ ສຸກສະຫວາດ ຄູອາສາສະໝັກວິຊາພູມສາດ ຢູ່ໂຮງຮຽນມັດທະຍົມສຶກສາ ສົມບູນດອນໜູນ ໄດ້ກ່າວວ່າ: ຕົນເອງມີຄວາມພູມໃຈທີ່ໄດ້ເປັນຄູ ເຖິງຈະເປັນຄູອາສາກໍຕາມ ຕົນເອງ ກໍບຸກບືນຫ້າວຫັນ ແລະ ປະຕິບັດຕາມລະບຽບລັດຖະກອນຄູ, ເອົາໃຈໃສ່ຕັ້ງໜ້າສິດສອນນັກຮຽນ ໃຫ້ເປັນນັກຮຽນດີ-ຮຽນເກັ່ງ, ມີຄວາມຮູ້-ຄວາມສາມາດ. ທ່ານ ນາງ ຈິກ ສຸກສະຫວາດ ຍັງໄດ້ຝາກເຖິງຄູ-ອາຈານ ອາສາ ທົ່ວປະເທດ ເອົາໃຈໃສ່ພັດທະນາຕົນເອງ ໃຫ້ກ້າວໜ້າຂຶ້ນໄປເລື້ອຍໆ ເພື່ອປະ ຕິບັດຕາມ 3 ຂໍ້ແຂ່ງຂັນ ຕາມ 3 ລັກສະນະ ແລະ 5 ຫລັກມູນ ຂອງກະຊວງສຶກສາວາງອອກ ໃຫ້ເປັນຈິງ.
ຂ່າວ,ພາບ: ກິດຕາ
Medialaos MMD
