ຂ່າວສານຊີອາໄອລາຍງານ ໃນຮອບ 10 ປີທີ່ຜ່ານມານີ້, ຄວາມສາມາດດ້ານການຄຸ້ມຄອງຂອງຂະແໜງການໄປສະນີ ແລະ ສົ່ງດ່ວນຂອງຈີນ ໄດ້ຮັບການຍົກສູງຂຶ້ນຢ່າງຕໍ່ເນື່ອງ. ທ່ານ ໄຕ້ຢີງຈູ່ນ ຮອງຫົວໜ້າກົມໄປສະນີແຫ່ງຊາດຈີນກ່າວວ່າ: ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນໄດ້ຈັດຂຶ້ນເປັນຕົ້ນມາ, ຕາໜ່າງໄປສະນີຂອງຈີນໄດ້ລົງຮາກຖານໄວກວ່າເກົ່າ, ໄດ້ປະກອບສ່ວນສ້າງຕາໜ່າງໄປສະນີ ແລະ ການສົ່ງດ່ວນທີ່ປົກຫຸ້ມທົ່ວປະເທດ, ເຂົ້າເຖິງຊົນນະບົດໄດ້ ແລະ ເຊື່ອມຕໍ່ກັບທົ່ວໂລກໂດຍພື້ນຖານ.
ທ່ານ ໄຕ້ຢີງຈູ່ນ ກ່າວວ່າ: ນັບແຕ່ປີ 2012 ຫາປີ 2021, ລາຍຮັບດ້ານວຽກງານຂະແໜງການໄປສະນີໄດ້ເພີ່ມຂຶ້ນຈາກ 198,09 ຕື້ຢວນ ເປັນ 1264,23 ຕື້ຢວນ ຂະໜາດການເພີ່ມຂຶ້ນສະເລ່ຍຕໍ່ປີມີເຖິງ 22,9%. ປະລິມານກະເປົາສົ່ງດ່ວນຈາກ 5,7 ຕື້ອັນ ເພີ່ມຂຶ້ນເປັນ 108,3 ຕື້ອັນ ໄດ້ຄອງຖານະອັນດັບ 1 ໃນໂລກເປັນເວລາ 8 ປີຕິດຕໍ່ກັນ.
ພ້ອມກັນນັ້ນ, ວິສາຫະກິດການຈໍລະຈອນສິນຄ້າດ່ວນຕ່າງໆກໍໄດ້ເລັ່ງລັດການພັດທະນາວຽກງານຂ້າມຊາດ. ນັບມາຮອດປັດຈຸບັນນີ້, ວຽກງານສົ່ງດ່ວນສາກົນຂອງບໍລິສັດຈີທູ້ ໄດ້ປົກຫຸ້ມຫຼາຍປະເທດ ເຊັ່ນ: ອິນໂດເນເຊຍ, ຫວຽດນາມ, ມະເລເຊຍ, ໄທ, ຟີລິບປີນ ແລະ ປະເທດອື່ນໆ.
