ຂ່າວຕ່າງປະເທດລາຍງານ ເມື່ອວັນທີ 2 ຕຸລາ ທີ່ຜ່ານມານີ້, ກຸ່ມນັກວິໄຈນາໆຊາດ ນຳໂດຍຄະນະນັກວິທະຍາສາດຂອງຈີນ ພົບວ່າ ມະຫາສະໝຸດອາກຕິກມີຄວາມເປັນກົດໄວກວ່າມະຫາສະໝຸດແຫ່ງອື່ນໆຂອງໂລກ ເນື່ອງຈາກການລະລາຍຂອງຖານນ້ຳກ້ອນ.
ໂດຍຜົນການສຶກສາສະບັບດັ່ງກ່າວໄດ້ເຜີຍແຜ່ລົງໃນວາລະສານວິທະຍາສາດລະບຸວ່າ ອັດຕາການເປັນກົດໃນມະຫາສະໝຸດອາກຕິກຝັ່ງຕາເວັນຕົກນັ້ນໄວກວ່າໃນແອ່ງມະຫາສະໝຸດອື່ນໆປະມານ 3-4 ເທົ່າ ໂດຍການເພີ່ມຂຶ້ນຂອງຄາບອນໄດອົກຊາຍຈາກຝີມືມະນຸດສົ່ງຜົນໃຫ້ນ້ຳທະເລມີຄວາມເປັນກົດຫຼາຍຂຶ້ນ ແລະ ແຄວຊຽມຄາບໍເນດອີ່ມໂຕໜ້ອຍລົງ ຊຶ່ງເປັນຂະບວນການທີ່ຮ້ອງວ່າ ປະກົດການທະເລກົດ (Ocean acidification). ທັງນີ້, ທີມວິໄຈນຳໂດຍຄະນະນັກວິໄຈຈາກສະຖາບັນວິໄຈທະເລ ແລະ ຂົ້ວໂລກເໜືອແຫ່ງມະຫາວິທະຍາຈີ໋ເໝີຍ ໄດ້ເຮັດການສັງເຄາະຂໍ້ມູນຄາບໍເນດໃນມະຫາສະໝຸດ ຈາກການລ່ອງເຮືອວິໄຈ 47 ຄັ້ງອ້ອມຮອບມະຫາສະໝຸດອາກຕິກລະຫວ່າງປີ 1994 ເຖິງປີ 2020 ເພື່ອກວດສອບວ່າ ວັດຖະຈັກຄາບອນຂອງມະຫາສະໝຸດອາກຕິກ ຕອບສະໜອງຕໍ່ການປ່ຽນແປງສະພາບພູມອາກາດແນວໃດ. ທີມວິໄຈພົບວ່າພື້ນທີ່ສ່ວນໃຫຍ່ຂອງນ້ຳທະເລທີ່ເຄີຍຖືກປົກຄຸມດ້ວຍນ້ຳກ້ອນນັ້ນໄດ້ສຳຜັດກັບບັນຍາກາດ ຊຶ່ງເປັນຜົນມາຈາກການປ່ຽນແປງສະພາບພູມອາກາດ ແລະ ການຫົດຕົວຂອງນ້ຳກ້ອນທະເລ ໂດຍພາວະດັ່ງກ່າວກະຕຸ້ນການດູດຊຶມຄາບອນໄດອົກຊາຍໃນຊັ້ນບັນຍາກາດຢ່າງວ່ອງໄວ ນຳໄປສູ່ຄວາມເປັນກົດຂອງມະຫາສະໝຸດ ແລະ ຄວາມຈຸໜ່ວຍຄວາມຈຳ (Buffer Capacity) ຂອງມະຫາສະໝຸດຫຼຸດຕ່ຳລົງ.
ນອກຈາກນີ້, ທີມນັກວິໄຈຄາດວ່າ ຄວາມເປັນກົດ-ດ່າງ (pH) ຈະຫຼຸດລົງອີກໃນລະດັບລະຕິຈູດທີ່ສູງຂຶ້ນ ຊຶ່ງເປັນລະດັບທີ່ຍັງຄົງປະເຊີນກັບການຫົດຕົວຂອງນ້ຳກ້ອນທະເລ ພ້ອມທັງກ່າວເນັ້ນເຖິງຄວາມຮີບດ່ວນໃນການຫຼຸດການປ່ອຍຄາບອນເພື່ອຮັກສາລະບົບນິເວດຂອງອາກຕິກ. ທ່ານສາດສະດາຈານ ສີຕີ້ ຈາກມະຫາວິທະຍາໄລຈີ໋ເໝີຍ ແລະ ຜູ້ນຳໃນການຂຽນງານວິໄຈສະບັບນີ້ກ່າວວ່າ ຄວາມເປັນກົດຂອງມະຫາສະໝຸດສາມາດສົ່ງຜົນຮ້າຍແຮງຕໍ່ສິ່ງທີ່ມີຊີວິດໃນທະເລເຊັ່ນ ຫອຍກາບ, ຫອຍແມງຜູ່ ແລະ ຫອຍສັງ ຊຶ່ງເປັນອາຫານຫຼັກສຳລັບປາແຊວມອນ ແລະ ປາເຮີຣິງອາກຕິກ.
