ຈັບສະຫຼາກແບ່ງສາຍເປັນທີ່ຮຽບຮ້ອຍແລ້ວ ການແຂ່ງຂັນກິລາເຕະບານຍິງ-ຊາຍ ທົ່ວປະເທດ ຫຼື ລາຍການແຫ່ງຊາດ ປະຈໍາປີ 2022 ເພື່ອເປັນການສົ່ງເສີມແຕ່ລະແຂວງໃນຂອບເຂດທົ່ວປະເທດ ໄດ້ມີການພັດທະນານັກກິລາຢ່າງຕໍ່ເນື່ອງ ແນໃສ່ສ້າງຮຸ່ນສືບທອດກ້າວສູ່ລະດັບຊາດ ຂະນະທີ່ ແຂວງຈໍາປາສັກ ແຊ໋ມເກົ່າທີມຊາຍ ແລະ ແຂວງຫຼວງພະບາງ ຮອງແຊ໋ມເກົ່າ ຖືກຈັດຢູ່ກຸ່ມດຽວກັນ ຮ່ວມກັບ ແຂວງສະຫວັນນະເຂດ ແລະ ແຂວງຫົວພັນ ໃນກຸ່ມ ຊີ ຈະເລີ່ມດຳເນີນແຂ່ງຂັນໃນທ້າຍເດືອນຕຸລາ 2022 ສ່ວນບານເຕະຍິງ ຈະເປີດສາກລະເບີດຄວາມມັນໃນວັນທີ 8 ຕຸລານີ້. ຂະນະທີ່ ລາຍການນີ້ ແຂວງເຊກອງ ແລະ ແຂວງສາລະວັນ ບໍ່ໄດ້ສົ່ງເຂົ້າຮ່ວມແຂ່ງຂັນ.
ພິທີຈັບສະຫຼາກແບ່ງສາຍການແຂ່ງຂັນກິລາເຕະບານແຫ່ງຊາດ ປະຈໍາປີ 2022 ໄດ້ມີຂຶ້ນ ເມື່ອວັນທີ 23 ກັນຍາ 2022 ທີ່ຫ້ອງປະຊຸມສະຫະພັນບານເຕະແຫ່ງຊາດລາວ (ສຕລ), ໃຫ້ກຽດເຂົ້າຮ່ວມເປັນປະທານ ແລະ ຈັບສະຫຼາກໂດຍ ທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ ແລະ ທ່ານ ຄໍາໄພ ປະເສີດ ຮອງປະທານ ສຕລ ມີບັນດາຄະນະບໍລິຫານງານ ສຕລ, ພະນັກງານວິຊາການທີ່ກ່ຽວຂ້ອງ ຕະຫຼອດຮອດສື່ມວນຊົນຈາກພາກສ່ວນຕ່າງໆເຂົ້າຮ່ວມເປັນສັກຂີພິຍານ.
ຜ່ານການຈັບສະຫຼາກແບ່ງສາຍການແຂ່ງຂັນກິລາເຕະບານຍິງ-ຊາຍ ທົ່ວປະເທດ ຜົນປະກົດວ່າ ສຳລັບປະເພດທີມຍິງ ມີ 8 ແຂວງ ແລະ 1 ນະຄອນຫຼວງວຽງຈັນ ເຂົ້າຮ່ວມແບ່ງເປັນສອງກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເລືອກເອົາທີມທີ່ມີຄະແນນດີທີ່ສຸດ ອັນດັບທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ແລະ ຈະເລີ່ມທຳການແຂ່ງຂັນໃນວັນທີ 8 ຫາ 21 ຕຸລາ 2022 ສະເພາະ ກຸ່ມ ກ ປະກອບມີ ແຂວງຈໍາປາສັກ, ນະຄອນຫຼວງວຽງຈັນ ແຊ໋ມເກົ່າ, ແຂວງຫຼວງພະບາງ, ແຂວງວຽງຈັນ, ແຂວງໄຊຍະບູລີ ສ່ວນກຸ່ມ ຂ ປະກອບມີ ແຂວງສະຫວັນນະເຂດ, ແຂວງບໍລິຄໍາໄຊ, ແຂວງອຸດົມໄຊ ແລະ ແຂວງຊຽງຂວາງ.
ສ່ວນປະເພດທີມຊາຍມີ 15 ແຂວງ ແລະ 1 ນະຄອນຫຼວງວຽງຈັນ ເຂົ້າຮ່ວມແບ່ງເປັນ 4 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເລືອກເອົາທີມທີ່ມີຄະແນນດີທີ່ສຸດ ອັນດັບທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ສະເພາະ ກຸ່ມ ກ ປະກອບມີ ແຂວງຊຽງຂວາງ, ແຂວງບໍ່ແກ້ວ, ແຂວງວຽງຈັນ ແລະ ແຂວງບໍລິຄໍາໄຊ; ກຸ່ມ ຂ ປະກອບມີ ນະຄອນຫຼວງວຽງຈັນ, ແຂວງຫຼວງນໍ້າທາ, ແຂວງເຊກອງ ແລະ ແຂວງຄໍາມ່ວນ; ກຸ່ມ ຄ ປະກອບມີ ແຂວງຈໍາປາສັກ ແຊ໋ມເກົ່າ, ແຂວງສະຫວັນນະເຂດ, ແຂວງຫຼວງພະບາງ ຮອງແຊ໋ມເກົ່າ ແລະ ແຂວງຫົວພັນ; ກຸ່ມ ງ ປະກອບມີ ແຂວງ ອັດຕະປື, ແຂວງໄຊສົມບູນ, ແຂວງອຸດົມໄຊ ແລະ ແຂວງໄຊຍະບູລີ ຊຶ່ງການແຂ່ງຂັນແມ່ນຈະເລີ່ມວັນທີ 31 ຕຸລາ ຫາ 12 ພະຈິກ 2022.
ຂະນະທີ່ ລາງວັນຊະນະເລີດ ທັງທີມຍິງ ແລະ ທີມຊາຍ ຈະໄດ້ຮັບເທົ່າກັບປີທີ່ຜ່ານມາ ໂດຍສະເພາະລາງວັນຊະນະເລີດ ຈະໄດ້ຮັບທີມລະ 100 ລ້ານກີບ, ຂັນແຊ໋ມທີມລະ 1 ໜ່ວຍ ພ້ອມຫຼຽນທີ່ລະນຶກ ແລະ ອັນດັບທີ 2 ຈະໄດ້ຮັບລາງວັນເງິນສົດ 40 ລ້ານກີບ ພ້ອມຫຼຽນທີ່ລະນຶກ ນອກນັ້ນ ກໍຍັງມີລາງວັນຄູຝຶກດີເດັ່ນ, ນັກເຕະດີເດັ່ນ, ຜູ້ຮັກສາປະຕູດີເດັ່ນ ແລະ ດາວຍິງສູງສຸດ.
ໂດຍ ສົງການ ພັນແພງດີ
