ສູນກາງສະຫະພັນແມ່ຍິງລາວ(ສສຍລ) ໄດ້ຈັດກອງປະຊຸມຄະນະກຳມາທິການອາຊຽນ ເພື່ອສົ່ງເສີມ ແລະ ປົກປ້ອງສິດທິຂອງແມ່ຍິງ ແລະ ເດັກນ້ອຍ ຄັ້ງທີ 25 (25th ACWC) ຂຶ້ນໃນວັນທີ 22 ກັນຍາ 2022 ຜ່ານມາ ທີ່ນະຄອນຫຼວງວຽງຈັນ ດ້ວຍລະບົບທາງໄກ ,ພາຍໃຕ້ການເປັນປະທານຂອງ ACWC ປະເທດກຳປູເຈຍ. ຊຶ່ງມີທ່ານ ນາງ ສຸກພາພອນ ຜານິດ ຕາງໜ້າ ACWC ສປປ ລາວ ຮັບຜິດຊອບວຽກງານສິດທິແມ່ຍິງ ແລະ ທ່ານ ນາງ ສຸວັນທອນ ສຸວັນນະຈັກ ຕາງໜ້າ ACWC ສປປ ລາວ ຮັບຜິດຊອບວຽກງານສິດທິເດັກ ແລະ ມີ ຜູ້ຕາງໜ້າ ACWC ຮັບຜິດຊອບສິດທິແມ່ຍິງ ຂອງປະເທດໄທ ແລະ ກອງເລຂາອາຊຽນ ເຂົ້າຮ່ວມ
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຮອງເອົາບົດສະຫຼຸບຂອງ ACWC ຄັ້ງທີ 24, ຮັບຟັງລາຍງານການແຜນປະຕິບັດງານຄະນະກຳມາທິການອາຊຽນ ເພື່ອສົ່ງເສີມ ແລະ ປົກປ້ອງສິດທິຂອງແມ່ຍິງ ແລະ ເດັກນ້ອຍ ປີ 2021-2025 ແລະ ທິດທາງແຜນການໃນຕໍ່ໜ້າ; ການປະຕິບັດແຜນງານພາກພື້ນອາຊຽນກ່ຽວກັບການລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ; ການຮ່ວມມືລະຫວ່າງຂະ ແໜງການ ແລະ ບັນດາເສົາຄໍ້າຂອງບັນດາປະເທດອາຊຽນ; ຂອບຍຸດທະສາດໃນການເຊື່ອມສານບົດບາດຍິງ-ຊາຍ; ຜົນການຈັດຕັ້ງປະຕິບັດແຜນດຳເນີນງານ ການຕ້ານການໃຊ້ແຮງງານເດັກ ແລະ ວຽກງານປິ່ນອ້ອມອື່ນໆອີກ, ເພື່ອພ້ອມກັນຈັດຕັ້ງປະຕິບັດບັນດາແຜນດຳເນີນງານ, ກົນໄກການປະສານງານຕ່າງໆ ໂດຍສະເພາະແມ່ນການຮ່ວມມືກັນໃນແຕ່ລະເສົາຄໍ້າ ຕໍ່ວຽກງານສົ່ງເສີມ ແລະ ປົກປ້ອງສິດທິຂອງແມ່ຍິງ ແລະ ເດັກນ້ອຍ ໃນບັນດາປະເທດສະມາຊິກອາຊຽນໃຫ້ສຳເລັດຜົນຕາມແຜນການທີ່ວາງໄວ້.
ພ້ອມນີ້ບັນດາຜູ້ແທນທີ່ເຂົ້າຮ່ວມກໍໄດ້ພ້ອມກັນແລກປ່ຽນບົດຮຽນ ແລະ ປະກອບຄໍາເຫັນໃສ່ບັນດາເອກະສານຕ່າງໆທີ່ກ່ຽວຂ້ອງ. ແລະ ຍັງໄດ້ຮັບຟັງການນໍາສະເໜີລາຍງານຄວາມຄືບໜ້າ ແລະ ຜົນສໍາເລັດຂອງບັນດາກິດຈະກຳໂຄງການ ພ້ອມທັງການຮ່ວມມືລະຫວ່າງອາຊຽນ ແລະ ບັນດາຄູ່ຮ່ວມພັດທະນາ ເປັນຕົ້ນ ອົງການ USAID, UN WOMEN, AUSTRALIAN MISSION TO ASEAN, Asia Foundation UNFPA, ແລະ UNDP ທີ່ຈະສະໜັບສະໜູນການຈັດຕັ້ງປະຕິບັດແຜນດຳເນີນງານຂອງ ACWC, ການຊ່ວຍເຫຼືອທາງສັງຄົມ, ການສົ່ງເສີມການຮັບຮູ້ທາງກົດໝາຍ ແລະ ຄວາມຊ່ວຍເຫຼືອດ້ານອື່ນໆອີກ. ກອງປະຊຸມໄດ້ເນັ້ນໃຫ້ບັນດາຄະນະ ACWC ປະເທດອາຊຽນ ສຸມຄວາມພະຍາຍາມໃສ່ການສົ່ງເສີມຄວາມກ້າວໜ້າ ແລະ ການປົກປ້ອງແມ່ຍິງ ແລະ ເດັກນ້ອຍ ເພື່ອພ້ອມກັນສ້າງປະຊາຄົມອາຊຽນໃຫ້ເຂັ້ມແຂງກວ່າເກົ່າ, ສືບຕໍ່ເຮັດວຽກຮ່ວມກັນໃນການວາງແຜນບັນດາກິດຈະກຳຕ່າງໆ ແລະ ພ້ອມກັນຈັດຕັ້ງປະຕິບັດແຜນວຽກໃນ 5 ປີຕໍ່ໜ້າໃຫ້ປະກົດຜົນເປັນຈິງ. ຂ່າວ: ຈັນສຸລີ ບົວສະຫັວນ
