ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ວັນທີ 23 ກັນຍາ ຫາ 12 ຕຸລາ 2022 ນີ້, ພະນັກງານໂຄງການເກັບກູ້ລະເບີດແຫ່ງຊາດ 5 ແຂວງ ຄື: ແຂວງສາລະວັນ, ອັດຕະປຶ, ສະຫວັນນະເຂດ, ຄຳມ່ວນ ແລະ ແຂວງຊຽງແຂວງ ຮ່ວມຝຶກອົບຮົມຝຶກອົບຮົມຫລັກສູດ ເປັນນັກເກັບກູ້ລະເບີດ ຂັ້ນພື້ນຖານ ຢູ່ແຂວງສາລະວັນ ໂດຍສຳມະນາກອນຈະໄດ້ຮຽນຮູ້ທັງພາກທິດສະດີຕາມຫລັກສູດ ແລະ ລົງຈັດຕັ້ງປະຕິບັດຕົວຈິງ ຢູ່ພາກສະໜາມ ເພື່ອຖອດຖອນບົດຮຽນ ລະຫວ່າງຕົວຈິງ ກັບພາກທິດສະດີ ຄວບຄູ່ກັນ.
ໂອກາດນີ້, ທ່ານ ເສົາມະນີ ມະນີວົງ ຮັກສາການ ຜູ້ອໍານວຍການໂຄງການເກັບກູ້ລະເບີດແຫ່ງຊາດ ໄດ້ຮຽກຮ້ອງໃນສຳມະນາກອນ ເອົາໃຈໃສ່ຕິດຕາມການສອນ ຢ່າງລະອຽດ, ຕັ້ງໃຈຄົ້ນຄວ້າຮ່ຳຮຽນ, ສົນທະນາ, ແລກປ່ຽນຄວາມຮູ້ຄວາມສາມາດ ເພື່ອເກັບກຳປະສົບການ ແລະ ບົດຮຽນໃນການຈັດຕັ້ງປະຕິບັດໜ້າທີ່ ເພື່ອໃຫ້ຮັບຮູ້, ເຂົ້າໃຈຢ່າງຖີ່ຖ້ວນຕາມຫລັກສູດການສອນ ເພື່ອໃຫ້ຮູ້ເຖິງຂັ້ນຕອນ, ຮູບແບບວິທີການຈັດຕັ້ງປະຕິບັດໃນສະໜາມຕົວຈິງ ເພື່ອສ້າງຕົນເອງໃຫ້ກາຍເປັນນັກເກັບກູ້ ທີ່ມີຄຸນນະພາບ ແນໃສ່ການປະຕິບັດວຽກງານຕົວຈິງ ໃນທ້ອງຖິ່ນຂອງຕົນ.
ບັ້ນຝຶກອົບຮົມດັ່ງກ່າວ ແມ່ນໄດ້ນຳເອົາຫລັກສູດນັກເກັບກູ້ຂັ້ນພື້ນຖານ ມາສິດສອນ ເປັນຕົ້ນ ການປະຖົມພະຍາບານຂັ້ນຕົ້ນ, ການນາບຂູ່ຈາກລູກມິນ, ລູກລະເບີດບໍ່ທັນແຕກ ແລະ ຄວາມອັນຕະລາຍ, ຄວາມປອດໄພສຳລັບວຽກງານເກັບກູ້, ຈາກການທຳລາຍລູກລະເບີດ, ລະບົບການທຳລາຍລູກລະເບີດໃນຮູບແບບຕ່າງໆ, ປັດໄຈການພິສູດ ແລະ ການນຳໃຊ້, ບຳລຸງຮັກສາອຸປະກອນຕ່າງໆທີ່ສຳຄັນ ເຊັ່ນ: ເຄື່ອງກວດ, ຈັກກວດວາລອນ, ເຄື່ອງກວດເລີກ 740 M, ເຄື່ອງກວດຕື້ນ ແລະ ການນໍາໃຊ້ອຸປະກອນຕົວຈິງຢູ່ໃນພາກສະໝາມ, ເກັບກໍາຂໍ້ມູນ ແລະ ບົດຮຽນທີ່ສຳຄັນອື່ນໆ.
ຂ່າວ-ພາບ: ວິໄລວອນ
