ເມື່ອບໍ່ດົນຜ່ານມາ, ຢູ່ທີ່ໂຮງຮຽນມັດທະຍົມສົມບູນບ້ານຂ້ອນ, ບ້ານໄລ່ ແລະ ໂຮງຮຽນມັດທະຍົມສົມບູນນາແມດ ເມືອງແບງ ແຂວງອຸດົມໄຊ ໄດ້ມີການມອບ-ຮັບການກໍ່ສ້າງ ແລະ ສ້ອມແປງສິ່ງອຳນວຍຄວາມສະດວກໃນໂຮງຮຽນແລະໂຮງໝໍນ້ອຍ ຈຳນວນ 15 ບ້ານເປົ້າໝາຍຂອງໂຄງການອີນາຟ. ໂດຍການເຂົ້າຮ່ວມຂອງທ່ານ ບຸນຮຽມ ແກ້ວຄູນທອງ ຫົວໜ້າຄະນະໂຄສະນາອົບຮົມເມືອງ, ທ່ານ ສອນເພັດ ອິນທະປັນຍາສັກ ຮອງເຈົ້າເມືອງ. ມີຂະແໜງການທີ່ກ່ຽວຂ້ອງຂັ້ນເມືອງ, ຜູ້ຕາງໜ້າໂຄງການ, ບໍລິສັດຮັບເໝົາກໍ່ສ້າງ ແລະ ຄະນະອົງການປົກຄອງບ້ານຕະຫຼອດຮອດຄູ-ອາຈານເຂົ້າຮ່ວມ.
ໃນພິທີໄດ້ຮັບຟັງການລາຍງານສະພາບການກໍ່ສ້າງສິ່ງອຳນວຍຄວາມສະດວກເປັນຕົ້ນແມ່ນການກໍ່ສ້າງຂຸມນໍ້າເປື້ອນຊຶມ, ອ່າງເກັບນໍ້າສະເຕນເລດ, ເຕົາເຜົາອຸປະກອນການແພດທີ່ຕິດເຊື້ອ, ເດີນລະບົບທໍ່ນໍ້າ, ກໍ່ສ້າງຫ້ອງນໍ້າ, ບ່ອນລ້າງມື, ກໍ່ສ້າງອ່າງຄາບເລືອດຫ້ອງປະສູດ ແລະ ອື່ນໆ ລວມມູນຄ່າທັງໝົດ 1 ຕື້ກວ່າກີບ, ໂດຍໄດ້ຮັບການສະໜັບສະໜູນ ຈາກໂຄງການອີນາຟ ໃນການກໍ່ສ້າງສິ່ງອຳນວຍຄວາມສະດວກດ້ານສຸຂະອະນາໄມຢູ່ເມືອງແບງມີ 15 ບ້ານ ປະກອບມີ ໂຮງຮຽນອະນຸບານ 3 ແຫ່ງ, ປະຖົມ 15 ແຫ່ງ, ມັດທະຍົມຕົ້ນ 5 ແຫ່ງ, ມັດທະຍົມປາຍ 2 ແຫ່ງ ແລະ ໂຮງໝໍນ້ອຍ 3 ແຫ່ງ. ໂອກາດນີ້ໄດ້ລົງລາຍເຊັນມອບ-ຮັບຢ່າງເປັນທາງການໂດຍມີພາກສ່ວນກ່ຽວຂ້ອງເປັນສັກຂີພິຍານ.
ທ່ານ ບຸນຮຽມ ແກ້ວຄູນທອງ ໄດ້ມີຄຳເຫັນຊີ້ນຳ ແລະ ເນັ້ນໜັກຫຼາຍດ້ານໂດຍສະເພາະແມ່ນການປົກປັກຮັກສາ, ການຄຸ້ມຄອງຊົມໃຊ້, ການບູລະນະ, ມາດຕະການໃນການຄຸ້ມຄອງ, ການອະນຸລັກເຂດຫ້ວຍຍອດນໍ້າ ແລະ ອື່ນໆ. ທັງນີ້, ກໍເພື່ອເຮັດໃຫ້ການປົກປັກຮັກສາ ແລະ ນຳໃຊ້ສິ່ງອຳນວຍຄວາມສະດວກດັ່ງກ່າວໃຫ້ມີຄວາມຍືນຍົງ.
(ຂ່າວ: ເມືອງແບງ)
