ກອງປະຊຸມໜ່ວຍປະສານງານປະຈໍາພື້ນທີ່ຊາຍແດນ ລາວ-ໄທ, ໄທ-ລາວ ລະຫວ່າງສອງແຂວງພາກເໜືອ(ແຂວງໄຊຍະບູລີ, ແຂວງບໍ່ແກ້ວ) ກັບ ກອງກຳລັງຜາເມືອງ, ແຫ່ງຣາຊະອານາຈັກໄທ ຄັ້ງທີ 2 ປະຈຳປີ 2022 ຈັດຂຶ້ນໃນວັນທີ 15 ກັນຍາ ຜ່ານມານີ້, ຢູ່ທີ່ອຸດທະຍານສາມລ່ຽມທອງຄຳ ບ້ານວຽງ ເມືອງ ຊຽງແສນ ແຂວງ ຊຽງລາຍ ປະເທດໄທ ໂດຍການເປັນປະທານຮ່ວມຝ່າຍລາວນຳໂດຍ ທ່ານ ພົນຈັດຕະວາ ກູດ ພົມມາ ຫົວໜ້າການທະຫານກອງບັນຊາການທະຫານແຂວງ ໄຊຍະບູລີ ກອງທັບປະຊາຊົນລາວ, ຫົວໜ້າໜ່ວຍປະສານງານປະຈຳພື້ນທີ່ ຊາຍແດນ ລາວ-ໄທ ແລະ ຝ່າຍໄທ ໂດຍແມ່ນ ທ່ານ ພົນຕີ ສຸພະເລິກ ສະຖາພອນຜົນ ຜູ້ບັນຊາການກອງກຳລັງຜາເມືອງ ກອງທັບແຫ່ງຣາຊະອານາຈັກໄທ ຫົວໜ້າໜ່ວຍປະສານງານປະຈຳພື້ນທີ່ຊາຍແດນໄທ-ລາວ, ມີບັນດາ ໜ່ວຍປະສານງານປະຈຳພຶ້ນທີ່ຊາຍແດນສອງແຂວງຂອງລາວ, 5 ແຂວງຂອງໄທ ແລະພາກສ່ວນທີ່ກ່ຽວຂ້ອງທັງສອງຝ່າຍ ລາວ-ໄທ, ໄທ-ລາວເຂົ້າຮ່ວມ.
ກອງປະຊຸມຄັ້ງນີ້ໄດ້ມີການທົບທວນຄືນຜົນຂອງການປະຕິບັດງານທີ່ຜ່ານມາ, ທັງເປັນການແລກປ່ຽນຄວາມຄິດເຫັນ ແລະ ປຶກສາຫາລືການແກ້ໄຂບັນຫາຢາເສບຕິດຮ່ວມກັນລະຫວ່າງແຂວງໄຊຍະບູລີ-ແຂວງບໍ່ແກ້ວ ສປປ ລາວ ກັບກອງກຳລັງຜາເມືອງ ແຫ່ງຣາຊະອານາຈັກໄທ, ເຊິ່ງໄລຍະຜ່ານມາເຫັນວ່າທັງສອງຝ່າຍໄດ້ຕັ້ງໜ້າ ແລະ ເອົາໃຈໃສ່ຈັດຕັ້ງຜັນຂະຫຍາຍແຜນການຮ່ວມມືເປັນປະຈຳ ແລະ ໄດ້ມີການສະກັດກັ້ນ, ແກ້ໄຂຈັບກຸມຜູ້ກະທຳຜິດຄ້າຂາຍຢາເສບຕິດໄດ້ຢ່າງຕໍ່ເນື່ອງເຮັດໃຫ້ບໍລິເວນຊາຍແດນເປັນລະບຽບຮຽບຮ້ອຍດີ, ໃນຕອນທ້າຍຄະນະຜູ້ແທນກອງປະຊຸມທັງສອງຝ່າຍ ລາວ-ໄທ, ກໍ່ໄດ້ກ່າວສະແດງຄວາມຂອບໃຈເຊິ່ງກັນ ແລະ ກັນ, ທີ່ໄດ້ໃຫ້ການຮ່ວມມືກັນທັງສອງຝ່າຍລະຫວ່າງໜ່ວຍປະສານງານປະຈຳພື້ນທີ່ຊາຍແດນຂອງ ລາວ-ໄທ,ໄທ-ລາວ ເຮັດໃຫ້ການປຶກສາຫາລືວຽກເປັນເອກະພາບໄດ້ຫຼາຍເນື້ອໃນ, ຫຼາຍບັນຫາທີ່ສຳຄັນ, ອັນເປັນການປະກອບສ່ວນອັນສຳຄັນກ່ຽວກັບການແກ້ໄຂບັນຫາຢາເສບຕິດ ຕາມຊາຍແດນ ລາວ-ໄທ, ໄທ-ລາວຮ່ວມກັນໃຫ້ມີຄວາມຄືບໜ້າດີຂຶ້ນ, ມີຄວາມສອດຄ່ອງກັນ ກ້າວໄປສູ່ການຮ່ວມມືໃນການແກ້ໄຂບັນຫາຢາເສບຕິດຕາມຊາຍແດນ ລາວ-ໄທ,ໄທ-ລາວ ໃຫ້ເກີດມີປະສິດທິພາບໃນພື້ນທີ່ພາກເໜືອຂອງລາວຄື: ແຂວງໄຊຍະບູລີ-ແຂວງບໍ່ແກ້ວ ກັບພື້ນທີ່ພາກເໜືອຂອງໄທຄື: ແຂວງດຊຽງຣາຍ, ແຂວງພະເຍົາ, ແຂວງນ່ານ, ແຂວງອຸດຕະຣາດິດ ແລະ ແຂວງພິດສະນຸໂລກ. ທັງນີ້ກໍ່ເພື່ອເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອຖານບ້ານໃກ້ເຮືອນຄຽງທີ່ດີລະຫວ່າງສອງຊາດ, ສອງກອງທັບ ລາວ-ໄທ, ໄທ-ລາວ ບົນພື້ນຖານຫຼັກການຂອງຄວາມສະເໝີພາບຕ່າງຝ່າຍຕ່າງມີຜົນປະໂຫຍດ, ການເຄົາລົບສິດອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ຄວາມເປັນເອກະລາດທາງດ້ານການເມືອງ ແລະ ບໍ່ແຊກແຊງເຂົ້າກິດຈະການພາຍໃນຂອງກັນ ແລະ ກັນໃຫ້ນັບມື້ກ້າວໜ້າຂະຫຍາຍຕົວ ແລະ ມີຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຕາມຊາຍແດນຂອງສອງປະເທດອີກດ້ວຍ.
ຂ່າວ ໄຊຍະສັກ ມະນີວັນ
