ຫ້ອງການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ພ້ອມດ້ວຍຄະນະກົມ, ຄະນະອຳນວຍການ ຈາກສຳນັກຂ່າວຕ່າງໆ ແລະ ຂະແໜງ ການທີ່ກ່ຽວຂ້ອງອ້ອມຂ້າງສູນກາງ ຮ່ວມປືກສາຫາລື ໃນວັນທີ 21 ກັນຍາ 2022 ກ່ຽວກັບການສ້າງແຜນນະໂຍບາຍ, ແຜນງານ ຫລື ໂຄງການຕ່າງໆ ເພື່ອຊ່ວຍໃຫ້ຄົນພິ ການໄດ້ເຂົ້າເຖິງແຫລ່ງຂໍ້ມູນຂ່າວ ສານຕ່າງໆຢ່າງທົ່ວເຖິງ.
ທ່ານ ສົມກຽດຕິສັກ ກິ່ງສະດາ ຮອງຫົວໜ້າຫ້ອງການກະຊວງ ຖວທ ໄດ້ໃຫ້ຮູ້ວ່າ: ກອງປະຊຸມຄັ້ງນີ້, ເພື່ອປຶກສາຫາລື, ລະດົມຄວາມຄິດເຫັນໃນການຂຶ້ນແຜນ, ຂຽນໂຄງການ, ກິດຈະກຳ ກ່ຽວກັບການມີສ່ວນຮ່ວມຂອງຄົນພິການ ໂດຍສະເພາະເນັ້ນໃສ່ບັນດາສື່ຕ່າງໆວ່າຈະເຮັດແນວໃດ ໃຫ້ຄົນພິການເຂົ້າເຖິງແຫລ່ງຂໍ້ມູນໃນຮູບແບບໃດ, ເພື່ອໃຫ້ເຂົາເຈົ້າໄດ້ຮັບຮູ້ຂໍ້ມູນຂ່າວສານຕ່າງໆຢ່າງທົ່ວເຖິງ ໂດຍຜ່ານສື່ສິ່ງພິມ, ສື່ເອເລັກໂຕຣນິກ, ເຕັກໂນໂລຊີທີ່ທັນສະໄໝ ແລະ ສື່ອື່ນໆ ເຊິ່ງອົງການຈັດຕັ້ງ ແລະ ພາກສ່ວນທີ່ກ່ຽວຂ້ອງ ໂດຍສະເພາະສື່ມວນຊົນ ຕ້ອງສ້າງເງື່ອນໄຂໃຫ້ຄົນພິການສາ ມາດເຂົ້າເຖິງຂໍ້ມູນຂ່າວສານ ແລະ ສະໜອງຂໍ້ມູນຂ່າວສານທີ່ຈຳເປັນ ເປັນຕົ້ນ ການບໍລິການຟື້ນຟູໜ້າທີ່ການ, ສະຖານທີ່ໃຫ້ຄວາມຊ່ວຍເຫລືອດ້ານອຸປະກອນ, ເຄື່ອງຄ້ຳຊູ, ເຄື່ອງຊ່ວຍຊູ, ການປິ່ນປົວສຸຂະພາບ, ການສຶກສາ ແລະ ການມີວຽກເຮັດງານທຳ.
ພ້ອມນີ້, ທ່ານ ສົມກຽດຕິສັກ ກິ່ງສະດາ ຍັງໄດ້ສະເໜີໃຫ້ຜູ້ເຂົ້າຮ່ວມແຕ່ລະພາກສ່ວນ ຂຽນແຜນການ, ໂຄງການ ຫລື ຄວາມຄິດເຫັນຂອງຕົນເອງສົ່ງໃຫ້ຂະແໜງ ການທີ່ກຽວຂ້ອງ ກໍຄື ຫ້ອງການກະຊວງ ຖວທ ເພື່ອຮວບຮວມເອົາແຜນການ ຫລື ຄວາມຄິດເຫັນ ທີ່ເຫັນວ່າເໜາະສົມ ນຳໄປຈັດຕັ້ງປະຕິບັດ ເພື່ອເຮັດໃຫ້ຄົນພິການໄດ້ຮັບຮູ້ຂໍ້ມູນຂ່າວສານຢ່າງທົ່ວເຖິງ ແລະ ໄດ້ມີສ່ວນຮ່ວມໃນສັງຄົມຫລາຍຂຶ້ນ.
ຂ່າວ: ທະນູທອງ
ພາບ: ເກດສະໜາ
Medialaos MMD
