ກະຊວງ ຖະແຫລງຂ່າວ ວັດທະນະທຳ ແລະ ທ່ອງທ່ຽວ(ຖວທ) ຮ່ວມກັບ ພະແນກ ຖວທ ສະຫວັນນະເຂດ ເຜີຍແຜ່ບົດຄົ້ນຄວ້າດ້ານໂພຊະນາການລະດັບແຂວງ ໃຫ້ແກ່ສື່ມວນຊົນໃນທົ່ວປະເທດ ໃນວັນທີ 21 ກັນຍາ 2022 ທີ່ແຂວງສະຫວັນນະເຂດ ໂດຍໄດ້ຮັບການສະໜັບສະໜູນຈາກ ອົງການອຸຍນີເຊບ ປະຈຳລາວ ແລະ ສະຫະພາບ ເອີຣົບ ແນໃສ່ເພື່ອສ້າງຄວາມຮັບຮູ້, ຄວາມເຂົ້າໃຈໃຫ້ແກ່ສື່ມວນຊົນກ່ຽວກັບບົດບາດ ແລະ ຄວາມສໍາຄັນຂອງວຽກງານໂພຊະນາການ ໂດຍສະເພາະແມ່ນວຽກງານສົ່ງເສີມສຸຂະພາບຂອງແມ່ ແລະ ເດັກ ແລະ ອື່ນໆ.
ໂອກາດນີ້, ທ່ານ ວັນນະສິນ ສິມມະວົງ ຮອງຫົວໜ້າກົມສື່ມວນຊົນ ກະຊວງ ຖະ ແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວວ່າ: ກອງປະຊຸມຄັ້ງນີ້, ແນໃສ່ ສ້າງຄວາມຮັບຮູ້, ຄວາມເຂົ້າໃຈໃຫ້ແກ່ສື່ມວນຊົນ ກ່ຽວກັບບົດບາດ ແລະ ຄວາມສໍາຄັນຂອງວຽກງານໂພຊະການ ໂດຍສະເພາະວຽກງານສົ່ງເສີມສຸຂະພາບຂອງແມ່ ແລະ ເດັກ, ເຮັດແນວໃດເພື່ອໃຫ້ສື່ມວນຊົນ ສາມາດປະກອບສ່ວນໃນວຽກງານ ໂຄສະນາກ່ຽວກັບການສົ່ງເສີມໂພຊະການ ກໍຄື ໃຫ້ຂໍ້ມູນຂ່າວສານໄປທົ່ວເຖິງປະຊາຊົນ ແລະ ສິ່ງສໍາຄັນກໍແມ່ນ ປະຊາຊົນທີ່ໄດ້ຮັບຂໍ້ມູນຂ່າວສານແລ້ວ ເກີດມີການປ່ຽນແປງທາງດ້ານພຶດຕິກໍາ ຫັນໄປໃຫ້ຄວາມສໍາຄັນຕໍ່ວຽກງານໂພຊະການ ການສົ່ງເສີມສຸຂະພາບແມ່ ແລະ ເດັກ ໃຫ້ນັບມື້ດີຂຶ້ນ.
ກອງປະຊຸມໃນຄັ້ງນີ້ໄດ້, ປຶກສາຫາລື ແລກປ່ຽນຄໍາຄິດຄໍາເຫັນ ກ່ຽວກັບການພັດທະ ນາເນື້ອໃນຂ່າວສານ ທີ່ຕິດພັນກັບວຽກງານໂພຊະນາການ ໂດຍຜ່ານສື່ມວນຊົນ, ຮັບຟັງການເຜີຍແຜ່ດ້ານໂພຊະນາການ ແລະ ຫົວຂໍ້ອື່ນໆ ເປັນຕົ້ນ ຄວາມຮູ້ພຶ້ນຖານກ່ຽວກັບອາ ຫານ ຫລື ໂພຊະນາການ, ການຂາດສານອາຫານ, ໂຄງການສ້າງຖານຂໍ້ມູນຂ່າວສານແຫ່ງຊາດ ດ້ານໂພຊະນາການໃນລາວ, ສະພາບການຂາດສານອາຫານໃນລາວ, ບົດບາດຂອງສື່ໃນການສະໜັບສະໜູນດ້ານໂພຊະນາການ ແລະ ອື່ນໆ. ນອກນັ້ນ, ກອງປະຊຸມຍັງໄດ້ປຶກສາຫາລື, ແລກປ່ຽນຄໍາຄິດຄໍາເຫັນ ກ່ຽວກັບການພັດທະນາ ເນື້ອໃນຂ່າວສານ ທີ່ຕິດພັນກັບວຽກງານໂພຊະການ ໂດຍຜ່ານສື່ມວນຊົນ.
ຂ່າວ-ພາບ: ກິດຕາ
Medialaos MMD
