ໂດຍປະຕິບັດຕາມມະຕິກອງປະຊຸມໃຫ່ຍຂອງອົງຄະນະພັກເມືອງແບງ ຄັ້ງທີ XII ຕໍ່ກັບແຜນພັດທະນາເສດຖະກິດ-ສັງຄົມ ແລະ ການແກ້ໄຂຄວາມທຸກຍາກຂອງພໍ່ແມ່ປະຊາຊົນ ເວົ້າລວມ – ເວົ້າສະເພາະກໍ່ຄືຂົງເຂດເສດຖະກິດ ຍາມໃດກໍ່ເອົາໃຈໃສ່ຊຸກຍູ້, ສົ່ງເສີ່ມວຽກງານວິຊາສະເພາະ ໂດຍສະເພາະແມ່ນໄດ້ຊຸກຍູ້, ສົ່ງເສີ່ມການປຸກຝັງ – ລ້ຽງສັດ ແລະ ການບໍລິການອຶ່ນໆ ເພື່ອຜະລິດເປັນສິນຄ້າ ພາໃຫ້ຄອບຄອບລຸດພົ້ນອອກຈາກຄວາມທຸກຍາກເທື່ອລະກ້າວ ດັ່ງຄອບຄົວທ່ານ ແສງຄໍາ ເລົ່າ ບ້ານໂພນສີ ເມືອງແບງ ແຂວງອຸດົມໄຊ ເຊີ່ງເປັນຄອບຄົວໜຶ່ງທີ່ຖືກຄັດເລຶອກເປັນຄອບຄົວຕົວແບບໃນການສ້າງເສດຖະກິດຄອບຄົວ.
ທ່ານ ແສງຄໍາ ເລົ່າ ໃຫ້ສຳພາດວ່າ: ໃນເມືອກ່ອນຄອບຄົວຂອງຕົນເອງໄດ້ຍຶດຖືອາຊີບເຮັດນາ, ເຮັດໄຮ່ ແລະ ເຮັດສວນ ແຕ່ກໍ່ຍັງເຫັນວ່າຊີວີດການເປັນຢູ່ຂອງຄອບຄົວກໍ່ຍັງພົບຄວາມຍຸ້ງຍາກ ລາຍຮັບບໍ່ພໍກັບລາຍຈ່າຍ ພາລະຄອບຄົວນັບມື້ເພີ່ມຂຶ້ນ, ດັ່ງນັ້ນຄອບຄົວຕົນເອງຈີ່ງໄດ້ປຶກສາຫາລືກັນເພື່ອຊອກທາງອອກໃໝ່ ເນື່ອງຈາກວ່າຄອບຄົວແມ່ນມີຄວາມຮູ້ ແລະ ພອນສະແຫວງດ້ານນີ້ ຈິ່ງພາກັນຫັນມາອອກແບບຈັດສວນປູກຜັກປອດສານເຄມີ ເຊິ່ງລວມມີ: ຜັກກາດ, ຜັກຊອມ, ຫອມປ້ອມ, ຜັກບົ່ວ ແລະ ອຶ່ນໆ ເພື່ອສ້າງລາຍຮັບເຂົ້າຄອບຄົວ ເພື່ອແກ້ໄຂຊີວິດການເປັນຢູ່ ລຸດພົ້ນອອກຈາກຄວາມທຸກຍາກເທືອລະກ້າວ.
ຄອບຄົວດັ່ງກ່າວໄດ້ເລີ່ມປູກຜັກມາແຕ່ປີ 2018 ຈົນເຖິງ ປະຈຸບັນ ໃນເບື່ອງຕົ້ນມີເນື້ອທີປູກຜັກ 7 ເຮັກຕາ ພາຍຫລັງດໍາເນີນໄປໃນໄລຍະໃດໜື່ງເຫັນວ່າຜົນຕອບຮັບດີພໍສົມຄວນຈີ່ງເລີ່ມຂະຫຍາຍເນື້ອທີ່ອອກ ອີກ 10 ເຮັກຕາ ຜ່ານການສ້າງເສດຖະກິດຄອບຄົວມາແຕ່ປີ 2018 ເປັນຕົ້ນມາມີແຮງຕົ້ນຕໍ 2 ຄົນ, ມາຮອດປະຈຸບັນ ເຫັນວ່າຊີວິດການເປັນຢູ່ຂອງຄອບຄົວແມ່ນໄດ້ຮັບການພັດທະນາດີຂຶ້ນໄປເລື່ອຍໆ ໃນແຕ່ລະປີ ສາມາດສ້າງລາຍຮັບບໍ່ຕໍາກວ່າ 70 ລ້ານກີບ. ສາມາດມີວັດຖູ ແລະ ສິ່ງຂອງທີ່ໄດ້ມາຈາກ ເຮັດການຜະລິດນີ້ ເປັນຕົ້ນແມ່ນ: ມີເຮືອນຢູ່ຖາວອນ, ມີພາຫານະຮັບໃຊ້, ໄດ້ສົ່ງລູກເຂົ້າໂຮງຮຽນໝົດທຸກຄົນ ທ່ານ ແສງຄໍາ ເລົ່າ ຍັງໄດ້ກ່າວຕື່ມວ່າ : ການທີ່ຈະສ້າງອາຊີບເສີມອັນໃດອັນໜຶ່ງສຳຄັນຄືຄວາມເຂົ້າໃຈ ແລະ ເອກະພາບກັນພາຍໃນຄອບຄົວ ແລະ ຫົວໜ້າຄອບຄົວຕ້ອງເປັນເສົາຫຼັກໃນການເປັນຜູ້ນຳຂອງຄອບຄົວ, ຕ້ອງຮູຈັກແບ່ງເວລາ, ນໍາໃຊ້ເວລາໃຫ້ຖືກຕ້ອງ ແລະ ອີກອັນໜຶ່ງ ຖ້າເຮົາຕັດສິນໃຈເຮັດກິດຈະກຳໄປແລ້ວ ເມືອພົບບັນຫາກໍ່ຊອກທາງອອກ ແລະ ຊອກວີທີຮຽນຮູ້ເພື່ອແກ້ໄຂ ຖືວ່າເປັນປະສົບການທັງເຮັດທັງຮຽນໄປພ້ອມໆກັນດ້ວຍວິທີຕ່າງໆ ສໍາລັບແຜນໃນຕໍ່ໜ້າຄອບຄົວຈະສືບຕໍ່ເຮັດອາຊີບນີ້ໄປເລື້ອຍໆ ໂດຍນຳໃຊ້ທຶນຮອນທີ່ຕົນເອງມີຢູ່ ເພື່ອເປັນທຶນໝູນວຽນ ໃນການຂະຫຍາຍກິດຈະການ ເພື່ອສົ່ງສິນຄ້າໄປຈໍາໜ່າຍອອກຕ່າງເມືອງ. ນອກຈາກນີ້ທ່ານ ຍັງໄດ້ຝາກຂໍ້ຄິດດີໆໃຫ້ພໍ່່ແມ່ປະຊາຊົນທີ່ຕ້ອງການຢາກສ້າງອາຊີບເສີມ ເພື່ອສ້າງລາຍຮັບເຂົ້າສູ່ຄອບຄົວ ກໍ່ສາມາດເຂົ້າມາແລກປ່ຽນບົດຮຽນ ເບິ່ງສະຖານທີ່ການຜະລິດຂອງເພີ່ນໄດ້ ທີ່ບ້ານໂພນສີ ເມືອງແບງ ແຂວງອຸດົມໄຊ.
ທັງໝົດນັ້ນກໍ່ຍ້ອນຄວາມດຸໝັ້ນອົດທົນ ບວກກັບຄວາມສາມັກຄີຂອງສະມະຊິກຢູ່ພາຍໃນຄອບຄົວ ແລະ ການຕັດສິນໃຈ ລອງຜິດລອງຖືກ ບໍ່ທໍ້ຖອຍກັບບັນຫາອຸປະສັກທີ່ພົບພໍ້ ຈ່ຶງເຮັດໃຫ້ຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນ ແລະ ສິ່ງທີ່ພູມໃຈ ແລະ ປະທັບໃຈທີ່ສຸດກໍ່ແມ່ນຄວາມກ້າຫານ, ຄວາມຕັ້ງໃຈບຸກບືນສູ້ຊົນ, ເພາະການສ້າງລາຍຮັບເພີ່ມຈະເປັນອາຊີບໃດກໍ່ຕາມ ຖ້າເປັນອາຊີບທີ່ບໍລິສຸດ ຖືກຕ້ອງຕາມລະບຽບກົດໝາຍຂອງພັກ -ລັດວາງອອກ, ມີຄວາມຊື່ສັດ, ປະຢັດ, ອົດທົນ ກໍ່ຈະປະສົບຜົນສໍາເລັດ ແລະ ສາມາດຫຼຸດຜົ້ນອອກຈາກຄວາມທຸກຍາກໄດ້ເທືອລະກ້າວ.
ຂຽນໂດຍ: ກິ່ງມະນີ
Medialaos MMD
