ພິທີເປີດສົກຮຽນໃໝ່ໃຫ້ແກ່ນັກຮຽນ 3 ລະບົບສົກຮຽນ 2022-2023 ຢູ່ໂຮງຮຽນທະຫານຊາຍແດນ 712 ໄດ້ຈັດຂຶ້ນໃນວັນທີ 15 ກັນຍາ ຜ່ານມານີ້, ໂດຍການເປັນປະທານຂອງສະຫາຍພົນຈັດຕະວາ ສີພັນ ພຸດທະວົງ ຄະນະພັກກົມໃຫຍ່, ຫົວໜ້າກົມທະຫານຊາຍແດນກົມໃຫຍ່ເສນາທິການກອງທັບ, ມີຄະນະພັກຄະນະອໍານວຍການ, ພະນັກງານຄູ-ອາຈານ, ຕະຫຼອດຮອດນັກຮຽນນັກສຶກສາທັງ 3 ລະບົບເຂົ້າຮ່ວມ.
ສະຫາຍພັນໂທ ຈັນພອນ ທອງສອນ ຫົວໜ້າພະແນກອົບຮົມ-ກໍ່ສ້າງໂຮງຮຽນທະຫານ ຊາຍແດນ 712 ໄດ້ຂຶ້ນຜ່ານແຜນການອົບຮົມ-ຫັດແອບ, ຂໍ້ຕົກລົງ ແລະຄຳສັ່ງຂອງກົມໃຫ່ຍເສນາທິການ ກອງທັບວ່າດ້ວຍການອະນຸມັດໃຫ້ໂຮງຮຽນເປີດຊຸດຮຽນກໍ່ສ້າງນາຍສິບທະຫານຊາຍແດນຊຸດທີ V, ບໍາລຸງພະນັກງານບັນຊາຂັ້ນໝວດ, ກອງຮ້ອຍທະຫານຊາຍແດນຊຸດທີ IV ແລະ ກໍ່ສ້າງນາຍທະຫານຊັ້ນກາງສາຂາຄຸ້ມຄອງປ້ອງກັນຊາຍແດນຊຸດທີ I ສົກຮຽນ 2022-2023. ໃນນີ້ຫຼັກສູດກໍ່ສ້າງນາຍສິບທະຫານ ຊາຍແດນໃຊ້ເວລາ 1 ປີ ໂດຍເນື້ອໃນໂຄງການຫຼັກສູດວິຊາຮຽນແບ່ງອອກເປັນ3ໝວດຄວາມຮູ້, ເນື້ອໃນ ໂຄງການຫຼັກສູດສຳລັບກໍ່ສ້າງນາຍທະຫານຊາຍແດນ ຊັ້ນກາງໃຊ້ເວລາ 2 ປີ ແບ່ງງອອກເປັນ 4 ພາກຮຽນລວມມີ 67 ໜ່ວຍກິດ ແລະ ເນື້ອໃນໂຄງການຫຼັກສູດສຳລັບນັກຮຽນບໍາລຸງແມ່ນໃຊ້ເວລາ 6 ເດືອນມີ 6 ວິຊາຮຽນ ມີນັກຮຽນທັງ 3 ລະບົບ 252 ສະຫາຍ, ທັງນີ້ກໍ່ເພື່ອເປັນການກໍ່ສ້າງກຳລັງເຫຼົ່າຮົບທະຫານຊາຍແດນ ໃຫ້ມີລະດັບຄວາມຮູ້, ຄວາມສາມາດທາງດ້ານວິຊາສະເພາະ, ມີຄວາມໜັກແໜ້ນ ທາງດ້ານການເມືອງແນວຄິດ, ມີຄຸນສົມບັດສິນທຳປະຕິວັດ ສາມາດຕອບສະໜອງຄວາມຮຽກຮ້ອງ ຕ້ອງການຂອງວຽກງານໃນສະເພາະໜ້າ ແລະ ຍາວນານ.
ໃນໂອກາດດັ່ນີ້, ສະຫາຍພົນຈັດຕະວາ ສີພັນ ພຸດທະວົງ ກໍ່ໄດ້ເນັ້ນໜັກໃຫ້ຄະນະພັກ-ຄະນະອໍານວຍການ, ພະນັກງານ – ຄູອາຈານຈົ່ງພ້ອມກັນສຶບຕໍ່ປັບປຸງໂຄງການຫຼັກສູງການຮຽນ, ການສອນໃຫ້ ມີຄຸນນະພາບ, ຮຽກຮ້ອງໃຫ້ນັກຮຽນ-ນັກສຶກສາທຸກຄົນຈົ່ງພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການ ເມືອງຂອງຕົນ ເຂົ້າໃນການຄົ້ນຄວ້າຮ່ຳຮຽນແລກປ່ຽນຄວາມຮູ້ນຳຄູອາຈານ, ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີຄຸນສົມບັດສິນທຳປະຕິວັດ, ມີຄຸນທາດການເມືອງໜັກແໜ້ນ, ປະຕິບັດກົດລະບຽບຂອງກອງທັບ ແລະ ໂຮງຮຽນວາງອອກຢ່າງເຂັ້ມງວດ ເພື່ອສ້າງຕົວເອງໃຫ້ກາຍເປັນພະນັກງານສືບທອດທີ່ດີຂອງກອງທັບ.
