ກົມແຜນການ ກະຊວງສຶກສາທິການ ແລະ ກິລາ ຫຼື ສສກ ຮ່ວມກັບ ສະຖາບັນພັດທະນາກຳມະບານລາວ ຈັດການແຂ່ງຂັນກິລາເຕະບານທີມຍິງ-ຊາຍ ແລະ ກິລາເປຕັງທີມຊຸດຍິງ-ຊາຍ ເພື່ອສ້າງໂອກາດໃຫ້ພະນັກງານວິຊາການຂອງທັງສອງພາກສ່ວນໃຫ້ມີຄວາມສາມັກຄີຮັກແພງ ແລະ ແລກປ່ຽນບົດຮຽນນັບມື້ກວ້າງຂວາງຂຶ້ນເລື້ອຍໆ ພ້ອມທັງສ້າງຂະບວນການຕ້ອນຮັບວັນຄູແຫ່ງຊາດ ຄົບຮອບ 28 ປີ (7 ຕຸລາ 1994-7 ຕຸລາ 2022) ທີ່ຈະມາເຖິງນີ້ ຢ່າງມີບັນຍາກາດຟົດຟື້ນ.
ກິດຈະກຳຄັ້ງນີ້ ໄດ້ມີຂຶ້ນ ເມື່ອວັນທີ 15 ກັນຍາ ຜ່ານມາ ທີ່ສະໜາມກິລາຂອງສະຖາບັນພັດທະນາກຳມະບານລາວ ບ້ານສົມສະຫງ່າ ເມືອງໄຊເຊດຖາ ນະຄອນຫຼວງວຽງຈັນ, ໂດຍການນໍາພາຂອງທ່ານ ສົມລຶກ ສຸວັນນະສານ ຄະນະບໍລິຫານງານສູນກາງ ສະຫະພັນກຳມະບານລາວ, ຫົວໜ້າສະຖາບັນພັດທະນາກຳມະບານລາວ ແລະ ທ່ານ ອານຸແພງ ແກ້ວວົງສາ ຮອງຫົວໜ້າກົມແຜນການ ກະຊວງ ສສກ, ເປັນກຽດເຂົ້າຮ່ວມໂດຍທ່ານ ປອ ສຳລານ ພັນຄະວົງ ຫົວໜ້າກົມປະກັນຄຸນນະພາບການສຶກສາ ກະຊວງ ສສກ ແລະ ທ່ານ ຮສ.ປອ ອານຸລົມ ວິໄລພອນ ຄະນະບໍລິຫານງານສູນກາງສະຫະພັນກຳມະບານລາວ, ປະທານສະຫະພັນກຳມະບານ ກະຊວງ ສສກ ທັງເປັນຮອງຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ ພ້ອມດ້ວຍຫົວໜ້າຫ້ອງການ, ຜູ້ໃຫ້ການສະໜັບສະໜູນ ແລະ ພາກສ່ວນທີ່ກ່ຽວຂ້ອງທັງສອງພາກສ່ວນ ເຂົ້າຮ່ວມ ຢ່າງເປັນຂະບວນການຟົດຟື້ນ.
ໂອກາດນີ້, ທ່ານ ອານຸແພງ ແກ້ວວົງສາ ໄດ້ກ່າວວ່າ: ການຈັດກິດຈະກຳໃນຄັ້ງນີ້ ກໍເພື່ອເປັນການສ້າງຂະບວນການຂໍ່ານັບຮັບຕ້ອນວັນຄູແຫ່ງຊາດ ຄົບຮອບ 28 ປີ ແລະ ວັນສຳຄັນຕ່າງໆຂອງພັກ-ຂອງຊາດ, ພ້ອມທັງເປັນການສ້າງຄວາມສາມັກຄີຮັກແພງ ແລະ ແລກປ່ຽນບົດຮຽນ ລະຫວ່າງພະນັກງານພາຍໃນ ກົມແຜນການ ແລະ ສະຖານບັນພັດທະນາກຳມະບານລາວ ໃຫ້ມີຄວາມສາມັກຄີແໜ້ນແຟ້ນ ຂຶ້ນກວ່າເກົ່າ ສະນັ້ນ ໃນມື້ນີ້ທັງສອງພາກສ່ວນພວກເຮົາຈຶ່ງໄດ້ຮ່ວມກັນຈັດກິດຈະກຳແຂ່ງຂນກິລາສອງປະເພດ ກໍຄື ເຕະບານຍິງ-ຊາຍ ແລະ ເປຕັງທີມຍິງ-ຊາຍ ແນໃສ່ເຮັດໃຫ້ການສະເຫຼີມສະຫຼອງວັນສຳຄັນດັ່ງກ່າວໃຫ້ມີຄວາມໝາຍຢ່າງເລິກເຊິ່ງ.
ໂອກາດດຽວກັນ, ທ່ານ ສົມລຶກ ສຸວັນນະສານ ກ່າວໃຫ້ຮູ້ວ່າ: ຕະຫຼອດໄລຍະຜ່ານມາ ລະຫວ່າງ ສະຖາບັນພັດທະນາກໍາມະບານລາວ ແລະ ກະຊວງສຶກສາທິການ ແລະ ກິລາ ໄດ້ມີການພົວພັນປະສານງານກັນ ໂດຍສະເພາະແມ່ນວຽກງານການສ້າງຫຼັກສູດຊັ້ນສູງ ສາຂາຄຸ້ມຄອງຄວາມປອດໄພ ແລະ ສຸຂະພາບແຮງງານ ກັບກົມອະຊີວະສຶກສາ ແລະ ໄດ້ຂໍຕົວເລກແບ່ງປັນກັບກົມແຜນການອີກດ້ວຍ ຊຶ່ງການຮ່ວມມືດັ່ງກ່າວ ແມ່ນໄດ້ເລີ່ມຕົ້ນແຕ່ປີ 2018 ສໍາລັບຫຼັກສູດຊັ້ນສູງ ສາຂາຄຸ້ມຄອງຄວາມປອດໄພ ແລະ ສຸຂະພາບແຮງງານ ແມ່ນການກະກຽມເປີດການຮຽນການສອນ ໃນເດືອນຕຸລາ 2022 ທີ່ຈະມາເຖິງນີ້.
ພ້ອມນັ້ນ, ໃນພິທີ ທ່ານ ປອ ພອນປະເສີດ ອິນທະສອນ ປະທານກຸ່ມບໍລິສັດ ສາມເອັດ ພັດທະນາ ກໍໄດ້ມອບຊຸດກິລາ ຈຳນວນ 45 ຊຸດ ແລະ ເງິນອີກຈຳນວນໜຶ່ງ ລວມມູນຄ່າທັງໝົດ 5 ລ້ານກີບ ປະກອບສ່ວນກິດຈະກຳດັ່ງກ່າວ ຕາງໜ້າກ່າວຮັບໂດຍທ່ານ ອານຸແພງ ແກ້ວວົງສາ. ແນວໃດກໍດີ, ເພື່ອເປັນການສະແດງຄວາມຮູ້ບຸນຄຸນດັ່ງກ່າວ ທາງກົມແຜນການ ກໍຍັງມອບໃບກຽດຕິຄຸນໃຫ້ກັບທ່ານ ປອ ພອນປະເສີດ ອິນທະສອນ ທີ່ມີນໍ້າໃຈອັນດີງາມໃນການຊຸກຍູ້ຊຸດກິລາ ເພື່ອປະກອບສ່ວນເຂົ້າໃນຂະບວນການຄັ້ງນີ້ສຳເລັດໄປດ້ວຍດີ.
ສໍາລັບການແຂ່ງຂັນກິລາ ເຕະບານ ແລະ ເປຕັງ ຜົນປາກົດວ່າ ເຕະບານຍິງທິມ ກົມແຜນການ ເອົາຊະນະ ສະຖາບັນພັດທະນາກຳມະບານລາວ 9-1 ປະຕູ ແລະ ທີມຊາຍ ສະຖາບັນພັດທະນາກຳມະບານລາວ ເອົາຊະນະ ກົມແຜນການ 9-1 ປະຕູ. ຂະນະທີ່ຜົນການແຂ່ງຂັນກິລາເປຕັງ ມີ 4 ຄູ່ ປະກົດວ່າ ຄູ່ທີ 1 ທີມການນໍາ ສສກ ຊະນະ ການນໍາສະຖາບັນພັດທະນາກຳມະບານລາວ 9-8 ຄະແນນ, ຄູ່ທີ 2 ທີມ 3 ອົງການຈັດຕັ້ງ ສສກ ຊະນະ ສະຖາບັນພັດທະນາກຳມະບານລາວ 9-5 ຄະແນນ, ຄູ່ທີ 3 ທີມປະສົມຊາຍ ສສກ ຊະນະ ສະຖາບັນພັດທະນາກຳມະບານລາວ 9-7 ຄະແນນ ແລະ ຄູ່ທີ 4 ຄູ່ປະສົມ ສະຖາບັນພັດທະນາກຳມະບານລາວ ເອົາຊະນະ ສສກ 9-4 ຄະແນນ.
ຂ່າວໂດຍ: ສົງການ ພັນແພງດີ
