ໃນວັນທີ 15 ກັນຍາ 2022 ນີ້, ທີ່ນະຄອນຫລວງວຽງຈັນ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກໍາປູເຈຍ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊໍາຣິນປະທານສະພາແຫ່ງຊາດແຫ່ງ ຣາຊະອານາຈັກກໍາປູເຈຍ ພ້ອມດ້ວຍຄະນະ.
ໃນໂອກາດນີ້, ທ່ານ ຄໍາໃບ ດໍາລັດ ໄດ້ສະແດງຄວາມຂອບໃຈເປັນຢ່າງຍິ່ງ ແລະ ເປັນກຽດຢ່າງສູງ ທີ່ທ່ານປະທານສະພາແຫ່ງຊາດຣາຊະອານາຈັກກໍາປູເຈຍ ໄດ້ສະລະເວລາ ແລະ ອະນຸຍາດໃຫ້ ຄະນະສະມາຄົມມິດຕະພາບ ລາວ-ກໍາປູເຈຍ ເຂົ້າຢ້ຽມຂໍ່ານັບໃນໂອກາດມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງສະພາແຫ່ງຊາດກໍາປູເຈຍ ໃນຄັ້ງນີ້. ພ້ອມທັງຕີລາຄາສູງຕໍ່ການມາຢ້ຽມຢາມ ຂອງສົມເດັດ ຊຶ່ງເປັນການນໍາເອົາໄມຕີຈິດມິດຕະພາບທີ່ສະໜິດສະໜົມຂອງລັດຖະບານ, ສະພາແຫ່ງຊາດ ກໍຄື ປະຊາຊົນກຳປູ ເຈຍ ມາສູ່ລັດຖະບານ, ສະພາແຫ່ງຊາດ ກໍຄື ປະຊາຊົນລາວບັນດາເຜົ່າ, ທັງເປັນການປະກອບສ່ວນສຳຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ທີ່ມີມາແຕ່ດົນນານຖານບ້ານໃກ້ເຮືອນຄຽງ ແລະ ການ ພົວພັນແບບຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງສອງປະເທດ ກໍຄື ລະຫວ່າງ ສອງສະມາຄົມມິດຕະພາບລາວ ແລະ ກຳປູເຈຍ ໃຫ້ນັບມື້ນັບແໜ້ນແຟ້ນ ຍິ່ງໆຂຶ້ນ.
ສໍາລັບການເຄື່ອນໄຫວວຽກງານຂອງ ຄະນະສະມາຄົມມິດຕະພາບ ລາວ-ກໍາປູເຈຍ ແລະ ກໍາປູເຈຍ-ລາວ ກໍໄດ້ມີການປະສານສົມທົບ, ພົວພັນຮ່ວມມືນໍາກັນຢ່າງເປັນປົກກະຕິ ແລະ ຕໍ່ເນື່ອງຕະຫລອດມາ ຊຶ່ງສະແດງອອກ ມີການແລກປ່ຽນຢ້ຽມຢາມ, ການໄປມາຫາສູ່ ລະຫວ່າງ ສອງສະມາຄົມມິດຕະພາບ ລາວ-ກໍາປູເຈຍ ໃນຂັ້ນສູນກາງ ແລະ ທ້ອງຖິ່ນນຳກັນ, ການແລກປ່ຽນຂໍ້ມູນຂ່າວສານ, ການຊຸກຍູ້ ແລະ ສົ່ງເສີມສະໜັບສະໜູນການຮ່ວມມືດ້ານວຽກງານປ້ອງກັນຄວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍແດນ, ດ້ານເສດຖະກິດ-ການຄ້າ, ການລົງທຶນ, ທ່ອງທ່ຽວ, ສຶກສາ-ສາທາລະນະສຸກ ແລະ ອື່ນໆ ແນໃສ່ເພື່ອຜົນປະໂຫຍດ ຂອງປະເທດຊາດ ແລະ ປະຊາຊົນສອງຊາດລາວ-ກໍາປູເຈຍ. ສໍາລັບແຜນການເຄື່ອນໄຫວໃນຕໍ່ໜ້າ ໃນເດືອນຕຸລາ 2022 ທີ່ຈະມາເຖິງນີ້, ສະມາຄົມມິດຕະພາບລາວ-ກໍາປູເຈຍ ກໍໄດ້ມີການຮຽນເຊີນ ທ່ານ ພົນເອກ ນຽງພາດ ປະທານສະມາຄົມມິດຕະພາບກໍາປູເຈຍ-ລາວ ພ້ອມຄະນະ ມາຢ້ຽມຢາມ ສປປ ລາວ.
ໂອກາດດຽວກັນ, ສົມເດັດ ອັກຄະ ມະຫາ ໂປເຢຍ ຈັກກຣີ ເຮັງ ຊໍາຣິນ ກໍໄດ້ສະແດງຄວາມດີໃຈທີ່ເຫັນວ່າ ການພົວພັນຮ່ວມມືລະຫວ່າງສອງປະເທດ ກໍາປູເຈຍ-ລາວ-ກໍາປູເຈຍ ກໍຄື ສອງສະພາແຫ່ງຊາດ ແລະ ສອງສະມາຄົມມິດຕະພາບ ກໍາປູເຈຍ-ລາວ-ກໍາປູເຈຍ ສືບຕໍ່ເພີ່ມທະວີສາຍພົວພັນຄວາມສາມັກຄີຮ່ວມມືກັນຢ່າງເນື່ອງ.
ຂ່າວ-ພາບ: ຂັນໄຊ
