ໃນໂອກາດເຂົ້າຮ່ວມ ແລະ ໂອ້ລົມຕໍ່ກອງປະຊຸມສະຫຼຸບຕີລາຄາ ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານ 3 ສ້າງ ທົ່ວປະເທດ (2016-2021) ແລະ ທິດທາງຮອດປີ 2025, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ກ່າວບາງຕອນສໍາຄັນວ່າ: ໃນຊຸມປີຕໍ່ໜ້ານີ້, ພວກເຮົາຕ້ອງເດັດດ່ຽວສືບຕໍ່ຊີ້ນໍາການຈັດຕັ້ງປະຕິບັດແນວທາງ ທີ່ກໍານົດອອກໃນກອງປະຊຸມໃຫຍ່ ຄັ້ງທີ XI ຂອງພັກ ໃນການສືບຕໍ່ບູລະນະລະບອບປະຊາທິປະໄຕປະຊາຊົນ ໃຫ້ສົມບູນຍິ່ງຂຶ້ນ ໂດຍຖືເອົາການເຄົາລົບ ແລະ ເສີມຂະຫຍາຍສິດເປັນເຈົ້າ ຂອງປະຊາຊົນ, ອີງໃສ່ກໍາລັງແຮງ ຂອງປະຊາຊົນ ແລະ ຕ້ອງຖືການນໍາເອົາຜົນປະໂຫຍດ ແລະ ຄວາມສົມບູນພູນສຸກ ມາໃຫ້ປະຊາຊົນ ເປັນເປົ້າໝາຍສູງສຸດ ໃນການນໍາພາຂອງພັກເຮົາ. ບົນຈິດໃຈດັ່ງກ່າວນັ້ນ ຕ້ອງສືບຕໍ່ຢຶດໝັ້ນ ແລະ ຈັດຕັ້ງປະຕິບັດທິດນຳ, ຍຸດທະສາດ ກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງ ໃຫ້ເຂົ້າສູ່ລວງເລິກ ແລະ ມີປະສິດທິຜົນສູງຂຶ້ນກວ່ານີ້ ເປັນຫຼາຍເທົ່າ ຈຶ່ງສາມາດບັນລຸເປົ້າໝາຍ ທີ່ກອງປະຊຸມໃຫຍ່ ຄັ້ງທີ XI ຂອງພັກເຮົາວາງອອກໄດ້. ພັກເຮົາຢຶດໝັ້ນແນວທາງອັນສະເໝີຕົ້ນສະເໝີປາຍ “ເອົາປະຊາຊົນເປັນໃຈກາງ, ເອົາການພັດທະນາຊົນນະບົດ ລຶບລ້າງຄວາມທຸກຍາກ ເປັນເປົ້າໝາຍ”.
ບົນຈິດໃຈດັ່ງກ່າວ, ຂ້າພະເຈົ້າ ຂໍສະເໜີບາງຄຳເຫັນຕໍ່ກອງປະຊຸມ ທີ່ສຳຄັນຂອງພວກເຮົາ ດັ່ງນີ້:
ໜຶ່ງ, ກ່ຽວກັບວຽກງານກໍ່ສ້າງຮາກຖານການເມືອງ:
ຕາມບົດຮຽນ ຂອງພັກເຮົາ, ບັນດາສະຫາຍ ກໍໄດ້ຢືນຢັນຕື່ມແລ້ວວ່າອົງການຈັດຕັ້ງ, ທ້ອງຖິ່ນ ແລະ ພະນັກງານ ຫາກຕິດພັນກັບຮາກຖານຢ່າງແໜ້ນແຟ້ນ, ຮູ້ຖືເອົາປະຊາຊົນເປັນກົກ ແລະ ຮູ້ເຮັດເພື່ອຜົນປະໂຫຍດຂອງປະຊາຊົນແລ້ວ ຢູ່ບ່ອນນັ້ນ ແມ່ນໄດ້ຮັບການສະໜັບສະໜູນຈາກປະຊາຊົນ ແລະ ຮາກຖານ ກໍໜັກແໜ້ນຂຶ້ນເລື້ອຍໆ, ຂະບວນການຂອງມະຫາຊົນ ກໍຟົດຟື້ນ, ສ້າງໄດ້ພະນັກງານທີ່ເຕີບໃຫຍ່ໜັກແໜ້ນຂຶ້ນຈາກຂະບວນການຕົວຈິງ. ແຕ່ເວລາດຽວກັນ ພວກເຮົາຕ້ອງແກ້ສະພາບຄວາມຖືເບົາ, ຂາດຄວາມບໍ່ເປັນຫ່ວງເປັນໃຍເຖິງການປັບປຸງວຽກງານກໍ່ສ້າງຮາກຖານການເມືອງ ຊຶ່ງສະແດງອອກເຖິງການລົງຮາກຖານແບບລວມໆ, ເປັນແຕ່ຮູບການ, ບໍ່ກຳໄດ້ສະພາບ, ບໍ່ແກ້ໄດ້ບັນຫາ, ຖ້າແກ້ກໍພຽງແຕ່ລັກສະນະຕາບຈູນ; ປະທານ ໄກສອນ ພົມວິຫານ ເຄີຍເຕືອນແລ້ວວ່າ ໃນເງື່ອນໄຂພັກກຳອຳນາດ ຢ້ານພະນັກງານ, ສະມາຊິກພັກ ນັບທັງພະນັກງານຂັ້ນສູງຂອງເຮົາມີພະຍາດອາດຍາສິດ, ຂຸນເສິກ, ອວດອ້າງອຳນາດ, ອວດອົ່ງທະນົງຕົວ, ກ້າວໄປເຖິງການເສຍທາດຂາດຄຸນ… ຊຶ່ງຈະເຮັດໃຫ້ພັກຫ່າງເຫີນຈາກມະຫາຊົນ, ອັນນັ້ນ ແມ່ນອັນຕະລາຍໃຫຍ່ກວ່າໝູ່.
ສອງ, ກ່ຽວກັບການພັດທະນາຊົນນະບົດ:
ພັກເຮົາ ໄດ້ຖືຊົນນະບົດ ເປັນບັນຫາຍຸດທະສາດໃນພາລະກິດປະຕິວັດ; ພັດທະນາຊົນນະບົດ ແລະ ແກ້ໄຂຄວາມທຸກຍາກ ແມ່ນຍຸດທະສາດສໍາຄັນໃນການສ້າງຄວາມໝັ້ນຄົງ ໃຫ້ແກ່ລະບອບປະຊາທິປະໄຕ ປະຊາຊົນ, ປົວແປງຊີວິດການເປັນຢູ່ ແລະ ຍົກລະດັບຄຸນະພາບຊີວິດ ຂອງປະຊາຊົນຂຶ້ນເປັນລໍາດັບແຕ່ຮາກຖານຂຶ້ນມາ, ເນື້ອແທ້ແມ່ນການແກ້ບັນຫາກໍຄືການຫຼຸດຊ່ອງວ່າງ ຄວາມແຕກໂຕນໃນດ້ານການພັດທະນາ, ດ້ານຄວາມຈະເລີນລະຫວ່າງຕົວເມືອງກັບຊົນນະບົດ, ລະຫວ່າງ ທົ່ງພຽງກັບພູ ດອຍໃຫ້ຫຍັບເຂົ້າໃກ້ກັນ, ສ້າງຄວາມສະເໝີພາບ ແລະ ຄວາມຍຸຕິທໍາ ເຂົ້າເຖິງການພັດທະນາ ກໍຄືໄດ້ຮັບການຊົມໃຊ້ໝາກຜົນ ຂອງການພັດທະນາຢ່າງທົ່ວເຖິງ. ຖ້າຊົນນະບົດບໍ່ມີການພັດທະນາ, ບໍ່ມີການຫັນປ່ຽນຢ່າງເປັນຮູບປະທໍາ, ປະຊາຊົນບໍ່ທັນຫຼຸດພົ້ນຈາກຄວາມທຸກຍາກ, ໝາຍວ່າ ບ່ອນນັ້ນແມ່ນບົ່ງບອກເຖິງຄຸນນະພາບຂອງການນໍາພາຂອງພັກ, ຄວາມເອົາໃຈໃສ່ຕໍ່ໜ້າທີ່ຂອງອຳນາດການປົກຄອງ; ບ່ອນໃດເຫັນວ່າວຽກນີ້ບໍ່ໄປ, ບໍ່ມາ, ຍ້ຳເທົ້າ, ຖອຍຫຼັງ ຕ້ອງຊອກໃຫ້ເຫັນຄວາມຮັບຜິດຊອບຂອງຜູ້ນໍາພາຢູ່ບ່ອນນັ້ນ.
ສາມ, ກ່ຽວກັບວຽກງານ 3 ສ້າງ:
ໃນກອງປະຊຸມສູນກາງຫຼາຍໆຄັ້ງຜ່ານມາ, ມີການສະເໜີ ຫຼື ຍົກບັນຫາການແບ່ງຂັ້ນຄຸ້ມຄອງ ລະຫວ່າງສູນກາງ ແລະ ທ້ອງຖິ່ນ ຍັງບໍ່ທັນຈະແຈ້ງ, ບາງດ້ານແບ່ງຢູ່ໃນເຈ້ຍ-ສໍ, ແຕ່ການປະຕິບັດຕົວຈິງ ຍັງເຮັດບໍ່ທັນໄດ້, ເຮັດໃຫ້ທິດໃນການສ້າງຄວາມເຂັ້ມແຂງ, ຄວາມກ້າຮັບຜິດຊອບ ແລະ ຄວາມເປັນເຈົ້າ ໃຫ້ແກ່ທ້ອງຖິ່ນ-ຮາກຖານ, ສ່ວນກະຊວງ, ອົງການສູນກາງ ປະຕິບັດພາລະບົດບາດຄຸ້ມຄອງມະຫາພາກເປັນຕົ້ນຕໍ ນັ້ນ, ຍັງເຮັດບໍ່ທັນໄດ້ດີ.
ຕ້ອງມີການຈັດຕັ້ງສະຫຼຸບຖອດຖອນບົດຮຽນ ໃຫ້ເປັນປະຈຳໃນແຕ່ລະໄລຍະ ຂອງຂະບວນການວຽກງານຕົວຈິງ ເພື່ອຕິດຕາມ, ຊຸກຍູ້ວຽກງານດັ່ງກ່າວໃຫ້ແຂງແຮງ ແລະ ຕໍ່ເນື່ອງ. ສັດຈະທໍາ ໄດ້ຊີ້ບອກພວກເຮົາແລ້ວວ່າ “ຖ້າພວກເຮົາຢາກກິນໝາກ, ກິນຜົນທີ່ດີ ແຕ່ບໍ່ເລືອກແນວປູກ, ບໍ່ຮູ້ບົວລະບັດຮັກສາ ໃຫ້ມີຜົນລະປູກໃຫ້ຈະເລີນເຕີບໂຕ, ງອກງາມ, ແຂງແຮງ ແລະ ຂະຫຍາຍຕົວ, ມື້ໜຶ່ງຂ້າງໜ້າ ລໍາຕົ້ນ, ກິ່ງກ້ານ, ງ່າໃບ ກໍຈະຫ່ຽວແຫ້ງຕາຍໄປ ຖ້າຈະເອົາມາປຽບເໝືອນກັບການສ້າງຮາກຖານການເມືອງໄດ້ ເຊັ່ນດຽວກັນ”.
ກອງປະຊຸມດັ່ງກ່າວ ໄດ້ປິດລົງໃນວັນທີ 15 ກັນຍານີ້ ທີ່ຫ້ອງປະຊຸມຫ້ອງວ່າການສູນກາງພັກ, ໂດຍມີ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ, ມີບັນດາສະຫາຍ ກຳມະການກົມການເມືອງສູນກາງພັກ, ເລຂາຄະນະພັກກະຊວງ, ເລຂາຄະນະພັກແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
