ໃນວັນທີ 15 ກັນຍາ 2022 ຫ້ອງການບໍລິການສະຖານທູດ (ຫບສ), ກະຊວງການຕ່າງປະເທດ ໄດ້ຈັດກອງປະຊຸມສະຫລຸບຕີລາຄາການເຄື່ອນໄຫວວຽກງານຄຸ້ມຄອງພະນັກງານທ້ອງຖິ່ນ ທີ່ເຂົ້າເຮັດວຽກຢູ່ສຳນັກງານຕ່າງປະເທດ ແລະ ອົງການຈັດຕັ້ງສາກົນ ຢູ່ ສປປ ລາວ ໃນໄລຍະຜ່ານມາ ແລະ ທິດທາງແຜນການ ໃນຕໍ່ໜ້າ. ພາຍໃຕ້ການເປັນປະທານຂອງ ທ່ານ ຕິ່ງ ສຸກສັນ ຮອງລັດຖະມົນຕີກະຊວງການຕ່າງປະເທດ ແລະ ມີຕົວແທນທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.
ໃນກອງປະຊຸມ ຜຸ້ເຂົ້າຮ່ວມ ນອກຈາກໄດ້ຮັບຟັງບົດສະຫລຸບການເຄື່ອນໄຫວ ວຽກງານຄຸ້ມຄອງພະນັກງານທ້ອງຖິ່ນ ໃນໄລຍະຜ່ານມາ, ຍັງໄດ້ປຶກສາຫາລືບັນຫາຕ່າງໆຢ່າງກົງໄປກົງມາ ໂດຍສະເພາະສຸມໃສ່ຄົ້ນຄວ້າ ແລະ ປະກອບຄວາມຄິດຄວາມເຫັນ ໃສ່ການປັບປຸງດຳລັດສະບັບເລກທີ 456/ນຍ, ລົງວັນທີ 01 ພະຈິກ 2010 ດ້ວຍຄວາມເອົາໃຈໃສ່ ເພື່ອໃຫ້ສອດຄ່ອງກັບສະພາບເງື່ອນໄຂໃນປັດຈຸບັນ ກໍຄືແນວໂນ້ມໃນອະນາຄົດ, ກົນໄກການປະສານງານ ລະຫວ່າງ ສູນກາງ ແລະ ທ້ອງຖິ່ນ ບົນພື້ນຖານຫລັກ ການປະຕູດຽວ ໃຫ້ມີປະສິດທິພາບສູງຂຶ້ນກວ່າເກົ່າ ທັງເປັນການສົ່ງເສີມ, ຕິດຕາມ ແລະ ຄຸ້ມຄອງພະນັກ ງານທ້ອງຖິ່ນ ທີ່ເຮັດວຽກຢູ່ໃນສຳນັກງານຕ່າງປະເທດ ແລະ ອົງການຈັດຕັ້ງສາກົນຕ່າງໆ ໃຫ້ເປັນລະບົບ, ບໍ່ກະແຈກກະຈາຍ.
ທ່ານ ຕິ່ງ ສຸກສັນ ຍັງໄດ້ເນັ້ນເຖິງມາດຕະການໃນການ ຜັນຂະຫຍາຍເນື້ອໃນຈິດໃຈ ຂອງກອງປະຊຸມໃຫ້ເກີດດອກອອກຜົນເປັນຮູບປະທໍາທີ່ແທ້ຈິງ ໂດຍຖືເອົາກົນໄກການປະສານງານ ແລະລະບຸໜ່ວຍງານຮັບຜິດຊອບວຽກງານດັ່ງກ່າວ ໃຫ້ມີຄວາມກະຈ່າງແຈ້ງ ແລະ ປະຕິບັດວຽກງານຢ່າງມີປະສິດທິພາບ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
