ຕອນບ່າຍວັນທີ 14 ກັນຍາ 2022 ທີ່ສໍານັກງານນາຍົກລັດຖະມົນຕີ, ທ່ານ ພັນຄໍາ ວິພາວັນ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂອງ ສົມເດັດ ປີໄຈ ເສນາ ເຕຍບັນ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດແຫ່ງຣາຊະອານາຈັກກຳປູເຈຍ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 13-16ກັນຍາ 2022.
ທ່ານ ພັນຄໍາ ວິພາວັນ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຂົ້າຮ່ວມພົບປະສາມລັດຖະມົນຕີກະຊວງປ້ອງກັນປະເທດ ລາວ-ຫວຽດນາມ-ກຳປູເຈຍ, ເຂົ້າຮ່ວມພິທີຊ້ອມຮົບກອບກູ້-ກູ້ໄພສາມກອງທັບລາວ-ຫວຽດນາມ-ກຳປູເຈຍ ຂອງ ສົມເດັດ ປີໄຈ ເສນາ ເຕຍບັນ ພ້ອມດ້ວຍຄະນະໃນຄັ້ງນີ້, ເປັນການປະກອບສ່ວນສໍາຄັນ ໃນການເສີມຂະຫຍາຍສາຍພົວພັນຮ່ວມມືຂອງສອງປະເທດ ຖານບ້ານພີ່ເມືອງນ້ອງ ບ້ານແກ່ວເມືອງດອງ ໃຫ້ນັບມື້ແໜ້ນແຟ້ນຍິ່ງໆຂຶ້ນ ໂດຍສະເພາະ ແມ່ນການພົວພັນຮ່ວມມື ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ. ໄລຍະຜ່ານມາເຫັນວ່າ ການນໍາຂອງສອງປະເທດ ກໍໄດ້ມີການພົວພັນແລກປ່ຽນ ແລະ ຍົກສູງການພົວພັນຮ່ວມມື ຈົນເຮັດໃຫ້ມີຜົນສໍາເລັດຫລາຍດ້ານ ສະແດງອອກໃນການເດີນທາງເຄື່ອນໄຫວຢ້ຽມຢາມເຊິ່ງກັນ ແລະ ກັນ ລວມທັງ ການຮັກສາຄວາມສະຫງົບຕາມບໍລິເວນຊາຍແດນ, ການຄ້າຊາຍແດນ ແລະ ການໄປມາຫາສູ່ກັນຂອງປະຊາຊົນສອງປະເທດ. ໃນໂອກາດນີ້, ຕາງໜ້າໃຫ້ລັດຖະບານ ແລະ ປະຊາຊົນລາວບັນດາເຜົ່າ ທ່ານ ພັນຄໍາ ວິພາວັນ ຍັງໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຣາຊະອານາຈັກ ກຳປູເຈຍ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ຕະ ຫລອດມາ ລວມທັງໄລຍະທີ່ມີການລະບາດຂອງພະຍາດໂຄວິດ-19, ຖືໂອກາດນີ້, ຮຽກ ຮ້ອງໃຫ້ສອງກອງທັບ ລາວ-ກຳປູເຈຍ ຈົ່ງສືບຕໍ່ໃຫ້ການຮ່ວມມື, ໄປມາຫາສູ່, ຊ່ວຍເຫລືອ ແລະ ແລກປ່ຽນບົດຮຽນກັນໃຫ້ຫລາຍຂຶ້ນ ເພື່ອສ້າງຊາຍແດນລາວ-ກຳປູເຈຍ ໃຫ້ກາຍເປັນຊາຍແດນແຫ່ງ ມິດຕະພາບ, ມີຄວາມສະຫງົບສຸກ, ເຮັດໃຫ້ປະຊາຊົນສອງຊາດ ໄດ້ໄປ ມາຫາສູ່ກັນເປັນປົກກະຕິ, ອັນສໍາຄັນສອງກອງທັບ ຈະຕ້ອງໄດ້ສືບຕໍ່ເອົາໃຈໃສ່ເພີ່ມທະວີການພົວພັນຮ່ວມມື ແລະ ໃກ້ຊິດກັນຫລາຍຂຶ້ນ ເພື່ອເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີຖານບ້ານໃກ້ເຮືອນຄຽງທີ່ດີ ແລະ ການຮ່ວມມືຮອບດ້ານໝັ້ນຄົງຍາວນານຂອງສອງພັກ, ສອງລັດ ກໍຄືປະຊາຊົນສອງຊາດລາວ-ກຳປູເຈຍໃຫ້ເລິກເຊິ່ງ, ໜັກແໜ້ນຍິ່ງໆຂຶ້ນ. ໃນຕອນທ້າຍທ່ານນາຍົກລັດຖະມົນຕີ ຍັງໄດ້ຝາກຄວາມຢ້ຽມຢາມຖາມຂ່າວໄປຍັງ ສົມເດັດ ອັກຄະມະຫາບໍດີ ເຕໂຈ ຮຸນເຊນ ນາຍົກລັດຖະມົນຕີ ແຫ່ງຣາຊະອານາຈັກ ກຳປູເຈຍ ຕື່ມອີກ.
ໃນໂອກາດນີ້, ສົມເດັດ ປີໄຈ ເສນາ ເຕຍບັນ ພ້ອມດ້ວຍຄະນະ ກໍໄດ້ສະແດງຄວາມຂອບອົກຂອບໃຈຢ່າງຈິງໃຈ ມາຍັງທ່ານນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ ໃຫ້ການຕ້ອນຮັບໃນຄັ້ງນີ້, ພ້ອມທັງ ໄດ້ແຈ້ງຈຸດປະສົງ ແລະ ລາຍງານຜົນຂອງການພົບປະແລກປ່ຽນ ກັບກະຊວງປ້ອງກັນປະເທດຂອງລາວ ໃຫ້ທ່ານນາຍົກລັດຖະມົນຕີຮັບຊາບ ນໍາອີກ.
ຂ່າວ-ພາບ: ຫສນຍ
Medialaos MMD
