ພິທີເປີດໂຮງງານຜະລິດ ແລະ ຈໍາໜ່າຍແກັດເຈ້ຍເພື່ອບັນຈຸຜົນຜະລິດກະສິກໍາສົ່ງອອກຂອງບໍລິສັດ ສົ່ງເສີມການປູກພືດກະສິກໍາຄົບວົງຈອນ ຂາອອກ-ຂາເຂົ້າ ຈໍາກັດ ໄດ້ຈັດຂຶ້ນໃນວັນທີ 7 ກັນຍານີ້ ທີ່ບ້ານໂນນສະຫວັນ (ຫຼັກ 9) ເມືອງໄຊຍະບູລີ ແຂວງໄຊຍະບູລີ ເຂົ້າຮ່ວມໃນພິທີມີ ທ່ານ ພົງສະ ຫວັນ ສິດທະວົງ ເຈົ້າແຂວງໄຊຍະບູລີ, ມີການນໍາຂອງແຂວງ, ການນໍາຂອງເມືອງໄຊຍະບູລີ, ມີເຈົ້າເມືອງ 11 ເມືອງ ແລະ ນັກທຸລະກິດ, ຜູ້ປະກອບການທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ບົວວິນ ວົງສີ ຄະນະປະທານທີ່ປຶກສາ ບໍລິສັດ ສົ່ງເສີມການປູກພືດກະສິກໍາຄົບວົງຈອນ ຂາອອກ-ຂາເຂົ້າ ຈໍາກັດ ໄດ້ລາຍງານສະພາບການລົງທຶນ ແລະ ແຜນການດໍາເນີນກິດຈະກໍາຂອງໂຮງງານ, ໂຮງງານປະກອບມີ: ອາຄານຂອງໂຮງງານ 2 ຫຼັງ, ກໍ່ສ້າງຫ້ອງການ, ບຸກເບີກສະຖານທີ່, ປັບປຸງເສັ້ນທາງເຂົ້າ, ລະບົບໄຟຟ້າ, ຊື້ເຄື່ອງຈັກຕາມແຜນການຜະລິດ 4 ເຄື່ອງ, ລວມມູນຄ່າການກໍ່ສ້າງຕິດຕັ້ງ ແລະ ຈັດຊື້ວັດຖຸດິບເພື່ອຜະລິດເຈ້ຍທັງໝົດ 46,22 ຕື້ກວ່າກີບ, ສຳລັບສະມັດຖະພາບດ້ານການຜະລິດ ຖ້າໂຮງງານດຳເນີນການຜະລິດເຕັມສະມັດຖະພາບ 1 ເຄື່ອງຈັກ, 1 ຊົ່ວໂມງສາມາດຜະລິດເປັນກ່ອງແກັດເຈ້ຍໄດ້ 5.000 ກ່ອງຕໍ່ຊົ່ວໂມງ; ຖ້າປະກອບສຳເລັດ 4 ເຄື່ອງຈັກຕາມແຜນ 1 ຊົ່ວໂມງຈະໄດ້ປະມານ 20.000 ກ່ອງ; ເຄື່ອງຈັກສາມາດຜະລິດໄດ້ຕາມແຕ່ລະຂະໜາດຂອງລູກຄ້າຕ້ອງການໃນນີ້:ແກັດສຳລັບບັນຈຸໝາກໂມ ມີ 8 ຂະໜາດ; ກ່ອງບັນຈຸໝາກກ້ວຍ 8 ຂະໜາດ ຊຶ່ງໃນແຕ່ລະແກັດສາມາດປ້ຳໂລໂກ້, ຊື່ຂອງຜະລິດຕະພັນ, ແຫຼ່ງທີ່ມາຂອງຖານການຜະລິດໃສ່ແກັດເຈ້ຍຕາມລູກຄ້າຕ້ອງການ.
ນອກນີ້ທາງບໍລິສັດຍັງໄດ້ເນັ້ນການຕະຫຼາດໃນການຊຸກຍູ້ສົ່ງເສີມການປູກພືດກະສິກຳເພື່ອສົ່ງອອກ ໂດຍມີຫຼາຍຜະລິດຕະພັນທີ່ຈະສະໜອງ ແລະ ຈຳໜ່າຍວັດສະດຸຮັບໃຊ້ໃຫ້ແກ່ການຜະລິດ ເພື່ອສະໜອງໃຫ້ນັກລົງທຶນພາຍໃນ ແລະ ຕ່າງປະເທດທີ່ມີຄວາມຕ້ອງການ ເປັນຕົ້ນແມ່ນ: ສະໜອງຜ້າຢາງ, ລະບົບທໍ່ສົ່ງ ນ້ຳ, ລະບົບຝຸ່ນປຸ໋ຍ ແລະ ວິຕາມິນບຳລຸງພືດ ແລະ ອຶ່ນໆອີກ ຕາມຄວາມຕ້ອງການຂອງລູກຄ້າ, ບໍລິສັດສົ່ງເສີມການປູກພືດກະສິກຳ ຄົບວົງຈອນ ໄຊຍະບູລີ ຂາອອກ-ຂາເຂົ້າຈຳກັດ ແມ່ນນອນຢູ່ໃນຮູບແບບການຮ່ວມຫຸ້ນຂອງນັກທຸລະກິດລາວພາຍໃນແຂວງໄຊຍະບູລີ ຮ່ວມທຶນກັບຕ່າງປະເທດ ແລະ ແມ່ນບໍລິສັດລົງທຶນເອກະຊົນ 100%,
ຂ່າວ-ພາບ: ອຸ່ນເຮືອນ ໂພທິລັກ
