ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ວັນທີ 6 ກັນຍາ 2022 ນີ້, ທ່ານ ສົມນິດ ໄຊທະວົງສິດ ຮອງເຈົ້າເມືອງຜາອຸດົມ, ຜູ້ຊີ້ນໍາວຽກງານໄພພິບັດຂັ້ນເມືອງ ພ້ອມດ້ວຍຄະນະກໍາມະການໄພພິບັດ ແລະ ວິຊາການກ່ຽວຂ້ອງ ລົງຕິດຕາມຊຸກຍູ້ການສ້ອມ ແປງທາງສຸກເສິີນໃນໄລຍະລະດູຝົນ ທີ່ຈຸດບ້ານປາກຫາດ ຫາ ເທສະບານເມືອງຜາອຸດົມ. ພ້ອມທັງ ມີຄໍາເຫັນແລກປ່ຽນກັບຜູ້ຕາງໜ້າ ບໍລິສັດຍີງທະວີຊັບ ກໍ່ສ້າງ ແລະ ສ້ອມແປງຂົວ-ທາງ ຈໍາກັດ ທີ່ເປັນຜູ້ຮັບເໝົາ ສ້ອມແປງທາງສຸກເສີນ ໃຫ້ມີການປະສານ ສົມທົບກັບຫ້ອງການກ່ຽວຂ້ອງ ເພື່ອໃຫ້ມີຄວາມເອກະພາບທາງດ້ານເຕັກນິກວິຊາການ ຢ່າງຖືກຕ້ອງ ໂດຍ ເນັ້ນຄຸນນະພາບ ແລະ ມາດຕະຖານທາງດ້ານເຕັກນິກ ເປັນຫລັກ.
ໂອກາດນີ້, ທ່ານ ທອງພັນ ຫລວງລືໄຊ ຫົວໜ້າຫ້ອງການໂຍທາທິການ ແລະຂົນ ສົ່ງເມືອງຜາອຸດົມ ໄດ້ໃຫ້ຮູ້ວ່າ: ເສັ້ນທາງດັ່ງກ່າວເປັນທາງນໍ້າເບີ 2201 ເລີ່ມແຕ່ເມືອງປາກທາ ຫາ ເທສະບານ ເມືອງຜາອຸດົມ ມີຄວາມຍາວ 30.25 ກິໂລແມັດ ເປັນເສັ້ນທາງທີ່ຢູ່ໃນໂຄງການປູຢາງ 2 ຊັ້ນ ຂອງລັດຖະບານ. ການສ້ອມແປງທາງໃນຄັ້ງນີ້ ເປັນການສ້ອມແປງທາງສຸກເສີນໃນໄລຍະລະດູຝົນ ໃນນີ້, ໜ້າວຽກການຈັດຕັ້ງປະຕິບັດແມ່ນ ຈົກດິນ-ປັບແປງດິນໜ້າທາງ, ຈົກຮ່ອງລະບາຍນໍ້າ, ອະນາໄມທໍ່ລະບາຍນໍ້າ, ຖົມແຮ່ ຫລື ຫີນກ້ອນໃຫຍ່, ມາຮອດປັດຈຸບັນ, ບັນດາໜ້າວຽກແມ່ນ ສໍາເລັດ 15%.
ການສ້ອມແປງທາງສຸກເສີນໃນໄລຍະລະດູຝົນ ນີ້, ກໍເພື່ອເປັນການແກ້ໄຂສຸກເສີນເສັ້ນທາງດັ່ງກ່າວທີ່ເປ່ເພຫລາຍຈຸດ ເຊິ່ງມີຄວາມຫຍຸ້ງຍາກໃນການສັນຈອນໄປ-ມາ ລະ ຫວ່າງ ບ້ານຫາບ້ານ, ບ້ານຫາເຂດເທສະບານເມືອງ ແລະ ແຕ່ເມືອງ ຫາແຂວງ ໃຫ້ມີຄວາມສະດວກ ສະບາຍ ຂັ້ນພື້ນຖານ, ທັງເປັນການສ້າງຂະບວນການ ຂໍ່ານັບຮັບຕ້ອນກອງປະຊຸມກາງສະໄໝ ຂອງອົງຄະນະພັກເມືອງຜາອຸດົມ ຄັ້ງທີ XII ທີ່ຈະໄຂຂຶ້ນໃນມໍ່ໆນີ້.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
