ໃນລະຫວ່າງວັນທີ 27 ສິງຫາ – 05 ກັນຍາ ຜ່ານມານີ້, ຄະນະສິລະປະກອນກອງທັບປະຊາຊົນລາວ ນຳໂດຍສະຫາຍ ພັນເອກ ແກ້ວສຸວັນ ຜາງພິລາວົງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີສະຫາຍ ພັນເອກ ຄໍາພາ ດວງພະຈັນ ຫົວໜ້າການທະຫານກອງສິລະປະກອນກອງທັບປະຊາຊົນລາວ. ໄດ້ສຳເລັດການເຄື່ອນໄຫວຢ້ຽມຢາມ ແລະ ສະແດງມິດຕະພາບຢູ່ ສສ ຫວຽດນາມ. ເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ. ຫວຽດນາມ-ລາວ 2022. ເຊີ່ງເປັນວັນປະຫວັດສາດທີ່ສຳຄັນຂອງສອງປະເທດລາວ-ຫວຽດນາມກໍ່ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05 ກັນຍາ 1962 ຫາ 05 ກັນຍາ 2022) ແລະ ວັນເຊັນສົນທິສັນຍາ ແລະ ການຮ່ວມມືຮອບດ້ານ ຄົບຮອບ 45 ປີ ( 18 ກໍລະກົດ 1977 ຫາ 18 ກໍລະກົດ 2022).
ໃນການເຄື່ອນໄຫວຢ້ຽມຢາມ ແລະ ສະແດງມິດຕະພາບຢູ່ ສສ ຫວຽດນາມຂອງຄະນະສິລະປະກອນກອງທັບປະຊາຊົນລາວໃນຄັ້ງນີ້ ສະຫາຍ ພັນເອກ ແກ້ວສຸວັນ ຜາງພິລາວົງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ການນຳກອງທັບປະຊາຊົນຫວຽດນາມ ແລະ ບັນດາກົມກອງຕ່າງໆ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສຸດທີ່ມີຄວາມໝາຍສຳຄັນເປັນການປະກອບສ່ວນເຂົ້າໃນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ. ຫວຽດນາມ-ລາວ 2022 ໃຫ້ມີບັນຍາກາດເບີກບານມ່ວນຊື່ນ ແລະ ມີຄວາມໝາຍເລີກເຊີງ ທັງເປັນການປຸກລະດົມກຳລັງໃຈໃຫ້ນາຍ ແລະ ພົນທະຫານໃຫ້ມີຄວາມຫ້າວຫັນໃນການຈັດຕັ້ງປະຕິບັດໜ້າທີ່ວຽກງານ, ພ້ອມກັນນັ້ນຍັງເປັນການແລກປ່ຽນວັດທະນະທໍາ, ຮີດຄອງປະເພນີອັນດີງາມລະຫວ່າງສອງຊາດ – ສອງກອງທັບ ລາວ-ຫວຽດນາມ. ໂອກາດນີ້ ຄະນະສິລະປະກອນກອງທັບປະຊາຊົນລາວ ຍັງໄດ້ເຂົ້າພົບປະແລກປ່ຽນ ແລະ ເຄື່ອນໄຫວສະແດງມິດຕະພາບຢູ່ບັນດາກົມກອງຕ່າງໆຄື: ໂຮງຮຽນນາຍທະຫານການເມືອງກອງທັບປະຊາຊົນຫວຽດນາມ, ສະໂມສອນກາງແຈ້ງກອງພັນໃຫຍ່ 50 ກອງບັນຊາການທະຫານເຂດ 3. ນະຄອນຫາຍຟອງ, ກອງພັນ 170 ທະຫານເຮືອເຂດ 1 ແຂວງກວ້າງນິງ ແລະ ສະໂມສອນກອງບັນຊາການທະຫານເຂດ 4 ແຂວງເຫງະອານ ສສ ຫວຽດນາມ.
ສຳລັບລາຍການສະແດງໃນຄັ້ງນີ້ ລວມມີ 13 ລາຍການ: ພາຍໃຕ້ຫົວຂໍ້ ”ສາຍສຳພັນບໍ່ມີວັນຈາງຫາຍ” ໃນນີ້ມີບົດເພງຫວຽດນາມ ຈຳນວນ 5 ບົດ, ສ່ວນຮູບການສະແດງມີ: ດົນຕີ, ຮ້ອງເພງ, ຂັບລຳ ແລະ ຟ້ອນ. ແລະ ແບ່ງອອກເປັນ 3 ພາກ: ພາກທີ 1: ມູນເຊື້ອຄວາມສາມັກຄີຮ່ວມືລະຫວ່າງສອງປະເທດ, ສອງກອງທັບລາວ-ຫວຽດນາມ, ພາກທີ 2: ຍ້ອງຍໍຜົນສຳເລັດການພັດທະນາຄວາມເຂັ້ມແຂງຂອງກອງທັບໃນການປະຕິບັດສອງໜ້າທີ່ຍຸດທະຍາດປົກປັກຮັກສາ ແລະ ສ້າງສາປະເທດຊາດ, ພາກທີ 3: ຫັດແໜ້ນຄວາມສາມັກຄີ ແລະ ມິດຕະພາບຂອງລາວ-ຫວຽດນາມໃຫ້ໝັ້ນຄົງຢືນຍົງຕະຫຼອດໄປ. ເຊິ່ງເນື້ອໃນຂອງການສະແດງນີ້ລ້ວນແລ້ວແຕ່ສະແດງໃຫ້ເຫັນນ້ຳໃຈຄວາມສາມັກຄີ, ມິດຕະພາບອັນເປັນມູນເຊຶ້ອລະຫວ່າງສອງຊາດ ລາວ-ຫວຽດນາມ ທັງເປັນການໂຄສະນາເຜີຍແຜ່ສີສັນສີລະປະການສະແດງ ແລະ ວິຖີຊີວິດວັດທະນະທຳອັນດີງາມຂອງປະຊາຊົນລາວບັນດາເຜົ່າ. ເຊິ່ງເຮັດໃຫ້ບັນຍາກາດເຕັມໄປດ້ວຍຄວາມເບີກບານມ່ວນຊື່ນປະກອບກັບສຽງຕົບມືຍ້ອງຍໍຊົມເຊີຍ ແລະ ໄດ້ຮັບຄວາມປະທັບໃຈຈາກຜູ້ຊົມເປັນຢ່າງດີ.
ເວົ້າລວມ-ເວົ້າສະເພາະກໍ່ຄືການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022. ເຊີ່ງເປັນວັນປະຫວັດສາດທີ່ສຳຄັນຂອງສອງປະເທດລາວ-ຫວຽດນາມ. ໃຫ້ເຕັມໄປດ້ວຍບັນຍາກາດເບີກບານມ່ວນຊື່ນ, ມີໄມຕິຈິດມິດຕະພາບ, ຄວາມສາມັກຄີອັນດູດດື່ມຖານເພື່ອນມິດອ້າຍນ້ອງ ແລະ ຄວາມຮັກແພງສາມັກຄີພິເສດ. ຍັງເປັນການສືບຕໍ່ຮັດແໜ້ນຄວາມສາມັກຄີມິດຕະພາບລະຫວ່າງລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງແໜ້ນແຟ້ນຍິ່ງໆຂຶ້ນ. ພາຍຫຼັງສຳເລັດການເຄື່ອນໄຫວສະແດງມິດຕະພາບ ຢູ່ບັນດາກົມກອງຕ່າງໆ ແລ້ວ ຄະນະສິລະປະກອນກອງທັບປະຊາຊົນລາວ ຍັງໄດ້ທ່ຽວຊົມຫໍພິພິທະພັນປະຫວັດສາດການທະຫານ ສສ ຫວຽດນາມ, ທ່ຽວຊົມຫໍພິພິທະພັນຂອງແຂວງກວ້າງນິງ ແລະ ທ່ຽວຊົມສະຖານທີ່ທ່ອງທ່ຽວຕ່າງໆ ຕື່ມອີກກ່ອນຈະເດີນທາງກັບຄືນປະເທດ.
ພາບ-ຂ່າວ: ທອງມາ ໄຊຍະເພັງສາ
