ຫຼັກສູດຊັ້ນປະຖົມສຶກສາປີທີ 4 ຫຼື ປ.4 ສະບັບປັບປຸງໃໝ່ ແມ່ນຈະເລີ່ມພັດທະນາໃນຕົ້ນເດືອນກັນຍານີ້ເປັນຕົ້ນໄປ ເພາະວຽກງານການພັດທະນາຫຼັກສູດ ແມ່ນເປັນວຽກງານທີ່ລັດຖະບານ ກໍຄື ກະຊວງສຶກສາທິການ ແລະ ກິລາ ໃຫ້ຄວາມສຳຄັນເປັນອັນດັບຕົ້ນຕໍ ເນື່ອງຈາກການຮູ້ໜັງສື ແມ່ນທັກສະໜຶ່ງທີ່ສໍາຄັນທີ່ສຸດ ເມື່ອຄຳນຶງເຖິງການເຕີບໂຕຂອງບຸກຄົນ, ວັດທະນະທໍາ ແລະ ການພັດທະນາ, ຊຶ່ງມັນເປັນພື້ນຖານສໍາລັບການຮຽນຮູ້ທັງໝົດຢູ່ໃນໂຮງຮຽນ ແລະ ໃນຊີວິດ. ໃນຂອບເຂດທີ່ກວ້າງ, ອັດຕາການຮູ້ໜັງສືສູງ ໄດ້ປະກອບສ່ວນສົ່ງເສີມການເຕີບໂຕທາງເສດຖະກິດ ແລະ ການພັດທະນາຂອງປະເທດຊາດ
ອີງຕາມການລາຍງານຂອງແຜນງານບີຄວາ ເມື່ອວັນທີ 5 ກັນຍາ 2022 ໃຫ້ຊາບວ່າ: ເນື່ອງໃນໂອກາດວັນຮູ້ໜັງສືສາກົນ (ວັນທີ 8 ກັນຍາ), ລັດຖະບານອົດສະຕຣາລີ ແລະ ກະຊວງສຶກສາທິການ ແລະ ກິລາ ໄດ້ຮັບຮູ້ເຖິງຄວາມສໍາຄັນຂອງການຮູ້ໜັງສືໃນທຸກຊຸມຊົນທ້ອງຖິ່ນ, ຊຶ່ງນັບແຕ່ປີ 2015 ເປັນຕົ້ນມາ, ກະຊວງສຶກສາທິການ ແລະ ກິລາ ສປປ ລາວ ໄດ້ຮ່ວມມືກັບລັດຖະບານອົດສະຕຣາລີ ໂດຍຜ່ານແຜນງານບີຄວາ ສົ່ງເສີມການປັບປຸງຜົນການຮຽນໃຫ້ແກ່ເດັກຍິງ ແລະ ເດັກຊາຍ ໃນເກນອາຍຸເຂົ້າຮຽນຊັ້ນປະຖົມ ໂດຍສະເພາະເດັກທີ່ດ້ອຍໂອກາດ. ພ້ອມກັນນັ້ນ, ພວກເຂົາກໍກຳລັງພັດທະນາຫຼັກສູດປະຖົມສະບັບປັບປຸງໃໝ່ ແລະ ຝຶກອົບຮົມຄູປະຖົມໃນການສອນແບບປະຕິບັດຕົວຈິງ, ໂດຍໄດ້ເນັ້ນໜັກໃສ່ການສ້າງທັກສະການຮູ້ໜັງສືຂອງເດັກ.
ຫຼັກສູດຊັ້ນປະຖົມສະບັບປັບປຸງໃໝ່ ໄດ້ເລີ່ມນຳໃຊ້ຢ່າງຕໍ່ເນື່ອງເຂົ້າໃນໂຮງຮຽນໃນແຕ່ລະປີນັບແຕ່ປີ 2019 ເປັນຕົ້ນມາ. ວົງຈອນປະຈຳປີຂອງການພັດທະນາຫຼັກສູດ, ການຜະລິດ, ການແຈກຍາຍປຶ້ມແບບຮຽນ ແລະ ການຝຶກອົບຮົມຄູໃນທົ່ວປະເທດ ແມ່ນໄດ້ຮັບການຮັກສາໄວ້ຢ່າງປະສົບສຳເລັດຜົນ ເຖິງວ່າຈະມີສິ່ງທ້າທາຍຈາກວິກິດການ ໂຄວິດ-19 ກໍຕາມ. ນັກຂຽນຫຼັກສູດ ສສກ ໄດ້ເຮັດວຽກຢ່າງໜັກ ເພື່ອຊອກຫາວິທີໃຫ້ວຽກງານສາມາດດຳເນີນມີຄວາມຄືບໜ້າ ໃນທາມກາງການລັອກດາວ ແລະ ການປະຕິບັດຫຼັກສູດ ປ.4 ໃໝ່ ແມ່ນຈະຢູ່ໃນແຜນທີ່ຈະເລີ່ມຕົ້ນເດືອນກັນຍານີ້.
ໃນແຕ່ລະປີ ຫຼັກສູດຊັ້ນປະຖົມສະບັບປັບປຸງໃໝ່ໄດ້ເລີ່ມນຳໃຊ້ທຸກປີ ນັບແຕ່ປີ 2019 ເປັນຕົ້ນມາ. ຮອບວຽນການພັດທະ ນາຫຼັກສູດແຕ່ລະປີ, ການຜະລິດ, ການແຈກຍາຍປຶ້ມແບບຮຽນ ແລະ ການຝຶກອົບຮົມຄູໃນທົ່ວປະເທດແມ່ນໄດ້ຖືກປະຕິບັດຢ່າງຕໍ່ເນື່ອງ ເຖິງວ່າຈະມີສິ່ງທ້າທາຍຈາກການແຜ່ລະບາດຂອງ ພະຍາດໂຄວິດ-19 ກໍຕາມ. ນັກຂຽນພັດທະນາຫຼັກສູດຂອງ ສສກ ໄດ້ທຸ້ມເທ ເພື່ອຊອກຫາວິທີໃຫ້ວຽກງານສາມາດດຳເນີນວຽກງານໃຫ້ມີຄວາມຄືບໜ້າ ໃນທາມກາງການຈຳກັດການເດີນທາງ. ສະເພາະການສອນຂອງຫຼັກສູດ ປ.4 ສະບັບປັບປຸງໃໝ່ ແມ່ນຈະຢູ່ໃນແຜນທີ່ຈະເລີ່ມຕົ້ນເດືອນກັນຍານີ້.
ມາຮອດປັດຈຸບັນ, ສສກ ໂດຍໄດ້ຮັບການສະໜັບສະໜູນຈາກປະເທດອົດສະຕຣາລີ ໄດ້ພັດທະນາ ແລະ ແຈກຢາຍປຶ້ມແບບຮຽນວິຊາພາສາລາວ ປ.1, ປ.2, ປ.3 ແລະ ປ.4 ສະບັບປັບປຸງໃໝ່ໃຫ້ແກ່ນັກຮຽນຈຳນວນ 490.937 ຄົນ (ຍິງ 48%) ແລະ ຄູສອນ ແລະ ຜູ້ອຳນວຍການທີ່ສອນນຳ ຈຳນວນ 27.267 ຄົນ (ຍິງ 51%). ຄູສອນ ປ.1 ແລະ ປ.2 ຍັງໄດ້ຮັບຊຸດປຶ້ມອ່ານເສີມ ແລະ ປຶ້ມນິທານ, ພ້ອມດ້ວຍແນວຄວາມຄິດຈຳນວນໜຶ່ງສຳລັບກິດຈະກຳທີ່ໜ້າສົນໃຈ ເພື່ອປະກອບເຂົ້າໃນນິທານ. ຄູບາງຄົນບໍ່ທັນຄຸ້ນເຄີຍກັບການອ່ານປຶ້ມໃຫ້ເດັກນ້ອຍຢູ່ໃນຫ້ອງຮຽນ ແຕ່ກະຕືລືລົ້ນທີ່ຈະຮຽນຮູ້ການໃຊ້ປຶ້ມນິທານ ເພື່ອປັບປຸງການປະຕິບັດການສອນຂອງພວກເຂົາ. ປຶ້ມນິທານມີຄວາມສຳຄັນຕໍ່ເດັກນ້ອຍ ແລະ ຄູສອນ ຊຶ່ງມັນບໍ່ພຽງແຕ່ເຮັດໃຫ້ເດັກຮູ້ສຶກມ່ວນ ແຕ່ຍັງກະຕຸ້ນຈິນຕະນາການ ແລະ ການພັດທະນາດ້ານພາສາຂອງພວກເຂົາ, ເພີ່ມຄວາມຮູ້ຂອງພວກເຂົາ ແລະ ໃຫ້ຄໍາແນະນໍາດ້ານສິນທໍາ. ປຶ້ມນິທານຍັງສາມາດສົ່ງເສີມຄວາມຄິດຂອງເດັກນ້ອຍກ່ຽວກັບວິທີການຈັດການກັບບັນຫາທີ່ພວກເຂົາກໍາລັງປະເຊີນ.
ຫຼັກສູດພາສາລາວ ປ.4 ຈະສືບຕໍ່ສະໜັບສະໜູນນັກຮຽນໃຫ້ພັດທະນາທັກສະພາສາລາວໃນດ້ານການຟັງ, ເວົ້າ, ອ່ານ ແລະ ຂຽນ ໂດຍຜ່ານວິທີການຮຽນແບບປະຕິບັດຕົວຈິງ. ບົດຮຽນໄດ້ຖືກຈັດລຽງຕາມຫົວຂໍ້ທີ່ເປັນແນວທາງດຽວກັນທີ່ກ່ຽວຂ້ອງ ແລະ ການຮຽນຮູ້ແບບມີສ່ວນຮ່ວມຂອງນັກຮຽນ, ຫົວຂໍ້ໜຶ່ງແມ່ນຈະມີສອງບົດຮຽນ ເພື່ອໃຫ້ນັກຮຽນມີໂອກາດໃນການລົງເລິກດ້ານຄວາມຄິດຂອງພວກເຂົາ ແລະ ສ້າງພາສາທີ່ກ່ຽວຂ້ອງກັບຫົວຂໍ້ນັ້ນ, ຄໍາຖາມຊີ້ນໍາໃນແຕ່ລະບົດຮຽນແມ່ນຈະຊ່ວຍເນັ້ນໜັກໃນຫົວຂໍ້ ແລະ ຊຸກຍູ້ໃຫ້ນັກຮຽນມີການພັດທະນາ ແລະ ສະແດງຄວາມຄິດຂອງຕົນເອງ.
ໂດຍຜ່ານແຜນງານບີຄວາ, ລັດຖະບານອົດສະຕຣາລີ ພູມໃຈທີ່ໄດ້ສະໜັບສະໜູນກະຊວງສຶກສາທິການ ແລະ ກິລາ ສປປ ລາວ ເພື່ອປັບປຸງການຮູ້ໜັງສືໄປສູ່ອະນາຄົດທີ່ສົດໃສກວ່າເກົ່າຂອງເດັກຍິງ ແລະ ເດັກຊາຍທຸກຄົນ.
(ໂດຍ ແຜນງານບີຄວາ)
