ວິທະຍຸກະຈາຍສຽງຫວຽດນາມລາຍງານວ່າ: ວັນທີ 1 ກັນຍາ ຜ່ານມາ, ຢູ່ແຂວງ ກວາງນິງ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເຂົ້າຮ່ວມພິທີເປີດນຳໃຊ້ເສັ້ນທາງຄວາມໄວສູງ ເວິນໂດນ – ມອງກາຍ, ແຂວງ ກວາງນິງ. ໂຄງການມີລວງຍາວກວ່າ 80 ກິໂລແມັດ, ລະດັບຄວາມໄວແມ່ນ 120 ກິໂລແມັດ/ຊົ່ວໂມງ ອັນໄດ້ຊ່ວຍຫຼຸດເວລາການເດີນທາງແຕ່ ນະຄອນຫຼວງ ຮ່າໂນ້ຍ ໄປຍັງ ນະຄອນ ມອງກາຍ ລົງເຫຼືອພຽງແຕ່ 3 ຊົ່ວໂມງ, ສ້າງຂົງເຂດພັດທະນາໃໝ່ໃຫ້ແກ່ແຂວງກວາງນິງ ແລະ ທົ່ວເຂດທົ່ງພຽງແມ່ນ້ຳແດງທາງພາກເໜືອ ຫວຽດນາມ.
ກ່າວຄຳເຫັນໃນພິທີ, ທ່ານ ຟ້າມມິງຈິງ ໄດ້ຢັ້ງຢືນວ່າ: ການກໍ່ສ້າງສຳເລັດເສັ້ນທາງຄວາມໄວສູງແມ່ນເພື່ອເຊື່ອມຕໍ່ເຂດທີ່ມີຄວາມໝາຍສຳຄັນ, ປະຕິບັດແຜນນະໂຍບາຍ, ແນວທາງຂອງພັກ, ລັດ ກ່ຽວກັບການພັດທະນາພື້ນທາງໂຄງລ່າງຄົມມະນາຄົມ, ເປັນຕົ້ນແມ່ນ ກໍ່ສ້າງລະບົບເສັ້ນທາງຄວາມໄວສູງ, ປະກອບສ່ວນເຂົ້າໃນການແກ້ໄຂບັນດາຈຸດອຸດຕັນ ກ່ຽວກັບການຄົມມະນາຄົມ. ທ່ານສະເໜີໃຫ້ແຂວງກວາງນິງ ສືບຕໍ່ເສີມຂະຫຍາຍ ແລະ ທະວີຄູນບັນດາຮູບແບບ, ວິທີການ ເພື່ອລະດົມແຫຼ່ງເງິນລົງທຶນ ເພື່ອໃຫ້ນັບມື້ນັບປະຕິບັດສຳເລັດລະບົບໂຄງປະກອບພື້ນຖານໂຄງລ່າງ ໃນບໍລິເວນແຂວງ, ພ້ອມທັງສົ່ງເສີມບັນດາວິສາຫະກິດສືບຕໍ່ສົມທົບກັນ, ຮ່ວມແຮງຮ່ວມໃຈກັບທ້ອງຖິ່ນໃນພາລະກິດແຫ່ງການສ້າງສາ ແລະ ພັດທະນາປະເທດຊາດ.
