ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ກອງປະຊຸມກ່ຽວກັບການເກັບຄ່າບໍລິການຂົນສົ່ງທາງເຮືອບັກ, ເຮືອໂດຍສານ, ພາຫະນະເຂົ້າ-ອອກດ່ານສາກົນປາກຊັນ-ບຶງການ ຈັດຂຶ້ນທ້າຍເດືອນສິງຫາ ຜ່ານມາ, ໂດຍມີ ທ່ານ ສົມໃຈ ແກ້ວສຸວັນ ຮອງຫົວໜ້າຫ້ອງວ່າການແຂວງບໍລິຄໍາໄຊ, ທ່ານ ສົມຫວັງ ອາລີເອື້ອ ຫົວໜ້າສໍານັກງານຈັງຫວັດບຶງການ ຣາຊະອານາຈັກໄທ, ມີພາກສ່ວນກ່ຽວຂ້ອງສອງຝ່າຍ ເຂົ້າຮ່ວມ.
ກອງປະຊຸມ, ໄດ້ປືກສາຫາລື ແລະ ແລກປ່ຽນຄໍາຄິດ-ຄໍາເຫັນ ກ່ຽວກັບວຽກງານການເກັບຄ່າບໍລິການຂົນສົ່ງທາງເຮືອບັກ, ເຮືອໂດຍສານ, ພາຫະນະເຂົ້າ-ອອກດ່ານສາກົນປາກຊັນ-ບຶງການ, ໄດ້ຮັບຟັງການທົບທວນຄືນ ຜົນການຈັດຕັ້ງປະຕິບັດເນື້ອໃນບົດບັນທຶກກອງປະຊຸມ ຄັ້ງວັນທີ 27 ມັງກອນ 2014 ເຊິ່ງໄລຍະຜ່ານມາ ເຫັນວ່າທັງສອງຝ່າຍໄດ້ມີຄວາມພະຍາຍາມຢ່າງຕັ້ງໜ້າ ໃນການຈັດຕັ້ງປະຕິບັດຫລາຍວຽກງານສໍາຄັນ ໂດຍພື້ນ ຖານແມ່ນໄດ້ຮັບໝາກຜົນທີ່ດີ. ພ້ອມນີ້, ສອງຝ່າຍ ຍັງໄດ້ເຫັນດີເປັນເອກະພາບ ໃນການປັບປຸງງບາງເນື້ອໃນຄື: ກໍານົດການບໍລິການຂົນສົ່ງເຮືອບັກ-ເຮືອໂດຍສານ ໃນໂມງລັດຖະການແມ່ນເປັນເອກະພາບກັນ ເວລາເຮັດວຽກເລີ່ມແຕ່ 8:00-16:30 ໂມງ, ລ່ວງເວລານອກໂມງລັດຖະການ 16:30-18:00ໂມງ, ວັນເສົາ-ວັນອາທິດ ແລະ ວັນພັກລັດຖະການ ຂອງແຕ່ລະຝ່າຍໄດ້ກໍານົດ ຖືວ່າເປັນການລ່ວງເວລາ ເລີ່ມແຕ່ 8:00-18:00 ໂມງ, ຄ່າບໍລິການລ່ວງເວລາ ໃຫ້ປະຕິບັດຕາມລະບຽບຂອງແຕ່ລະຝ່າຍກໍານົດ ໂດຍການເຫັນດີ ຂອງຜູ້ປະກອບການຂົນສົ່ງເຮືອບັກ ແຂວງບໍລິຄຳໄຊ ແລະ ຜູ້ປະກອບການຂົນສົ່ງເຮືອບັກ ຈັງຫວັດບຶງການ ເປັນເອກະພາບກັນກ່ຽວກັບ ການເກັບຄ່າບໍລິການຂົນສົ່ງພາຫະນະ (ເຮືອບັກ), ຄ່າບໍລິການຂົນສົ່ງ ຜູ້ໂດຍສານ (ເຮືອໂດຍສານ), ເພື່ອເປັນການປະຢັດຕົ້ນທຶນໃນການຂົນສົ່ງ ຝ່າຍຈັງຫວັດບຶງການ ເຫັນດີເປີດນໍາໃຊ້ທ່າເຮືອ ວົງນິມິດ ເພື່ອໃຫ້ລົດຂົນສົ່ງສິນຄ້າ ສາມາດເຂົ້າ-ອອກໄດ້ຄືກັນກັບທ່າເຮືອສຸລະກາກອນ ຈັງຫັວດບຶງການ, ແຕ່ຕ້ອງໄດ້ກະກຽມຄວາມພ້ອມກ່ອນ ແລ້ວຈະແຈ້ງໃຫ້ຊາບຕາມພາຍຫລັງ, ການສະເໜີເປີດທ່າເຮືອຂົນສົ່ງສິນຄ້າອີກ 1 ແຫ່ງ ຈຸດບ້ານຫ້ວຍສຽດ ຢູ່ເບື້ອງລາວ ແຂວງບໍລິຄໍາໄຊ, ສະເໜີໃຫ້ແຂວງບໍລິຄໍາໄຊ ຄົ້ນຄວ້າຕາມລະບຽບການ, ສະເໜີໃຫ້ອົງການປົກຄອງແຕ່ລະຝ່າຍ ແຈ້ງໃຫ້ປະຊາຊົນຂອງຕົນ ໃຫ້ມີຄວາມລະມັດລະວັງໃນການຫາປາ ຕາມແລວຂອງການເດີນເຮືອຂົນສົ່ງ ແລະ ເຮືອໂດຍສານ.
ຈາກນັ້ນ ທ່ານ ສົມໃຈ ແກ້ວສຸວັນ ຮອງຫົວໜ້າຫ້ອງວ່າກາແຂວງ ແລະ ທ່ານ ສົມຫວັງ ອາລີເອື້ອ ຫົວໜ້າສຳນັກງານຈັງຫວັດບຶງການ ຣາຊະອານາຈັກໄທ ກໍໄດ້ລົງນາມບົດບັນທຶກຮ່ວມກັນ ໂດຍມີພາກສ່ວນກ່ຽວຂ້ອງ ສອງຝ່າຍເຂົ້າຮ່ວມ ເປັນສັກຂີພິຍານ.
