ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄດ້ນໍາພາຄະນະຜູ້ແທນຈາກຫ້ອງການກະຊວງ (ຫ້ອງການສົ່ງເສີມຄວາມກ້າວໜ້າຂອງແມ່ຍິງ ແລະ ເດັກນ້ອຍ), ກົມພົວພັນຕ່າງປະເທດ, ກົມການສຶກສາກ່ອນໄວຮຽນ, ກົມສາມັນສຶກສາ, ກົມການສຶກສາຊັ້ນສູງ ແລະ ກົມອາຊີວະສຶກສາ ເຂົ້າຮ່ວມງານສັບປະດາການຮ່ວມມືດ້ານການສຶກສາອາຊຽນ-ຈີນ, ກອງປະຊຸມໂຕະມົນລັດຖະມົນຕີສຶກສາອາຊຽນ-ຈີນ ຄັ້ງທີ 3 ແລະ ກອງປະຊຸມກ່ຽວກັບຄວາມປອດໄພດ້ານສະບຽງອາຫານ ແລະ ການຝຶກອົບຮົມບຸກຄະລາກອນອາຊີວະ ໂດຍຜ່ານລະບົບທາງໄກ ໃນລະຫວ່າງວັນທີ 23-26 ສິງຫາ 2022.
ງານສັບປະດາການຮ່ວມມືດ້ານການສຶກສາອາຊຽນ-ຈີນ ແມ່ນຈັດຂຶ້ນໂດຍລັດຖະບານຂອງ ສປ ຈີນ ແລະ ຈັດຂຶ້ນເປັນປະຈໍາທຸກປີ ໂດຍມີຈຸດປະສົງເພື່ອການຮ່ວມມືດ້ານການສຶກສາສະເພາະ ແລະ ແນໃສ່ການຍົກສູງການຮ່ວມມືທາງດ້ານວຽກງານການສຶກສາຊັ້ນສູງ, ອາຊີວະສຶກສາ, ສາມັນສຶກສາ, ການສຶກສາພິເສດ, ການສຶກສາກ່ອນໄວຮຽນ, ການຮ່ວມມືລະຫວ່າງໂຮງຮຽນ-ຜູ້ປະກອບການ, ການຮ່ວມມືທາງດ້ານການຄົ້ນຄວ້າ ແລະ ວິທະຍາສາດ, ການຮ່ວມມືເພື່ອການພັດທະນາແບບຍືນຍົງ ແລະ ການແລກປ່ຽນຂອງຊາວໜຸ່ມເປັນຫຼັກ. ໃນງານສັບປະດາໃນຄັ້ງນີ້, ສປ ຈີນ ໄດ້ເຊື້ອເຊີນເອົາບັນດາລັດຖະມົນຕີກະຊວງສຶກສາໃນອາຊຽນ, ອະທິການບໍດີ ມະຫາວິທະຍາໄລ, ຜູ້ອຳນວຍການໂຮງຮຽນ ລວມໄປເຖິງຊ່ຽວຊານ ແລະ ນັກການທູດຈາກ ສປ ຈີນ ແລະ ປະເທດສະມາຊິກອາຊຽນ ເຂົ້າຮ່ວມ.
ໃນງານສັບປະດາການຮ່ວມມືດ້ານການສຶກສາອາຊຽນ-ຈີນ 2022 ປະກອບມີ 2 ກອງປະຊຸມສໍາຄັນທີ່ປິ່ນອ້ອມ ຄື: ກອງປະຊຸມໂຕະມົນລັດຖະມົນຕີສຶກສາອາຊຽນ-ຈີນ ຄັ້ງທີ 3 ແລະ ກອງປະຊຸມອາຊຽນ-ຈີນ ທາງດ້ານຄວາມປອດໄພດ້ານສະບຽງອາຫານ ແລະ ການຝຶກອົບຮົມບຸກຄະລາກອນອາຊີວະສຶກສາ.
ກອງປະຊຸມໂຕະມົນລັດຖະມົນຕີສຶກສາອາຊຽນ-ຈີນ ຄັ້ງທີ 3 ຈັດຂຶ້ນໃນວັນທີ 23 ສິງຫາ 2022 ພາຍໃຕ້ການເປັນປະທານຂອງທ່ານ Huai Jinpeng ລັດຖະມົນຕີ ກະຊວງສຶກສາທິການ ສປ ຈີນ ແລະ ໃນກອງປະຊຸມສໍາຄັນຄັ້ງນີ້ ທ່ານ Lim Jock Hoi ເລຂາທິການໃຫຍ່ອາຊຽນ ຍັງໄດ້ໃຫ້ກຽດຮ່ວມກ່າວມີຄໍາເຫັນໃນພິທີເປີດກອງປະຊຸມຄັ້ງນີ້ດ້ວຍ.
ສະເພາະຈຸດປະສົງຂອງກອງປະຊຸມໃນຄັ້ງນີ້, ແມ່ນເພື່ອຮັບຮູ້ເຖິງຜົນໄດ້ຮັບ ແລະ ຂໍ້ຕົກລົງຮ່ວມກັນໃນກອງປະຊຸມຮອບພິເສດອາຊຽນ-ຈີນ ເພື່ອລະນຶກເຖິງສາຍພົວພັນສອງຝ່າຍອາຊຽນ-ຈີນ ຄົບຮອບ 30 ປີ ໂດຍຖືກເອົາວຽກງານຮ່ວມມືທາງດ້ານການສຶກສາເປັນຫຼັກໃນການພົວພັນຄູ່ຮ່ວມມືຍຸດທະສາດຮອບດ້ານ ເພື່ອສັນຕິພາບ, ຄວາມໝັ້ນຄົງ, ຄວາມຮັ່ງມີ ແລະ ການພັດທະນາແບບຍືນຍົງ. ພາຍໃຕ້ຫົວຂໍ້ “ການສ້າງບ້ານທີ່ເປັນມິດຮ່ວມມກັນ: ການຮ່ວມມື ແລະ ການພັດທະນາການສຶກສາອາຊຽນ-ຈີນ ຮອດປີ 2030”.
ໃນກອງປະຊຸມໄດ້ປຶກສາຫາລືຄວາມຄືບໜ້າຂອງການແລກປ່ຽນການສຶກສາອາຊຽນ-ຈີນ ແລະ ວາງແຜນກຳນົດການຮ່ວມມື ແລະ ການພັດທະນາການສຶກສາອາຊຽນ-ຈີນ ຮອດປີ 2030. ກອງປະຊຸມຄັ້ງນີ້ ໄດ້ສະເໜີໃຫ້ປະເທດສະມາຊິກແລກປ່ຽນວິໄສທັດ ໃນ 3 ຫົວຂໍ້ ປະກອບມີ ການປັບປຸງຄຸນນະພາບທາງດ້ານຊັບພະຍາກອນມະນຸດ; ການເພີ່ມທະວີການພົວພັນຮ່ວມມືດ້ານການຄົ້ນຄ້ວ້າວິໄຈ ແລະ ການສົ່ງເສີມການຫັນປ່ຽນການສຶກສາເຂົ້າສູ່ລະບົບດິຈິຕອນ.
ໂອກາດເຂົ້າຮ່ວມກອງປະຊຸມທີ່ມີຄວາມໜາຍສໍາຄັນໃນຄັ້ງນີ້, ທ່ານ ລັດຖະມົນຕີ ກະຊວງສຶກສາທິການ ແລະ ກິລາ ສປປ ລາວ ໄດ້ກ່າວມີຄຳເຫັນແລກປ່ຽນວິໄສທັດໃນຫົວຂໍ້ “ການສົ່ງເສີມການຫັນປ່ຽນການສຶກສາເຂົ້າສູ່ລະບົບດິຈິຕອນ”, ໂດຍມີເນື້ອໃນກ່າວເຖິງຄວາມສໍາຄັນຂອງການຫັນປ່ຽນລະບົບການສຶກສາເຂົ້າສູ່ດີຈິຕອນ ຊຶ່ງທ່ານໄດ້ຍົກໃຫ້ເຫັນເຖິງນະໂຍບາຍຂອງກະຊວງສຶກສາທິການ ແລະ ກິລາ ຕໍ່ການພັດທະນາ ແລະ ສົ່ງເສີມການຫັນເອົາດີຈີຕ້ອນເຂົ້າໃນການຮຽນການສອນ ເພື່ອໃຫ້ທຸກຄົນໄດ້ເຂົ້າເຖິງຂໍ້ມູນການສິກສາ ແລະ ການຮຽນໄດ້ຢ່າງວອງໄວ, ກະຊວງສຶກສາທິການ ແລະ ກິລາ ໄດ້ຮ່ວມມືກັບອົງການ UNICEF ເພື່ອພັດທະນາແອັບພລິເຄເຊິນໃຊ້ສຳລັບການຮຽນການສອນ ແບບອອນລາຍໂຕທຳອິດຂອງ ສປປ ລາວ ໂດຍມີຊື່ວ່າ: “ຄັງປັນຍາລາວ” ເພື່ອໃຊ້ສໍາລັບການຮຽນແບບປະສົມປະສານ ໂດຍເປັນອຸປະກອນການສອນແບບໜຶ່ງທີ່ສະໜອງຂໍ້ມູນຕ່າງໆແກ່ນັກຮຽນໃນການຮຽນຢູ່ທີ່ບ້ານ. ເຖິງແມ່ນວ່າໂຮງຮຽນໄດ້ກັບມາເປີດຮຽນແບບປົກກະຕິ (ເຊິ່ງໜ້າ) ແລ້ວກໍຕາມ, ແຕ່ການສົ່ງເສີມການຮຽນແບບອອນລາຍ ໂດຍການນຳໃຊ້ດີຈີຕ້ອນເຂົ້າໃນການຮຽນການສອນ ກໍຍັງສືບຕໍ່ຈັດຕັ້ງປະຕິບັດຢູ່.
ໃນຕອນທ້າຍ, ທ່ານລັດຖະມົນຕີ ສສກ ໄດ້ກ່າວວ່າ: ງານສັບປະດາຈີນ-ອາຊຽນ ໃນການຮ່ວມມືດ້ານການສຶກສານີ້ ແມ່ນເປັນເວທີທີ່ສຳຄັນໃນການແບ່ງປັນຄວາມຮູ້ ແລະ ປະສົບການໃນການສົ່ງເສີມການຫັນເອົາດີຈີຕ້ອນເຂົ້າໃນວຽກງານການສຶກສາ, ຍົກລະດັບຄຸນນະພາບຂອງການພັດທະນາຊັບພະຍາກອນມະນຸດ ແລະ ຮັດແໜ້ນຄວາມສາມັກຄີໃນການຮ່ວມມືດ້ານການຄົ້ນຄວ້າວິໄຈ ລະຫວ່າງ ສປ ຈີນ ແລະ ປະເທດສະມາຊິກອາຊຽນ ເພື່ອຄວາມອຸດົມຮັ່ງມີໃນຂົງເຂດຂົງພວກເຮົາ.
ສ່ວນກອງປະຊຸມອາຊຽນ-ຈີນ ທາງດ້ານຄວາມປອດໄພດ້ານສະບຽງອາຫານ ແລະ ການຝຶກອົບຮົມບຸກຄະລາກອນອາຊີວະ ເປັນໜຶ່ງໃນກອງປະຊຸມສໍາຄັນໃນວາລະຂອງງານສັບປະດາການຮ່ວມມືດ້ານການສຶກສາອາຊຽນ-ຈີນ ຊຶ່ງໄດ້ຈັດຂຶ້ນໃນວັນທີ 26 ສິງຫາ 2022 ໂດຍການເປັນປະທານຂອງທ່ານ Xiaodong ຜູ້ຊ່ວຍລັດຖະມົນຕີ ກະຊວງການຕ່າງປະເທດ ສປ ຈີນ.
ການຈັດງານສັບປະດາການຮ່ວມມືດ້ານການສຶກສາອາຊຽນ-ຈີນ ແລະ ບັນດາກອງປະຊຸມປິ່ນອ້ອມໃນປີນີ້, ແມ່ນເພື່ອເປັນການປະກອບສ່ວນເຂົ້າໃນການຮ່ວມມືໜຶ່ງແລວໜຶ່ງເສັ້ນທາງ, ແຜນປະຕິບັດງານ 5 ປີ ແຫ່ງການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ 2018-2022 ແລະ ວິໄສທັດປີ 2030 ຂອງຄູ່ຮ່ວມມືຍຸດທະສາດອາຊຽນ-ຈີນ. ສໍາລັບວາລະທີ່ນໍາມາສົນທະນາ ແມ່ນຕິດພັນກັບການຍົກສູງການຮ່ວມມືທາງດ້ານວຽກງານການສຶກສາຊັ້ນສູງ, ອາຊີວະສຶກສາ, ສາມັນສຶກສາ, ການສຶກສາກ່ອນໄວຮຽນ, ການຮ່ວມມືລະຫວ່າງໂຮງຮຽນ-ຜູ້ປະກອບການ, ການຮ່ວມມືທາງດ້ານການຄົ້ນຄວ້າ ແລະ ວິທະຍາສາດ, ການຮ່ວມມືເພື່ອການພັດທະນາແບບຍືນຍົງ ແລະ ການແລກປ່ຽນຂອງຊາວໜຸ່ມເປັນຫຼັກ.
ໃນການເຂົ້າຮ່ວມກອງປະຊຸມທີ່ມີຄວາມໜາຍສໍາຄັນໃນຄັ້ງນີ້, ທ່ານລັດຖະມົນຕີ ກະຊວງສຶກສາທິການ ແລະ ກິລາ ສປປ ລາວ ໄດ້ກ່າວມີຄຳເຫັນແລກປ່ຽນວິໄສທັດທີ່ຕິດພັນກັບ “ຄວາມປອດໄພດ້ານສະບຽງອາຫານ ແລະ ການຝຶກອົບຮົມບຸກຄະລາກອນອາຊີວະ” ຊຶ່ງໄດ້ຍົກໃຫ້ເຫັນເຖິງຄວາມສໍາຄັນຂອງການພັດທະນາຊັບພະຍາກອນມະນຸດ ໂດຍເນັ້ນເຖິງຄວາມມີຄຸນນະພາບ ເພື່ອສົ່ງເສີມການພັດທະນາປະເທດຊາດ ແລະ ຫຼຸດພົ້ນອອກຈາກປະະເທດດ້ອຍພັດທະນາ ແລະ ບັນລຸເປົ້າໝາຍການພັດທະນາແບບຍືນຍົງ ຊຶ່ງໄດ້ກຳນົດຢູ່ໃນຜົນໄດ້ຮັບທີ 2 ໃນແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 9 ຂອງລັດຖະບານ ສປປ ລາວ ໂດຍກະຊວງສຶກສາທິການ ແລະ ກິລາ ມີບົດບາດທີ່ສຳຄັນໃນການປະສານງານ ແລະ ພັດທະນາຊັບພະຍາກອນມະນຸດ ເພື່ອຊຸກຍູ້ໃຫ້ແກ່ການພັດທະນາເສດຖະກິດສັງຄົມຂອງ ສປປ ລາວ. ທັງນີ້, ເພື່ອໃຫ້ບັນລຸແຜນພັດທະນາດັ່ງກ່າວ, ກະຊວງສຶກສາທິການ ແລະ ກິລາ ໄດ້ສຸມໃສ່ການປັບປຸງຄຸນນະພາບການສຶກສາໃນທຸກຂັ້ນ ແລະ ສ້າງເງື່ອນໄຂທີ່ດີໃນການເຂົ້າເຖິງການສຶກສາຂອງປະຊາຊົນບັນດາເຜົ່າ. ວຽກງານອາຊີວະສຶກສາ ແມ່ນມີຄວາມສຳຄັນໃນການສົ່ງເສີມຄວາມຮູ້ ແລະ ທັກສະຂອງແຮງງານລາວ ເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫຼາດແຮງງານ ເພື່ອກ້າວໄປສູ້ລະດັບຂອງອາຊຽນ. ພ້ອມດຽວກັນນີ້, ຍັງໄດ້ສົ່ງເສີມຄວາມຮູ້ ແລະ ທັກສະໃຫ້ແກ່ໄວໜຸ່ມ ເພື່ອຮັບປະກັນດ້ານສະບຽງອາຫານ ແລະ ໂພຊະນາການ ໂດຍການສ້າງນະໂຍບາຍມາດຕະການຕ່າງໆ ເຊັ່ນ: ການບັນຈຸເອົາວິຊາກະສິກຳ ແລະ ການປຸງແຕ່ງອາຫານເຂົ້າໃນຫຼັກສູດການຮຽນການສອນໃນທຸກໂຮງຮຽນ ແລະ ວິທະຍາໄລອາຊີວະສຶກສາ ໃນຂອບເຂດທົ່ວປະເທດ, ສ້າງ ແລະ ປັບປຸງພື້ນຖານໂຄງລ່າງ ແລະ ອຸປະກອນການຮຽນການສອນ, ສະໜອງທຶນການສຶກສາ ແລະ ຈັດຝຶກອົບຮົບວິຊາຊີບໃຫ້ແກ່ຜູ້ຜະລິດເຕັກໂນໂລຊີອາຫານໃໝ່.
ຕອນທ້າຍ, ທ່ານລັດຖະມົນຕີ ຍັງໄດ້ກ່າວຂອບໃຈເປັນຢ່າງສູງຕໍ່ລັດຖະບານ ກໍຄືປະຊາຊົນ ສປ ຈີນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນຫຼາຍທົດສະຕະວັດທີ່ຜ່ານມາ ໃນການພັດທະນາຊັບພະຍາກອນມະນຸດ ແລະ ເຕັກໂນໂລຊີ ໂດຍສະເພາະແມ່ນເຕັກໂນໂລຊີການຜະລິດອາຫານ ເພື່ອໃຫ້ສາມາດຕອບສະໜອງແກ່ປະຊາຊົນໃນດ້ານສະບຽງອາຫານ ເພື່ອກ້າວໄປສູ່ການລຶບລ້າງຄວາມທຸກຍາກ.
ຂໍ້ມູນໂດຍ: ກອງເລຂາ ລັດຖະມົນຕີ
ຮຽບຮຽງໂດຍ: ດາວຫວຽດ
