ຄະນະຜູ້ແທນ ແຂວງກວາງຈິ ແຫ່ງ ສສ ຫວຽດນາມ ເຄື່ອນໄຫວພົບປະຢ້ຽມຢາມ ຢູ່ແຂວງສາລະວັນ ສປປ ລາວ ໃນລະຫວ່າງວັນທີ 30-31 ສິງຫາ 2022 ນໍໂດຍ ທ່ານ ຫງວຽນ ດັງ ກວາງ ຮອງເລຂາພັກແຂວງ, ຜູ້ປະຈໍາການຄະນະບໍລິຫານງານພັກແຂວງ ປະທານສະພາປະຊາຊົນແຂວງກວາງຈິ ສສ ຫວຽດນາມ ໂດຍໃຫ້ກຽດຕ້ອນຮັບຂອງ ທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມຄະນະ. ຈາກນັ້ນກໍໄດ້ພົບປະສອງຝ່າຍ ຢູ່ສະໂມສອນແຂວງ ໂດຍການເຂົ້າຮ່ວມຂອງ ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ ພ້ອມຄະນະ.
ການພົບປະຄັ້ງນີ້, ສອງຝ່າຍໄດ້ຜັດປ່ຽນກັນລາຍງານການພັດທະນາເສດຖະກິດ-ສັງຄົມຂອງແຂວງ ຕາມເງື່ອນໄຂ ແລະ ທ່າແຮງ, ຕາມຈຸດສຸມຕ່າງໆຂອງຕົນ, ການຊຸກຍູ້ບັນດານັກທຸລະກິດ, ຜູ້ປະກອບການເຂົ້າມາລົງທຶນ ແລະ ເຄື່ອນໄຫວກິດຈະການຕ່າງໆ ເພື່ອເພີ່ມພູນການຜະລິດຂອງພໍ່ແມ່ປະຊາຊົນ ແລະ ສ້າງເສດຖະກິດຂອງແຂວງ ໃຫ້ເຕີບໃຫຍ່ຂະຫຍາຍຕົວເປັນກ້າວໆ ໃນແຕ່ລະໄລຍະ, ໄດ້ແລກປ່ຽນໃນດ້ານການຮ່ວມມື ທີ່ຈະເປັນເງື່ອນໄຂ ແລະ ຈະກາຍເປັນຫລາຍທ່າແຮງໃຫ້ແກ່ການພັດທະນາ ໂດຍແມ່ນຄວາມມຸ່ງຫວັງຂອງສອງພັກສອງລັດ ໂດຍສະເພາະ ແຂວງສາລະວັນ ກັບ ແຂວງກວາງຈິ ໂດຍເປັນຕົ້ນ ການສ້າງເສັ້ນທາງຄົມມະນາຄົມ ໃຫ້ເຊື່ອມຈອດກັນໃນຂອບເຂດຊາຍແດນ ເພື່ອອໍານວຍຄວາມສະດວກ ແລະ ສ້າງເງື່ອນໄຂຫລາຍດ້ານ ເປັນຕົ້ນ ການຂົນສົ່ງ, ການຄ້າ, ການລົງທຶນ ແລະ ການທ່ອງທ່ຽວ, ຂຸດຄົ້ນທ່າແຮງບົ່ມຊ້ອນ, ຊອກເງື່ອນໄຂ ແລະ ກາລະໂອກາດຮ່ວມກັນພັດທະນາຫລາຍຂຶ້ນ, ການສະໜັບສະໜູນ, ຊຸກຍູ້ນັກທຸລະກິດຂອງຫວຽດນາມ ເຄື່ອນໄຫວສຶກສາຄວາມເປັນໄປໄດ້ໃນການລົງທຶນດ້ານຕ່າງໆ ແລະ ເຮັດໃຫ້ບໍລິເວນຊາຍແດນ ກໍຄື ດ່ານສາກົນລະໄລ ມີບັນຍາກາດຄືກຄື້ນໃນການແລກປ່ຽນສິນຄ້າ, ການຊື້ຂາຍ ແລະ ອື່ນໆ.
ໂອກາດດຽວກັນ, ທ່ານ ຫງວຽນ ດັງ ກວາງ ກໍໄດ້ມອບເງິນ ຈຳນວນ 200 ລ້ານດົງ ເພື່ອນຳໃຊ້ເຂົ້າໃນງານສະເຫລີມສະຫລອງປີສາມັກຄີມິດຕະພາບ ລາວ – ຫວຽດນາມ ໃຫ້ອົງການປົກຄອງແຂວງສາລະວັນ ແລະ ມອບຂອງຂວັນທີ່ລະນຶກເຊິ່ງກັນ ແລະ ກັນ.
ຈາກນັ້ນ, ຄະນະຜູ້ແທນແຂວງກວາງຈິ ກໍໄດ້ທ່ຽມຊົມເທສະບານເມືອງສາລະວັນ, ຢ້ຽມຊົມຫໍໄຕປີດົກກາງນ້ຳ, ອະນຸສາວະລີອົງແກ້ວ, ສະຖານທີ່ສຳຄັນອື່ນໆຢູ່ແຂວງສາລະວັນ ຕື່ມອີກ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
