ກຳມາທິການຍຸຕິທຳ ສະພາແຫ່ງຊາດ (ສພຊ) ໄດ້ຈັດກອງປະຊຸມວິຊາການ ກ່ຽວກັບການຮັບ ແລະ ພິຈາລະນາເອົາຄຳຮ້ອງຂໍຄວາມເປັນທຳ ຂອງຄະນະປະຈຳ ສພຊ ຂຶ້ນ ໃນວັນທີ 29-30 ສິງຫາຜ່ານມານີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານ ສພຊ, ທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ທ່ານ ສີສູນທອນ ສ.ພາບມີໄຊ ຮອງກຳມາທິການຍຸຕິທຳ; ມີຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ; ແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງໃນການຈັດກອງປະຊຸມໃນຄັ້ງນີ້ ກໍເພື່ອຮັບປະກັນການຈັດຕັ້ງຜັນຂະຫຍາຍ ກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ) ທີ່ຜ່ານການຮັບຮອງເອົາໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ຕາມຂອບເຂດຄວາມຮັບຜິດຊອບ ຂອງຄະນະປະຈຳສະພາແຫ່ງຊາດ ໃນການຮັບ ແລະ ພິຈາລະນາເອົາຄຳຮ້ອງຂໍຄວາມເປັນທຳ ທີ່ຍື່ນເຂົ້າມາສະພາແຫ່ງຊາດ; ຮັບປະກັນໃຫ້ມີເນື້ອໃນນິຕິກຳ ກ່ຽວກັບການຮັບເອົາ ແລະ ພິຈາລະນາຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດ ເປັນຕົ້ນ ມະຕິຂອງຄະນະປະຈຳ ແລະ ຮ່າງຄູ່ມືການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ມີຄວາມເປັນເອກະພາບ, ມີເນື້ອໃນຄົບຖ້ວນຕາມກົດໝາຍກຳນົດໄວ້.
ກອງປະຊຸມໄດ້ຮັບຟັງການລາຍງານ ການຈັດຕັ້ງປະຕິບັດມະຕິ ຂອງຄະນະປະຈຳ ສພຊ ວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຂອງຄະນະປະຈຳ ສພຊ ແລະ ການສະເໜີຮ່າງມະຕິຂອງຄະນະປະຈຳ ວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຂອງຄະນະປະຈຳ ສພຊ(ສະບັບປັບປຸງ) ຕາມກົດໝາຍວ່າດ້ວຍການແກ້ໄຂຄຳຮ້ອງທຸກ; ການສະເໜີຮ່າງຄູ່ມື ການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຊຶ່ງຄູ່ມືດັ່ງກ່າວທີ່ຜ່ານມາ ແມ່ນອົງການເຮວວິຕັດ ສະວິດ ເພື່ອການພັດທະນາ (HELVETAS) ໃຫ້ການສະໜັບສະໜູນ, ແຕ່ຜ່ານການປະຕິບັດຕົວຈິງ ຄູ່ມືວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳແມ່ນບໍ່ສາມາດຮ່າງສຳເລັດໄດ້ ຍ້ອນກົດໝາຍວ່າດ້ວຍການແກ້ໄຂຄຳຮ້ອງທຸກ ຫາກໍຖືກຮັບຮອງໃນກອງປະຊຸມສະໄໝສາມັນ ເທື່ອທີ 3 ຊຸດທີ IX ແລະ ຍັງບໍ່ທັນໄດ້ປັບປັງປຸງມະຕິ 132/ຄປຈ, ລົງວັນທີ 21 ສິງຫາ 2019 ກ່ຽວກັບການກວດກາ, ຄົ້ນຄວ້າ ແລະ ພິຈາລະນາຄຳຮ້ອງຂໍຄວາມເປັນທຳ; ຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ປະກອບຄວາມຄິດເຫັນຕໍ່ກັນແບບກົງໄປກົງມາ ເພື່ອຮັບປະກັນດ້ານເນື້ອໃນຂອງປຶ້ມຄູ່ມືນັ້ນໃຫ້ຮັດກຸມ, ຄົບຖ້ວນ, ສົມບູນມີປະສິດທິພາບກ່ອນທີ່ຈະມານຳໃຊ້ໃນວຽກງານຂອງກຳມາທິການ ແລະ ລົງເຜີຍແຜ່ໃຫ້ແຕ່ລະເຂດເລືອກຕັ້ງ.
ໂອກາດດັ່ງກ່າວ ທ່ານຮອງປະທານ ສພຊ ກໍໄດ້ມີຄໍາເຫັນຕໍ່ກອງປະຊຸມດັ່ງກ່າວ ຊຶ່ງທ່ານໄດ້ມອບໃຫ້ພາກສ່ວນທີ່ກ່ຽວຂ້ອງ ຄົ້ນຄວ້າເບິ່ງຄືນ ຊື່ຂອງມະຕິໃຫ້ຖືກຕ້ອງ, ສອດຄ່ອງຕາມຫຼັກການຂອງການຂຽນ ໂດຍອີງໃສ່ການປະກອບຄຳເຫັນຂອງບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້; ດ້ານໂຄງປະກອບ ແລະ ເນື້ອໃນຂອງຮ່າງມະຕິ ໃຫ້ຄົ້ນຄວ້າ, ປັບປຸງ, ຮຽບຮຽງ ປະໂຫຍກຄຳສັບໃຫ້ມີເນື້ອໃນລະອຽດ, ຄົບຖ້ວນ, ຊັດເຈນ ແລະ ເຂົ້າໃຈງ່າຍ ໂດຍສະເພາະແມ່ນໃນ 12 ມາດຕາ ທີ່ຜູ້ເຂົ້າຮ່ວມກອງປະຊຸມໄດ້ປະກອບຄວາມເຫັນມາແລ້ວນັ້ນ ແລະ ມາດຕາອື່ນໆ ທີ່ເຫັນວ່າຍັງບໍ່ທັນສອດຄ່ອງກັບກົດໝາຍ ແລະ ລະບຽບການ; ບັນຫາຕ່າງໆທີ່ກອງປະຊຸມໄດ້ຍົກຂຶ້ນຂໍໃຫ້ຄະນະຮັບຜິດຊອບສັງລວມລະອຽດແລ້ວລາຍງານຂໍທິດຊີ້ນຳ ຄະນະປະຈຳ ສພຊ ເພື່ອພິຈາລະນາຕົກລົງເປັນເອກະພາບ ໃນການຈັດຕັ້ງປະຕິບັດ.
(ຂ່າວ-ພາບ: ອານຸສອນ ພູມມີທອນ)
