ວັນທີ 30 ສິງຫານີ້, ກົມການເມືອງສູນກາງພັກກອມມູນິດຈີນໄດ້ຈັດກອງປະຊຸມ ໂດຍໄດ້ຄົ້ນຄວ້າພິຈາລະນາວຽກງານກະກຽມກອງປະຊຸມຄົບຄະນະຄັ້ງທີ 7 ຂອງຄະນະກໍາມະການສູນກາງພັກກອມມູນິດຈີນຊຸດທີ 19 ຂອງພັກກອມມູນິດຈີນ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ. ທ່ານສີຈິ້ນຜິງ ເລຂາ ທິການໃຫຍ່ຄະນະກຳມະການສູນກາງພັກກອມມູນິດຈີນ ໄດ້ເປັນປະທານຈັດກອງປະຊຸມຄັ້ງນີ້.
ກອງປະຊຸມໄດ້ຕົກລົງວ່າ: ກອງປະຊຸມຄົບຄະນະຄັ້ງທີ 7 ຂອງຄະນະກໍາມະການສູນກາງພັກກອມມູນິດຈີນຊຸດທີ 19 ຈະຈັດຂຶ້ນຢູ່ນະຄອນຫຼວງປັກກິ່ງ ປະເທດຈີນ ໃນວັນທີ 9 ຕຸລາ 2022 . ກົມການເມືອງສູນກາງພັກກອມມູນິດຈີນຈະສະເໜີຕໍ່ກອງປະຊຸມຄົບຄະນະຄັ້ງທີ 7 ຂອງຄະນະກໍາມະການສູນກາງພັກກອມມູນິດຈີນຊຸດທີ 19 ວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ຈະຈັດຂຶ້ນຢູ່ນະຄອນຫຼວງປັກກິ່ງ ປະເທດຈີນ ໃນວັນທີ 16 ຕຸລາ 2022.
ກອງປະຊຸມໄດ້ເນັ້ນໜັກວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ເປັນກອງປະຊຸມຄັ້ງຍິ່ງໃຫຍ່ທີ່ສໍາຄັນທີ່ສຸດ ທີ່ຈະຈັດຂຶ້ນໃນໄລຍະທີ່ສໍາຄັນທີ່ສຸດທີ່ທົ່ວພັກກອມມູນິດຈີນ ແລະ ປະຊາຊົນບັນດາເຜົ່າທົ່ວປະເທດຈີນ ກ້າວເຂົ້າສູ່ຂະບວນການອອກເດີນທາງຄັ້ງໃໝ່ຂອງການກໍ່ສ້າງປະເທດສັງຄົມນິຍົມທັນສະໄໝຮອບດ້ານ ກໍຄືການຈັດຕັ້ງປະຕິບັດເປົ້າໝາຍສູ້ຊົນເຫດການປະຫວັດສາດສຳຄັນ 100 ປີອັນທີ 2. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ຈະຊູຄັນທຸງຍິ່ງໃຫຍ່ຂອງສັງຄົມນິຍົມທີ່ມີສີສັນພິເສດຂອງຈີນ, ຍຶດໝັ້ນລັດທິມາກ-ເລນິນ, ແນວຄິດທ່ານມາວເຈີຕຸ້ງ, ທິດສະດີທ່ານເຕີ້ສຽວຜິງ, ແນວຄິດສໍາຄັນ “ສາມຕົວແທນ”, ທັດສະນະການພັດທະນາຕາມຫຼັກວິທະຍາສາດ, ຈັດຕັ້ງປະຕິບັດແນວຄິດຂອງທ່ານສີຈິ້ນຜິງກ່ຽວກັບສັງຄົມນິດຍົມທີ່ມີສີສັນພິເສດຂອງຈີນໃນສະໄໝໃໝ່ຢ່າງຮອບດ້ານ, ສະຫຼຸບວຽກງານໃນ 5 ປີຜ່ານມາຢ່າງຕັ້ງໜ້າ, ສະຫຼຸບຜົນສໍາເລັດອັນຍິ່ງໃຫຍ່ ແລະບົດຮຽນອັນລໍ້າຄ່າ ທີ່ສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນນໍາ ຍາດມາໄດ້ ໃນການສາມັກຄີແລະນໍາພາທົ່ວພັກກອມມູນິດຈີນ ແລະປະຊາຊົນບັນດາເຜົ່າທົ່ວປະເທດຈີນ ຍຶດໝັ້ນ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນ. ລົງເລິກວິເຄາະສະຖານະການພາຍໃນປະເທດແລະສາກົນ, ກຳໄດ້ຄວາມຕ້ອງການໃໝ່ໃນການພັດທະນາພາລະກິດຂອງຊາດແລະຂອງພັກ ແລະ ຄວາມປາດຖະໜາໃໝ່ຂອງປະຊາຊົນ ໃນຂະບວນການອອກເດີນທາງຄັ້ງໃໝ່ໃນຍຸກໃໝ່, ວາງແຜນປະຕິບັດງານແລະທິດທາງນະໂຍບາຍໃຫຍ່, ປຸກລຸກປະຊາຊົນບັນດາເຜົ່າ, ທົ່ວພັກ ແລະ ທົ່ວປະເທດເພີ່ມຄວາມໝັ້ນໃຈທາງປະຫວັດສາດ, ເພີ່ມທະວີຄວາມເປັນເຈົ້າການທາງປະຫວັດສາດ, ຍຶດໝັ້ນໃນແນວທາງທີ່ຖືກຕ້ອງ ແລະກ້າຊອກຄົ້ນແນວຄິດແລະແນວທາງການພັດທະນາໃໝ່, ກ້າວເດີນໄປໜ້າຢ່າງກ້າຫານ, ສືບຕໍ່ປະສານງານໂດຍລວມເພື່ອຊຸກຍູ້ແຜນການລວມ “ການພັດທະນາ 5 ພາລະກິດຢ່າງເປັນເອກະພາບກັນ”, ປະສານງານຊຸກຍູ້ການກໍານົດຍຸດທະສາດ “ຄວາມຮອບດ້ານ 4 ປະການ”, ສືບຕໍ່ຊຸກຍູ້ການສ້າງຄວາມຮັ່ງມີຮ່ວມກັນຂອງປະຊາຊົນ ທຸກຖ້ວນໜ້າ, ສືບຕໍ່ຊຸກຍູ້ໂຄງການໃໝ່ທີ່ຍິ່ງໃຫຍ່ຂອງການກໍ່ສ້າງພັກ, ສືບຕໍ່ຊຸກຍູ້ການກໍ່ສ້າງປະຊາຄົມຮ່ວມຊາຕາກຳຂອງມວນມະນຸດ, ສາມັກຄີສູ້ຊົນເພື່ອສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ ແລະ ຊຸກຍູ້ການຟື້ນຟູຄວາມຈະເລີນຮຸ່ນເຮືອງທີ່ຍິ່ງໃຫຍ່ຂອງຊົນຊາດຈີນຢ່າງຮອບດ້ານ. ກອງປະຊຸມຈະເລືອກຕັ້ງຄະນະກຳມະການສູນກາງພັກ ແລະ ຄະນະກຳມະການກວດກາສູນກາງພັກຊຸດໃໝ່.
ກອງປະຊຸມຊີ້ໃຫ້ເຫັນວ່າ, ປັດຈຸບັນວຽກງານກະກຽມຕ່າງໆຂອງກອງປະຊຸມໃຫຍ່ກຳລັງດຳເນີນໄປຢ່າງສະດວກ, ຈະສືບຕໍ່ເຮັດວຽກງານກະກຽມຂອງກອງປະຊຸມໃຫ້ດີ, ຮັບປະກັນກອງປະຊຸມໃຫຍ່ໄດ້ຈັດຂຶ້ນຢ່າງມີໄຊ ແລະ ໄດ້ຄົ້ນຄວ້າວຽກງານອື່ນໆ ອີກ.
