ພາຍຫລັງ ການແຂ່ງຂັນກິລາການທະຫານສາກົນ ( ARMY GAMES 2022) ໄດ້ປິດລົງຢ່າງຈົບງາມໃນວັນທີ 21 ສິງຫາ 2022 ທີ່ຜ່ານມາ ທິມນັກກິລາເຫຼົ່າຮົບຊ່າງແສງ ທີ່ໄດ້ເຂົ້າຮ່ວມແຂ່ງຂັນ ໃນຮູບແບບຊ່າງແສງກໍ່ໄດ້ເດີນທາງມາເຖິງ ນະຄອນຫຼວງວຽງຈັນ ດ້ວຍຄວາມສະຫວັດດີພາບ ໃນວັນທີ 27 ສິງຫາ 2022 ນີ້ .
ສະຫາຍ ພັນໂທ ອານຸສັກ ພົມວົງສາ ຮອງຫົວໜ້າ ຄະນະຊີ້ນຳທິມນັກກິລາ ເຫຼົ່າຮົບຊ່າງແສງ ກອງທັບປະຊາຊົນລາວໃດ້ລາຍງານໃຫ້ນັກຂ່າວພວກເຮົາວ່າ: ການເຂົ້າຮ່ວມແຂ່ງຂັນກິລາການທະຫານ ເຫຼົ່າຮົບຊ່າງແສງໃນຄັ້ງນີ້ ແມ່ນມີຄວາມໝາຍສຳຄັນທີ່ສຸດ ສຳລັບວຽກງານ ວິຊາສະເພາະຂອງເຫຼົ່າຮົບຊ່າງແສງ ກອງທັບປະຊາຊົນລາວ ເພາະມັນເປັນ ໂອກາດທີ່ບັນດານັກກິລາ,ນັກວິຊາສະເພາະພວກເຮົາໄດ້ຮັບປະສົບການອັນໃໝ່ໃນການຮຽນຮູ້ການນຳໃຊ້ບັນດາພາຫະນະວິຊາສະເພາະ ເຕັກນິກທີ່ທັນສະໄໝ ຫຼາຍຊະນິດທີ່ທາງປະເທດເຈົ້າພາບ ນຳໃຊ້ເຂົ້າໃນການແຂ່ງຂັນ ແລະ ທັງເປັນການຖອດຖອນບົດຮຽນ ຈາກບັນດາປະເທດຕ່າງໆທີ່ເຂົ້າຮ່ວມການແຂ່ງຂັນໃນຄັ້ງນີ້.
ການເຂົ້າຮ່ວມແຂ່ງຂັນກິລາ ການທະຫານສາກົນ 2022 ໃນຄັ້ງນີ້ ເຖິງວ່າຈະຈັດຂື້ນໃນໄລຍະທີ່ມີການແຜ່ລະບາດຂອງພະຍາດ COVID 19 ກໍ່ຕາມ ແຕ່ບັນດານັກກິລາພວກເຮົາ ກໍ່ມີຄວາມຕັດສິນໃຈສູງໃນການເອົາໃຈໃສ່ຝຶກຊ້ອ ຢ່າງຕັ້ງໜ້າ ແລະ ເຂົ້າຮ່ວມການແຂ່ງຂັນ,ຜ່ານຜ່າບັນດາຄວາມຫຍຸ້ງຍາກແລະອຸປະສັກຕ່າງໆສາມາດຍາດໄດ້ອັນດັບ lll ມາສູ່ກອງທັບປະຊາຊົນລາວຢ່າງຈົບງາມ.
ພາບ-ຂ່າວ: ເກນ ວິໄລສານ
