ວັນທີ 30 ສິງຫາ 2022 ກຸ່ມນັກທຸລະກິດຍິງ ຈຳນວນ 9 ຄອບຄົວ ໄດ້ລວມໂຕກັນລະດົມວັດຖຸປັດໃຈ ເຄື່ອງອຸປະໂພກ- ບໍລິໂພກ ຈຳນວນໜຶ່ງ ນຳໄປມອບໃຫ້ແກ່ປະຊາຊົນ 3 ບ້ານ ຄື: ບ້ານຫ້ວຍຫຼາ, ບ້ານໂພນໄຊ ແລະບ້ານສາມັກຄີໄຊ, ເມືອງຫຼາ, ແຂວງອຸດົມໄຊ ເພື່ອບັນເທົາທຸກແກ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ.
ເຄື່ອງທີ່ນຳມາມອບໃນຄັ້ງນີ້ ລວມມີ: ຜ້າຫົ່ມ, ເຂົ້າສານ, ໝີ່… ໂດຍໄດ້ຈັດເປັນປະເພດ ຄື: ປະເພດຄອບຄົວທີ່ເສຍຫາຍໜັກ ແລະ ເສຍຫາຍສາມາດສ້ອມແປງຄືນໄດ້ ແລະ ໄດ້ລົງມອບແຈກຫຍາຍແຕ່ ບ້ານຫ້ວຍລາ ເຊິ່ງບ້ານດັ່ງກ່າວ ມີ 6 ຄອບຄົວ ທີ່ເສຍຫາຍໜັກ, ບ້ານໂພນໄຊ ມີ 8 ຫຼັງຄາເຮືອນຖືກນ້ຳພັດໄຫລ, ບ້ານສາມັກຄີໄຊ ມີ 12 ຄອບຄົວ ທີ່ຖືກນ້ຳພັດໄຫຼ ແລະ ຍັງໄດ້ມອບໃຫ້ຄອບຄົວທຸກຍາກອີກຈຳນວນໜຶ່ງ ລວມມູນຄ່າທັງໝົດ 13 ລ້ານ 5 ແສນກີບ.
ເຄື່ອງທີ່ນຳມາມອບຄັ້ງນີ້ ແມ່ນນ້ຳຈິດນ້ຳໃຈຈາກທີ່ນັກທຸລະກິດ ຍິງທີ່ໄດ້ປຸກລະດົມກັນຊ່ວຍແກ້ໄຂ ໃນຍາມວິກິດ ແລະ ຍັງຈະໄດ້ລະດົມໝູ່ເພື່ອນນັກທຸລະກິດທັງພາຍໃນ ແລະ ຕ່າງແຂວງ ໃຫ້ເຂົ້າມາຊ່ວຍເຫຼືອປະຊາຊົນທີ່ໄດ້ນຮັບຜົນກະທົບຕື່ມອີກ.
ຂ່າວ-ພາບ: ແສງອາທິດ
