ຕັ້ງແຕ່ອະດີດຈົນເຖິງປັດຈຸບັນ ຫັດຖະກໍາໄມ້ປ່ອງແມ່ນມີຄວາມສໍາຄັນ ແລະ ເປັນທີ່ນິຍົມຂອງສັງຄົມລາວຢ່າງກວ້າງຂວາງ ຍ້ອນໄດ້ຮັບການຊົມໃຊ້ເຂົ້າໃນຊີວິດປະຈໍາວັນ ຂອງຄົວເຮືອນໃນທຸກໆວັນ.
ໃນໂອກາດໄດ້ເຂົ້າຮ່ວມງານວາງສະແດງສິນຄ້າລາວ-ຫວຽດນາມ 2022 ທີ່ສູນການຄ້າລາວ-ໄອເຕັກ, ທ່ານ ນາງ ຕອມ ອ່າງມັດສາ ປັດຈຸບັນຢູ່ບ້ານເພຍລາດ ເມືອງສັງທອງ ນະຄອນຫຼວງວຽງຈັນ ໄດ້ເລົ່າໃຫ້ຟັງວ່າ: ເລີ່ມຕົ້ນທຸລະກິດຫັດຖະກໍາໄມ້ປ່ອງ ເປັນສິນຄ້າມາແຕ່ປີ 2014, ປັດຈຸບັນໄດ້ສ້າງຕັ້ງເປັນກຸ່ມ ໂດຍມີ 10 ກວ່າຄອບຄົວ ເພື່ອຜະລິດຫັດຖະກຳໄມ້ປ່ອງຂາຍ ໂດຍສ່ວນໃຫຍ່ແລ້ວຜະລິດຕາມການສັ່ງຈອງ ຫຼື ຕາມຄວາມຕ້ອງການຂອງຮ້ານທີ່ສັ່ງຊື້ຜະລິດຕະພັນຈາກກຸ່ມ ມີທັງຮູບແບບຂາຍຍົກ ແລະ ຂາຍຍ່ອຍ. ຜະລິດຕະພັນດັ່ງກ່າວ ປະກອບມີ ເຄື່ອງຈັກສານ, ຫວດ, ຕິບເຂົ້າ, ພາເຂົ້າ, ກະເປົາ, ກະຕ່າ, ໂຕະ, ຕັ່ງ, ຊັ້ນວາງເຄື່ອງ ແລະ ອື່ນໆ. ລາຄາຂາຍແພງສຸດ ໂຕະ 1 ຊຸດ 1 ລ້ານກວ່າກີບ ເຖິງ 2 ລ້ານກວ່າກີບ, ກະເປົາທີ່ເຮັດດ້ວຍໄມ້ຂາຍໃນລາຄາ 3 ແສນກີບ ຕໍ່ 1 ໜ່ວຍ, ກະເປົາທີ່ເຮັດດ້ວຍຫວາຍ ລາຄາ 7 ແສນກວ່າກີບຕໍ່ໜ່ວຍ ລາຍຮັບໂດຍສະເລ່ຍປະມານ 40 ລ້ານກີບຕໍ່ເດືອນ.
ແນວໃດກໍຕາມ ເຖິງວ່າຈະພົບກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນພາຍໃນປະເທດ, ໃນຂະນະດຽວກັນອັດຕາແລກປ່ຽນ ແລະ ອັດຕາເງິນເຟີ້ເພີ່ມຂຶ້ນ ແຕ່ສິນຄ້າຫັດຖະກໍາຈັກສານດ້ວຍໄມ້ປ່ອງ, ຫວາຍ ໄດ້ປັບຂຶ້ນລາຄາພຽງເລັກນ້ອຍເທົ່ານັ້ນ ຍ້ອນວ່າຢາກໃຫ້ຄົນໃນສັງຄົມໄດ້ຊົມໃຊ້ກັນຢ່າງທົ່ວເຖິງ ເພາະເປັນສິນຄ້າທີ່ເຮັດດ້ວຍສີມືຂອງຄົນລາວ ເພື່ອໃຫ້ຄົນລາວໄດ້ນໍາໃຊ້.
ທ່ານ ນາງ ຕອມ ອ່າງມັດສາ ກ່າວຕື່ມວ່າ ທຸກໆຄົນທີ່ຊື້ຜະລິດຕະພັນ ຢາກໃຫ້ມີຂໍ້ຕໍານິຕິຊົມກັບຮ້ານຂາຍແດ່ ເພາະຈະໄດ້ພັດທະນາຜະລິດຕະພັນ ກໍຄືສີມືຂອງຊາວຊ່າງຫັດຖະກໍາໃຫ້ນັບມື້ນັບດີຂຶ້ນ, ຖ້າມີການຕຳນິຕິຊົມ ພວກເຮົາພ້ອມທີ່ຈະພັດທະນາຕາມຄວາມຕ້ອງການຂອງລູກຄ້າ.
ສຳລັບໃນໄລຍະເກີດການແຜ່ລະບາດຂອງພະຍາດໂຄວິດ-19 ການຂາຍແມ່ນຖືກຢຸດສະງັກ, ການຜະລິດຫຼຸດລົງ, ການຂາຍໃນວົງແຄບແບບບໍ່ມີກໍາໄລ, ຫຼັງຈາກທີ່ລັດຖະບານໄດ້ປະກາດຜ່ອນຜັນມາດຕະການຄວບຄຸມໂຄວິດ-19 ເຮັດໃຫ້ກິດຈະກຳທາງເສດຖະກິດເລີ່ມຄຶກຄັກຂຶ້ນ ແຕ່ປະເທດເຮົາຊ້ຳພັດພົບກັບຄວາມຫຍຸ້ງຍາກດ້ານເສດຖະກິດ ໄພເງິນເຟີ້, ນໍ້າມັນແພງ, ກົງກັນຂ້າມ ເຄື່ອງທີ່ນໍາມາຕົບແຕ່ງ-ປະກອບໃສ່ຜະລິດຕະພັນຊໍ້າພັດມີລາຄາແພງ ຊຶ່ງຜະລິດຕະພັນຈັກສານໄມ້ປ່ອງກໍຈຳເປັນຕ້ອງໄດ້ປັບລາຄາຂຶ້ນ ແຕ່ເປັນການປັບຂຶ້ນພຽງເລັກນ້ອຍເທົ່ານັ້ນ.
ໃນຕໍ່ໜ້າ ຈະພະຍາຍາມຍົກລະດັບຄຸນນະພາບຂອງຜະລິດຕະພັນໃຫ້ດີ, ງາມ, ທົນທານ ແລະ ມີຄຸນນະພາບສູງຂຶ້ນໄປເລື້ອຍໆ ເພື່ອໃຫ້ເປັນທີ່ຖືກໃຈກັບຜູ້ຊົມໃຊ້ ແລະ ກ້າວໄປເຖິງລະດັບສາກົນ, ສະນັ້ນຈຶ່ງຝາກເຖິງພາກສ່ວນທີ່ກ່ຽວຂ້ອງ ເອົາໃຈໃສ່ສົ່ງເສີມດ້ານທຶນຮອນ ການເຂົ້າເຖິງແຫຼ່ງທຶນສະດວກ, ດອກເບ້ຍຕໍ່າ
(ຂ່າວ-ພາບ: ແສງຈັນ)
