ໂດຍປະຕິບັດຕາມມະຕິ ເລກທີ 25/ກມສພ ລົງວັນທີ 17 ພືດສະພາ 2021 ວ່າດ້ວຍ: ເພີ່ມທະວີການນໍາພາຂອງພັກຕໍ່ວຽກງານວັດທະນະທຳໃນໄລຍະໃຫມ່, ການຈັດຕັ້ງຜັນຂະຫຍາຍມະຕິ 7 ຂອງຄະນະບໍລິຫານງານພັກແຂວງສະໄໝທີ IX ໃຫ້ປະກົດຜົນເປັນຈິງ ແລະ ເພື່ອເຮັດໃຫ້ຄາດໝາຍ ໃນການຈັດຕັ້ງປະຕິບັດວຽກງານຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ຂອງແຂວງ, ສາມາດບັນລຸໄດ້ຕາມແຜນການທີ່ວາງໄວ້ ໂດຍສະເພາະວຽກໃນໄລຍະ 6 ເດືອນຕົ້ນປີ ແລະ ອີກຈຸດສຸມ 6 ທ້າຍປີ 2022.
ທ່ານ ມະໄລວອນ ສີປະເສີດ ກໍາມະການພັກແຂວງ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງສາລະວັນ, ພ້ອມຄະນະ ໄດ້ລົງເຄື່ອນໄຫວຊຸກຍູ້ວຽກງານ ຖວທ ຢູ່ເມືອງເລົ່າງາມ, ໂອກາດດຽວກັນນັ້ນກໍໄດ້ຮ່ວມເຮັດວຽກກັບຄະນະນໍາທີ່ກ່ຽວຂ້ອງຂອງເມືອງ ແລະ ຫ້ອງການ ຖວທ ເມືອງ ໂດຍສະເພາະແມ່ນຈະໄດ້ປຶກສາ-ຫາລື ການສ້າງແຜນຟື້ນຟູການທ່ອງທ່ຽວຄືນໃໝ່, ຄືທ່ອງທ່ຽວໃນຮູບແບບອະນຸລັກ ປະຊາຊົນມີສ່ວນຮ່ວມ ໂດຍເລັງໃສ່ການທ່ອງທ່ຽວໃນ 4 ປະເພດຄື: ທ່ອງທ່ຽວທາງທໍາມະຊາດ, ປະຫວັດສາດ, ວັດທະນະທໍາ ແລະ ທ່ອງທ່ຽວທາງດ້ານກະສິກໍາ ໂດຍຈະໄດ້ປະເມີນຄືນການຈັດຕັ້ງປະຕິບັດວຽກງານວັດທະນະທໍາໃນທົ່ວເມືອງ, ໃຫ້ສອດຄ່ອງຕາມຂໍ້ກຳນົດຂອງກະຊວງວາງອອກ, ເປັນຕົ້ນ: ເປົ້າໝາຍ ແລະ ມາດຖານໃນການສ້າງບ້ານ ແລະ ຄອບຄົວວັດທະນະທໍາ, ເພື່ອຟື້ນຟູຄືນວັດທະນະທຳອັນດີງາມຂອງຊາດ, ຂອງທ້ອງຖິ່ນ, ອະນຸລັກວັດທະນະທໍາອັນເກົ່າແກ່, ການປຶກສາຫາລືໃນຄັ້ງນີ້ ແມ່ນຈະໄດ້ກໍານົດເອົາແຫຼ່ງທ່ອງທ່ຽວທີ່ໂດດເດັ່ນຂອງເມືອງ, ທີ່ຕິດພັນກັບປະເພນີ ແລະ ວິຖີຊີວິດຂອງຊາວບ້ານ, ເພື່ອນໍາສະເໜີເຂົ້າໃນວົງຈອນການທ່ອງທ່ຽວຂອງແຂວງ ເປັນຕົ້ນ: ແຫຼ່ງທ່ອງທ່ຽວ ຕາດສູງ ບ້ານສະນືມໃນ, ເຊິ່ງເປັນແຫຼ່ງທ່ອງທ່ຽວທີ່ໄດ້ຮັບການສະໜັບສະໜູນ ຈາກໂຄງການພັດທະນາການທ່ອງທ່ຽວ ຫຼື ທະນາຄານພັດທະນາ ອາຊີ ADB ໃນໄລຍະຜ່ານມາ, ນອກນັ້ນ: ຍັງມີແຫຼ່ງທ່ອງທ່ຽວຖໍ້າ 9 ຮູ ພູຕາກເຂົ້າ ແລະ ສະຖານທີ່ທ່ອຽທ່ຽວແຫ່ງອື່ນໆຂອງເມືອງຕື່ມອີກ
ພ້ອມດຽວກັນນັ້ນ ຍັງໄດ້ປຶກສາກ່ຽວກັບການສ້າງປະຕິທິນ ການທ່ອງທ່ຽວຂອງເມືອງ, ສ້າງ ແລະ ປັບປຸງ ສິ່ງອຳນວຍຄວາມສະດວກ, ສ້າງພື້ນຖານໂຄງລ່າງຈຳນວນໜຶ່ງ ເພື່ອບໍລິການໃຫ້ແກ່ນັກທ່ອງທ່ຽວພາຍໃນ ແລະ ຕ່າງປະເທດ, ໄດ້ເຂົ້າມາໃຊ້ບໍລິການ ແລະ ກະຈາຍລາຍໄດ້ໃຫ້ກັບປະຊາຊົນ ປະຊາຊົນມີສ່ວນຮ່ວມ, ຈາກນັ້ນ ທ່ານ ຫົວໜ້າພະແນກ ຖວທ ແຂວງ, ກໍ່ໄດ້ໄປເບິ່ງກິດຈະກໍາ ຢູ່ສູນຮຽນຮູ້ຊຸມຊົນສີຂຽວ, ສະຖານທີ່ຕັ້ງຢູ່ບ້ານໂນນເດື່ອ ເມືອງເລົ່າງາມ, ເພື່ອສຶກສາເບີ່ງຄວາມເປັນໄປໄດ້ ທີ່ຈະສະເໜີເຂົ້າໃນວົງຈອນການທ່ອງທ່ຽວດ້ານກະສິກໍາ ຂອງແຂວງຕື່ມອີກ, ການເຄື່ອນໄຫວ ແມ່ນໄດ້ມີຂື້ນໃນທ້າຍອາທິດຜ່ານມານີ້, ເຂົ້າຮ່ວມມີ ທ່ານ ພິດສະໄໝ ແກ້ວວົງສັກ ຮອງເລຂາພັກເມືອງ ທ່ານ ຄໍາຫວັນ ສີສະໝຸດ ຮອງເຈົ້າເມືອງ ຜູ້ຊີ້ນໍາວຽກງານວັດທະນະທໍາ-ສັງຄົມ ມີຫົວໜ້າຫ້ອງການ ຖວທ ເມືອງເລົ່າງງາມ ຫົວໜ້າຫ້ອງວ່າການເມືອງ, ພ້ອມດ້ວຍພະນັກງານວິຊາການຈາກຂະແໜງການຂອງແຂວງ ແລະ ເມືອງ ເຂົ້າຮ່ວມ.
#Medialaos MMD (ແຫຼ່ງຂໍ້ມູນຈາກ: ນັກຂ່າວ ແຂວງສາລະວັນ)
