ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ວັນທີ 29 ສິງຫາ ຜ່ານມາ, ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ໄດ້ນໍາພາຄະນະຜູ້ແທນຂອງ ແຂວງໄຊສົມບູນ ສປປ ລາວ ເຂົ້າພົບປະຢ້ຽມຢາມ ທ່ານ ຫງວນຫຶວດົງ ປະທານສະມາຊິກສະພາແຫ່ງຊາດແຂວງ ພ້ອມຄະນະ ຢູ່ຂວງເຊີນລາ ສສ ຫວຽດນາມ ໂດຍມີ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍບັນດາຄະນະຜູ້ແທນແຂວງໄຊຍະບູລີ ແລະ ແຂວງຊຽງຂວາງ ເຂົ້າຮ່ວມ.
ໂອກາດນີ້ ທ່ານ ຫງວນຫຶວດົງ ໄດ້ຍົກໃຫ້ເຫັນສະພາບຈຸດພິເສດ ແລະ ການພັດ ທະນາເສດຖະກິດ-ສັງຄົມ ຂອງແຂວງເຊີນລາ ໄລຍະ 6 ເດືອນຕົ້ນປີ 2022 ແລະ ໝາກຜົນຂອງການຮ່ວມມື ລະຫວ່າງແຂວງເຊີນລາ ກັບບັນດາແຂວງຂອງ ສປປ ລາວ ເຊິ່ງແຂວງເຊີນລາ ມີຊາຍແດນຕິດກັບ ສປປ ລາວ ຍາວ 270 ກວ່າກິໂລແມັດ, ມີປະຊາກອນ 1,3 ລ້ານກວ່າຄົນ ມີ 12 ຊົນເຜົ່າດໍາລົງຊີວິດຢູ່ຮ່ວມກັນ, ປັດຈຸບັນ ແຂວງເຊີນລາ ມີການພົວພັນຮ່ວມມືຮອບດ້ານໃນຂົງເຂດເສດຖະກິດ, ວັດທະນະທໍາ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບກັບ 9 ແຂວງຂອງ ສປປ ລາວ ຄື: ແຂວງຫົວພັນ, ຜົ້ງສາລີ, ຊຽງຂວາງ, ໄຊສົມບູນ, ຫລວງພະບາງ, ອຸດົມໄຊ, ແຂວງຫລວງນໍ້າທາ, ບໍ່ແກ້ວ ແລະ ແຂວງໄຊຍະບູລີ, ໃນໄລຍະ ປິ 2017-2021 ແຂວງເຊີນລາ ກໍໄດ້ກໍ່ສ້າງ, ບໍາລຸງພະນັກງານ, ນັກສຶກສາ ສໍາລັບ 9 ແຂວງຂອງລາວ ໃນມູນຄ່າ 200 ກວ່າຕື້ດົງ.
ໃນໂອກາດດຽວກັນ, ຄະນະຜູ້ແທນສອງຝ່າຍ ກໍໄດ້ແລກປ່ຽນຄໍາຄິດຄໍາເຫັນດ້ວຍຄວາມຈິງໃຈ ແລະ ຕີລາຄາສູງຕໍ່ກັບຜົນສໍາເລັດທີ່ທັງສອງພັກ, ສອງລັດ ກໍຄື ປະຊາຊົນສອງຊາດ ລາວ-ຫວຽດນາມ ສາມາດຍາດມາໄດ້ໃນໄລຍະຜ່ານມາ.
ຫລັງຈາກນັ້ນ, ກໍໄດ້ເດີນທາງໄປວາງພວງມາລາ, ຖະຫວາຍທູບທຽນ ຢູ່ອະນຸສາວະລີ ປະທານໂຮ່ຈີມິນ ເພື່ອສະແດງຄວາມເຄົາລົບອາໄລ ເຖິງຄຸນງາມຄວາມດີອັນໃຫຍ່ຫລວງຂອງ ປະທານໂຮ່ຈີມິນ ແລະ ບັນດາລູກຫລານນັກປະຕິວັດຜູ້ດີເດັ່ນຂອງຊາດ ທີ່ໄດ້ເສຍສະລະເລືອດເນື້ອ ເຫື່ອ ແຮງຕໍ່ສູ້ຢ່າງພິລະອາດຫານ, ນໍ້າໃຈເສຍສະລະອັນຫຍິ່ງໃຫຍ່ ເພື່ອພາລະກິດຕໍ່ສູ້ປົດປ່ອຍຊາດ, ທ້ອນໂຮມປະເທດໃຫ້ເປັນເອກະພາບ ເພື່ອເປົ້າໝາຍສັງຄົມນິຍົມ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
