ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ (ນວ) ຊຶ່ງນໍາໂດຍ ທ່ານ ພັທ ຄໍາເພັດ ດາລາວົງ ຫົວໜ້າພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງເຜີຍແຜ່ວຽກງານສະກັດກັ້ນ ແລະ ຕ້ານອັກຄີໄພ ຂັ້ນພື້ນຖານ ໃຫ້ອາສາສະໝັກໜ່ວຍກູ້ໄພມູນນິທິຈີນ (1628) ແລະ ໜ່ວຍກູ້ໄພຊ່ວຍເຫຼືອບັນເທົາທຸກ, ໃນລະຫວ່າງວັນທີ 27-30 ສິງຫາ 2022 ທີ່ວັດຈີນ (ຄຸນນະທັມສະຖານເຕັກກາຈີຕ່ຽງເກາະ ນວ) ບ້ານດົງປ່າແຫຼບ ເມືອງຈັນທະບູລີ ນວ. ໂດຍການເຂົ້າຮ່ວມຂອງ ທ່ານ ພັອ ຈັນຫອມ ແກ້ວສຸລາໄຊ ຮອງຫົວໜ້າກົມຕໍາຫຼວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕໍາຫຼວດ ກະຊວງ ປກສ, ທ່ານ ເລັງ ສະຫວັນວາລີ ປະທານກິດຕິມະສັກສະມາຄົມມູນນິທິຈີນ (1628), ທ່ານ ຊ້າງ ອິນທິລາດ ຄະນະສະມາຄົມຈີນ ຫົວໜ້າໜ່ວຍກູ້ໄພມູນນິທິຈີນ 1628) ພ້ອມດ້ວຍອາສາສະໝັກກູ້ໄພເຂົ້າຮ່ວມ.
ການຝຶກອົບຮົມໃນຄັ້ງນີ້: ມີອາສາສະໝັກກູ້ໄພທັງໝົດ 76 ຄົນ ຍິງ 26 ຊຶ່ງໄດ້ຮຽນຮູ້ກ່ຽວກັບວິທີການມອດໄຟ, ວິທີນໍາໃຊ້ເຕັກນິກຂອງລົດມອດໄຟ, ອຸປະກອນໃນການນໍາໃຊ້ເຂົ້າໃນການດັບມອດໄຟ ທັງພາກທິດສະດີ ແລະ ພາກປະຕິບັດຕົວຈິງ ຈາກຄະນະຝຶກອົບຮົມຂອງພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ, ເພື່ອແນໃສ່ໃຫ້ມີຄວາມຮັບປະກັນໃນການປະຕິບັດໜ້າທີ່, ໃຫ້ມີຄວາມຊັດເຈນວ່ອງໄວ ແລະ ຮັບປະກັນໃນການຈໍາກັດໄດ້ ຜົນເສຍຫາຍທີ່ເກີດຂຶ້ນຈາກອັກຄີໄພ ໃຫ້ຢູ່ໃນລະດັບທີ່ຕໍ່າສຸດ, ພ້ອມທັງເປັນການຍົກລະດັບ ຄວາມຮູ້-ຄວາມສາມາດ ຂອງອາສາສະໝັກກູ້ໄພ ໃຫ້ສູງຂຶ້ນ ແລະ ສ້າງກໍາລັງມອດໄຟເຄິ່ງອາຊີບຂອງໜ່ວຍກູ້ໄພ ກາຍເປັນກໍາລັງເສີມໃຫ້ແກ່ກໍາລັງຕໍາຫຼວດສະກັດກັ້ນ ແລະ ຕ້ານອັກຄີໄພ, ໃນການສ້າງຕາໜ່າງວຽກງານປ້ອງກັນອັກຄີໄພ ໃຫ້ເຕີບໃຫຍ່ກວ້າງຂວາງຂຶ້ນເທື່ອລະກ້າວ ເພື່ອຮັບໃຊ້ສັງຄົມໃຫ້ທ່ວງທັນກັບສະພາບເຫດການທີ່ເກີດຂຶ້ນ.
ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ຮັບຊົມການສະແດງຂອງອາສາສະໝັກກູ້ໄພ ເປັນຕົ້ນການເດີນສວນສະໜາມ ແລະ ການທົດລອງປະຕິບັດສີດນໍ້າມອດໄຟຕົວຈິງ ໂດຍການນໍາໃຊ້ລົດມອດໄຟຈໍານວນ 3 ຄັນ, ເພື່ອເຮັດໃຫ້ອາສາສະໝັກກູ້ໄພ ໄດ້ລົງປະຕິບັດຕົວຈິງໃຫ້ມີຄວາມສຳນິຊໍານານ ແລະ ສາມາດນໍາເອົາບົດຮຽນທີ່ໄດ້ຝຶກອົບຮົມຄັ້ງນີ້ ນໍາໄປໃຊ້ກັບເຫດການຈິງ ເພື່ອໃຫ້ຮັບປະກັນໄດ້ໃນການກຽມພ້ອມຮັບໃຊ້ສັງຄົມ ເມື່ອມີເຫດອັກຄີໄພເກີດຂຶ້ນ. ພ້ອມນີ້ ກໍໄດ້ມອບໃບຢັ້ງຢືນການຝຶກອົບຮົມ ວຽກງານສະກັດກັ້ນ ແລະ ຕ້ານອັກຄີໄພຂັ້ນພື້ນຖານ ໃຫ້ອາສາສະໝັກໜ່ວຍກູ້ໄພມູນນິທິຈີນ (1628) ແລະ ໜ່ວຍກູ້ໄພຊ່ວຍເຫຼືອບັນເທົາທຸກ ໂດຍເປັນກຽດມອບຂອງ ທ່ານ ພັອ ຈັນຫອມ ແກ້ວສຸລາໄຊ ຮອງຫົວໜ້າກົມຕໍາຫຼວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕໍາຫຼວດ ກະຊວງ ປກສ.
ຂ່າວ: ຍຸພິນທອງ
