ຈາກສະພາບການໄພພິບັດນ້ຳຖ້ວມ ຢູ່ພາຍໃນແຂວງ ອຸດົມໄຊ ອັນໄດສົ່ງຜົນກະທົບມາສູ່ຊີວິດ ແລະ ຊັບສິນປະຊາຊົນເປັນຈຳນວນມະຫາສານ. ຕໍ່ກັບສະພາບການດັ່ງກ່າວຄະນະພັກຄະນະນຳແຂວງອຸດົມໄຊ ກໍໄດ້ເອົາໃຈໃສ່ ປຸກລະດົມຫຼາຍພາກສ່ວນໃຫ້ການຊ່ວຍເຫຼືອໃນເບື້ອງຕົ້ນ.
ໃນນີ້ອົງການກາແດງແຂວງອຸດົມໄຊ ກໍໄດ້ລົງໃຫ້ການຊ່ວຍເຫຼືອ ແລະ ແກ້ໄຂໃນເບື້ອງຕົ້ນ ໃຫ້ແກ່ບ້ານທີ່ຖືກຜົນກະທົບ 100% ຢູ່ໃນຈຳນວນ 8 ບ້ານ 56 ຄອບຄົວ ພົນລະເມືອງທີ່ໄດ້ຮັບຜົນກະທົບ 266 ຄົນ ໃນນັ້ນເມືອງຫຼາມີ 3 ບ້ານ 35 ຄອບຄົວ ພົນລະເມືອງທີ່ໄດ້ຮັບຜົນກະທົບ 206 ຄົນ ແລະ ເມືອງໄຊ 5 ບ້ານ 21 ຄອບຄົວ ພົນລະເມືອງທີ່ໄດ້ຮັບຜົນກະທົບ 98 ຄົນ. ສຳລັບເຄື່ອງທີ່ນຳໄປມອບຊ່ວຍເຫຼືອ ແກ້ໄຂໃນເບື້ອງຕົ້ນປະກອບມີເຄື່ອງໃຊ້ໃນຄົວເຮືອນ, ຜ້ານຫົ່ມ, ສາດ ແລະ ມຸ້ງ ລວມມູນຄ່າທີ່ນຳມາມອບທັງໝົດ 31 ລ້ານກ່ວາກີບ.
ອົງການກາແດງແຂວງ ອຸດົມໄຊ ຍັງໃຫ້ຮູ້ຕື່ມວ່າສະພາບໄພພິບັດທີ່ເກີດຂຶ້ນຢູ່ແຂວງອຸດົມໄຊ ຄັ້ງນີ້ ແມ່ນໄດ້ກະທົບຢ່າງໜັກໜ່ວງຢູ່ 3 ເມືອງ: ເມືອງໄຊ, ເມືອງຫຼາ ແລະ ເມືອງນາໝໍ້ ຖືກຜົນກະທົບທັງໝົົດ 30 ບ້ານ 1.284 ຄອບຄົວ ພົນລະເມືອງທີ່ຖືກຜົນກະທົບ 7.886 ຄົນ. ການລົງມອບແມ່ນໄດ້ຈັດເປັນຊ່ວງຄື ຊ່ວງວັນທີ່27-28ສີງຫາ 2022.
