ງານວາງສະແດງສິນຄ້າລາວ-ຫວຽດ ປະຈໍາປີ 2022, ໄດ້ມີນັກທຸລະກິດຂອງທັງສອງປະເທດນຳສິນຄ້າຂອງຕົນເຂົ້າມາວາງສະແດງ ໂດຍສະເພາະແມ່ນຜູ້ປະກອບການຂອງຫວຽດນາມ ມີຄວາມຫວັງເປັນຢ່າງຍິ່ງທີ່ຈະເຫັນຜູ້ຊົມໃຊ້ຂອງ ສປປ ລາວ ໃຫ້ຄວາມສົນໃຈຜະລິດຕະພັນຈາກຫວຽດນາມຫຼາຍຂຶ້ນຜ່ານຕົວແທນຈຳໜ່າຍ ຢູ່ ສປປ ລາວ ເປັນຕົ້ນ ແມ່ນເຄື່ອງອຸປະໂພກ-ບໍລິໂພກ, ເຄື່ອງໃຊ້ໄຟຟ້າ, ຢາປົວພະຍາດ ແລະ ຜະລິດຕະພັນອື່ນໆ ພາຍຫຼັງນຳສິນຄ້າເຂົ້າຮ່ວມງານວາງສະແດງສິນຄ້າ ລາວ-ຫວຽດນາມ 2022.
ການຈັດງານວາງສະແດງຄັ້ງນີ້ ເພື່ອເປັນການສົ່ງເສີມ, ແລກປ່ຽນຂໍ້ມູນຂ່າວສານ ແລະ ເປີດໂອກາດໃຫ້ນັກທຸລະກິດ ລາວ-ຫວຽດນາມ ຊອກຫາຄູ່ຄ້າຮ່ວມລົງທຶນ ແລະ ສ້າງເງື່ອນໄຂໃນການໂຄສະນາ ດ້ານທຸລະກິດຂອງສອງປະເທດ; ງານວາງສະແດງຄັ້ງນີ້ ພາຍໃຕ້ຫົວຂໍ້ “ຂົວຕໍ່ແຫ່ງຜົນສໍາເລັດໃຫ້ແກ່ການຄ້າ-ການລົງທຶນ 2 ຊາດລາວ-ຫວຽດນາມ”, ເປັນເຫດການທາງການເມືອງ, ເສດຖະກິດ-ສັງຄົມ ທີ່ມີຄວາມໝາຍຄວາມສໍາຄັນ ທັງປະກອບສ່ວນຊຸກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ພິເສດ ໃນປີນີ້ໄດ້ຈັດຂຶ້ນຢ່າງຍິ່ງໃຫຍ່ ເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ 2022.
ທ່ານນາງ ຮວາງ ແຄັງ ລີ ຜູ້ອໍານວຍການ ບໍລິສັດອາຫານເພື່ອສຸຂະພາບ Charm ກ່າວວ່າ: ບໍລິສັດຂອງພວກຂ້າພະເຈົ້າຖືວ່າເປັນຜູ້ສະໜອງຜະລິດຕະພັນອາຫານເພື່ອສຸຂະພາບ ໂດຍສະເພາະແມ່ນບັນດາເຫັດທີ່ຫາຍາກ, ຢູ່ຫວຽດນາມ ສິນຄ້າດັ່ງກ່າວ ໄດ້ຮັບສຽງຕອບຮັບ ແລະ ເປັນທີ່ຮູ້ຈັກຂອງຄົນຫວຽດນາມ, ສະນັ້ນ ຜ່ານການເຂົ້າຮ່ວມງານວາງສະແດງຄັ້ງນີ້ ຫວັງວ່າ ບໍລິສັດຈະເປັນສ່ວນໜຶ່ງໃນການນໍາສະເໜີສິນຄ້າທີ່ມີຄຸນນະພາບ, ເປັນປະໂຫຍດຕໍ່ສຸຂະພາບໃຫ້ປະຊາຊົນລາວໄດ້ທົດລອງ ເພື່ອກ້າວໄປສູ່ການວາງຈໍາໜ່າຍຢູ່ ສປປ ລາວ ໃນອະນາຄົດ.
ທ່ານ ນາງ ຫງວຽນ ທິ ມິງ ຫງ໋ອກ ຫົວໜ້າການຕະຫຼາດ ບໍລິສັດ ຮຸ້ນສ່ວນການຄ້າຂາອອກ-ຂາເຂົ້າ ຊວນ ເຈື່ອງຟາດ ກ່າວວ່າ: ບໍລິສັດເປັນຜູ້ຜະລິດ ແລະ ຈໍາໜ່າຍສິນຄ້າ ກ່ຽວກັບເຄື່ອງໃຊ້ຄົວເຮືອນ ເຊັ່ນ: ນໍ້າຢາລ້າງຈານ, ນໍ້າຢາຖູພື້ນ, ນໍ້າຢາປັບຜ້ານຸ້ມ ແລະ ເຄື່ອງຊັກຜ້າ ທີ່ມີລັກສະນະພິເສດ ຍ້ອນຂະບວນການຜະລິດທີ່ໃສ່ໃຈຕໍ່ຜີວໜັງຂອງຜູ້ບໍລິໂພກ, ການເຂົ້າຮ່ວມງານວາງສະແດງຄັ້ງນີ້ ແມ່ນເພື່ອຊອກຫາຕະຫຼາດ ແລະ ເຊື່ອມໂຍງກັບຕົວແທນຈໍາໜ່າຍສິນຄ້າຂອງລາວ ຫຼື ບັນດາຮ້ານຊັບພະສິນຄ້າເພື່ອສະໜອງຜະລິດຕະພັນທີ່ມີຄຸນນະພາບ, ພິເສດລາຄາແມ່ນຈັບຕ້ອງໄດ້ຖ້າທຽບກັບສິນຄ້າທີ່ມີວາງຈໍາໜ່າຍຢູ່ລາວ.
ທ່ານນາງ ເຈີ່ນ ຖຸຍ ມາຍ ຮອງປະທານສະພາບໍລິຫານ ບໍລິສັດຫຸ້ນສ່ວນຜະລິດອຸປະກອນກໍ່ສ້າງ ເພື່ອປ້ອງກັນ ການຮົ່ວຊຶມຂັ້ນສູງ ກ່າວວ່າ: ບໍລິສັດມີຫຼາກຫຼາຍຜະລິດຕະພັນມານຳສະເໜີເຊັ່ນ: ນໍ້າສີທາເຮືອນ, ສີທາເຫຼັກກັນຂີ້ໝ້ຽງ, ສີຮອງພື້ນ, ຢາແນວກັນຊຶມ ແລະ ອື່ນໆ ວັດຖຸດິບສ່ວນໃຫຍ່ແມ່ນນໍາເຂົ້າຈາກປະເທດເຢຍລະມັນ; ພາຍຫຼັງການມາຊອກຮູ້ຕະຫຼາດຢູ່ ສປປ ລາວ ເຫັນວ່າມີຜະລິດຕະພັນໜຶ່ງທີ່ເໝາະສົມກັບຕະຫຼາດລາວ ຄື: ສີກັນຄວາມຮ້ອນໃຫ້ໂຄງຫຼັງຄາອາລູຊິງ ຊຶ່ງຈຸດພິເສດຂອງສີກັນຄວາມຮ້ອນ ແມ່ນສາມາດຊ່ວຍຫຼຸດຄວາມຮ້ອນພາຍໃນອາຄານໄດ້ຫຼາຍກວ່າ 30 ອົງສາ. ສະນັ້ນ ບໍລິສັດຂອງພວກຂ້າພະເຈົ້າຫວັງວ່າ ປະຊາຊົນລາວຈະຮູ້ຈັກກັບຜະລິດຕະພັນທີ່ມີຄຸນນະພາບ ຈາກໂຮງງານຜ່ານການຊອກຫາຕົວແທນຈໍາໜ່າຍ ແລະ ບັນດາຮ້ານຂາຍເຄື່ອງກໍ່ສ້າງຢູ່ລາວ.
ທ່ານນາງ ຫງວຽນ ທິ ແອັງ ປະທານສະພາບໍລິຫານ ບໍລິສັດຮາເທີກຣຸບ ຜູ້ຊ່ຽວຊານຜະລິດ ແລະ ຈໍາໜ່າຍເຄື່ອງສໍາອາງ ກ່າວວ່າ: ບໍລິສັດຮາເທີກຣຸບ ເປັນຜູ້ຊ່ຽວຊານຜະລິດ ແລະ ຈໍາໜ່າຍເຄື່ອງສໍາອາງ ເຊັ່ນ: ຄີມກັນແດດ, ນໍ້າຢາເຊັດເຄື່ອງສໍາອາງ, ໂຟມລ້າງໜ້າ, ຄີມບໍາລຸງຜິວ ແລະ ອື່ນໆ, ຂະບວນການຜະລິດສິນຄ້າຂອງບໍລິສັດໄດ້ຮັບມາດຕະຖານສາກົນ ຍ້ອນວັດຖຸດິບທີ່ໄດ້ມາຈາກທໍາມະຊາດ ຈຶ່ງຮັບປະກັນໄດ້ວ່າ ບໍ່ສົ່ງຜົນກະທົບຕໍ່ຜີວໜັງຂອງຜູ້ຊົມໃຊ້, ປັດຈຸບັນສິນຄ້າຂອງບໍລິສັດ ໄດ້ສົ່ງອອກໄປຫຼາຍປະເທດໃນທົ່ວໂລກ, ພວກຂ້າພະເຈົ້າຫວັງວ່າ ສິນຄ້າດັ່ງກ່າວ ຈະໄດ້ຮັບການຕອບຮັບ ແລະ ເປັນທີ່ຮູ້ຈັກຂອງຄົນລາວຫຼາຍຂຶ້ນ ຄືກັນກັບນໍ້າໃຈສາມັກຄີມິດຕະພາບຂອງປະຊາຊົນສອງຊາດທີ່ມອບໃຫ້ກັນ ໂດຍສະເພາະແມ່ນສ້າງໂອກາດໃຫ້ແມ່ຍິງລາວໄດ້ຊົມໃຊ້ຜະລິດ ຕະພັນທີ່ມີຄຸນນະພາບ, ລາຄາທີ່ເໝາະສົມ.
ການຈັດງານຄັ້ງນີ້ ຖືເປັນການຈັດຕັ້ງຜັນຂະຫຍາຍການຮ່ວມມືຮອບດ້ານ ໃນຂົງເຂດເສດຖະກິດ ແລະ ການລົງທຶນໃຫ້ກ້າວເຂົ້າສູ່ລວງເລິກ, ມູນຄ່າການຄ້າລາວ-ຫວຽດນາມໃນປີຜ່ານມາ ເພື່ມຂຶ້ນ 33,3% ຖ້າທຽບໃສ່ປີ2020 ບັນລຸໄດ້ຫຼາຍກວ່າ 1,37 ຕື້ໂດລາ, ປັດຈຸບັນ ການລົງທຶນຂອງວິສາຫະກິດຫວຽດນາມຢູ່ລາວມີຫຼາຍກວ່າ214 ໂຄງການ, ມູນຄ່າຈົດທະບຽນ 5,33 ຕື້ໂດລາ.
(ຂ່າວ-ພາບ: ແສງຈັນ)
