ທ່ານນາງ ແອນນີ ສິນທາວົງ ຫົວໜ້າໜ່ວຍງານອະນາໄມ ແລະ ສົ່ງເສີມສຸຂະພາບ ຫ້ອງການສາທາລະນະສຸກເມືອງສີສັດຕະນາກ ໄດ້ໃຫ້ສໍາພາດຕໍ່ສື່ມວນຊົນໜັງສືພິມ, ວິທະຍຸ ແລະ ໂທລະພາບແຫ່ງຊາດວ່າ: ການສ້າງຂະບວນການທຳລາຍໜອນນໍ້າຍຸງລາຍ ເພື່ອປ້ອງກັນພະຍາດໄຂ້ເລືອດອອກແມ່ນປະຕິບັດເປັນປະຈໍາທຸກໆອາທິດ, ໂດຍໝູນວຽນໄປຕາມແຕ່ລະບ້ານພາຍໃນກຸ່ມບ້ານອ້ອມຂ້າງເມືອງ ແລະ ສໍາລັບກຸ່ມ 4 ສວນມອນ ມີຈໍານວນ 7 ບ້ານຄື: ບ້ານດອນປ່າໃໝ່, ພັນໝັ້ນ, ວັດສົບ, ໂພໄຊ, ສວນມອນ, ສ້າງເຫວີຍ ແລະ ບ້ານດົງສະຫວາດ, ສໍາລັບບ້ານດອນປ່າໃໝ່, ມີພົນລະເມືອງທັງໝົດ 700 ກວ່າຄົນ (ຍິງ 400 ກວ່າຄົນ) ແລະ ມີຜູ້ຕິດເຊື້ອໄຂ້ເລືອດອອກແລ້ວ 24 ຄົນ (ຍິງ 12 ຄົນ), ສໍາລັບເມືອງສີສັດຕະນາກ ມີຜູ້ຕິດເຊື້ອໄຂ້ເລືອດອອກສະສົມກວ່າ 1.055 ຄົນ (ຍິງ 511 ຄົນ) ຖືວ່າເປັນໂຕເລກຜູ້ຕິດເຊື້ອສູງສົມຄວນ ເມື່ອທຽບກັບຈໍານວນພົນລະເມືອງໃນທົ່ວເມືອງທີ່ມີທັງໝົດ 6.267 ຄົນ ແລະ ຂະບວນການດັ່ງກ່າວ ຈະສືບຕໍ່ຈັດຕັ້ງປະຕິບັດໄປຈົນຮອດເດືອນພະຈິກ 2022, ໂດຍສຸມໃສ່ການປຸກລະດົມໃຫ້ປະຊາຊົນພາຍໃນບັນດາບ້ານອ້ອມຂ້າງເມືອງ ເອົາໃຈໃສ່ເຮັດອະນາໄມຕາມເຮືອນຊານ ບ້ານຊ່ອງຕາມຫຼັກການ 5ປ ທີ່ກະຊວງສາທາລະນະສຸກວາງອອກ ເປັນຕົ້ນການເຮັດອະນາໄມຕາມຮ່ອງລະບາຍນໍ້າໃຫ້ມີຄວາມສະອາດ, ຖ້າບ່ອນໃດມີກະໂປະ, ກະປ໋ອງ, ຖັງນໍ້າ ຫຼື ຕີນລົດເກົ່າ ທີ່ມີນໍ້າຂັງ ກໍໄດ້ກໍາຈັດ ຫຼື ຂວໍ້າ ເພື່ອບໍ່ໃຫ້ຍຸງມາໄຂ່ໃສ່, ຄວນປະຕິບັດໃຫ້ເປັນປະຈໍາ ຖ້າຫາກຮູ້ສຶກເປັນໄຂ້ຄວນໄປຫາແພດໝໍ ຫຼື ສຸກສາລາໃກ້ບ້ານ, ບໍ່ຄວນຊື້ຢາມາກິນເອງ ເພາະອາດຈະເຮັດໃຫ້ເກີດອາການສົນ ແລະ ອາດມີຄວາມສ່ຽງຕໍ່ການເສຍຊີວິດໄດ້.
ທ່ານ ແກ້ວ ລືໄຊ ນາຍບ້ານດອນປ່າໃໝ່ ໃຫ້ຮູ້ຕື່ມວ່າ: ສໍາລັບການອະນາໄມການທໍາລາຍແຫຼ່ງເພາະພັນໜອນນໍ້າຍຸງລາຍເປັນວິທີໜຶ່ງທີ່ສໍາຄັນ ແລະ ຈໍາເປັນທີ່ທຸກຄົນຕ້ອງໄດ້ຮ່ວມກັນເອົາໃຈໃສ່ທໍາລາຍ ເພື່ອບໍ່ໃຫ້ມີການແຜ່ລະບາດຂອງໄຂ້ຍຸງລາຍແຜ່ລາມອອກສູ່ວົງກວ້າງ ສະນັ້ນ ການທໍາລາຍແຫຼ່ງເພາະພັນໜອນນໍ້າຍຸງລາຍລວມເຖິງການປະຕິບັດ 5ປ ທີ່ທາງກະຊວງສາທາລະນະສຸກວາງອອກ ແລະ ເປັນອີກວິທີໜຶ່ງໃນການສະກັດກັ້ນ ແລະ ຫຼຸດຜ່ອນການຕິດເຊື້ອໄຂ້ຍຸງລາຍ.
ໂດຍ: ບຸນອູ້ມ
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
