The Sun ສື່ຊື່ດັງຂອງອັງກິດ ອອກມາລາຍງານວ່າ ຄະນະບໍລິຫານຂອງ ແມນເຊັສເຕີ ຊິຕີ ກຽມຈັດງົບປະມານໃຫ້ກັບ ເປັບ ກວາດິໂອລາ ເສີມທັບໃນໄລຍະຕະຫຼາດເດືອນມັງກອນນີ້ ຫາກມີໃຜທີ່ໂດດເດັ່ນໃນເຕະບານໂລກ.
ຜູ້ຈັດການຊາວແອັດສະປາຍ ຢືນຢັນວ່າປິດວຽກສໍາລັບຕະຫຼາດໃນໄລຍະລະດູຮ້ອນນີ້ຮຽບຮ້ອຍ ຫຼັງຈາກ ໄດ້ ເອີລິ່ງ ຮາແລນ, ແຄວວິນ ຟິວລິບ, ຮູລຽນ ອັນວາເຣຊ ແລະ ເຊຄິໂອ ໂກເມຊ ຮ່ວມທີມ ໂດຍລວມແລ້ວ ໃຊ້ເງິນໄປທີ່ 104 ລ້ານປອນ.
ຢ່າງໃດກໍ່ຕາມ ທີມກໍໄດ້ຮັບເງິນເຂົ້າສະໂມສອນກ້ອນໃຫຍ່ ກັບການປ່ອຍນັກເຕະອອກຈາກທີມ ໂດຍມີນັກເຕະທີ່ໄດ້ເງິນຢ່າງ ຣາຮິມ ສະເຕີລິ່ງ, ກາບຣຽວ ເຊຊຸສ ແລະ ໂອເລັກຊານເດີ ຊິນເຊນໂກ.
ຈາກລາຍງານຂອງສື່ອັງກິດ ເປີດເຜີຍວ່າ ທາງຄະນະກໍາມະການບໍລິຫານຂອງ ແມນເຊສເຕີ ຊີຕີ ກຽມງົບປະມານເສີມທີມໃຫ້ກັບ ເປັບ ເພີ່ມອີກ 100 ລ້ານປອນສໍາລັບຕະຫຼາດເດືອນມັງກອນ ຫາກມີນັກເຕະຄົນໃດ ທີ່ສະແດງຜົນງານເຂົ້າຕາໃນການແຂ່ງຂັນບານເຕະໂລກທີ່ ກາຕາ ໃນທ້າຍປີ. ແມນເຊັສເຕີ ຊິຕີ ຫາກໍສະແດງຄວາມເກັ່ງດ້ວຍການຍິງ 4 ປະຕູລວດ ແຊງເອົາຊະນະ ຄຣິສຕັນ ພາເລຊ 4-2 ໃນເກມພຣີເມຍລີກ ອັງກິດ ເມື່ອຄືນວັນເສົາທີ່ຜ່ານມາ.
