ຕາມຂ່າວຈາກ VOVWORLD, ພາຍຫລັງ ຖືກຜົນກະທົບ ຈາກພະຍາດ ໂຄວິດ-19 ເປັນໄລຍະ ຍາວນານ ແລະ ການເໜັງຕິງ ຂອງໄພເງິນເຟີ້, ຄວາມ ຕ້ອງການ ແລະ ທ່າອ່ຽງ ໃນການບໍລິໂພກ ສິນໃນນ້ຳ ຢູ່ຫລາຍຕະຫລາດ ໄດ້ມີການປ່ຽນແປງ ຫລາຍຢ່າງ. ສິ່ງນີ້ຮຽກຮ້ອງ ໃຫ້ວິສາຫະກິດ ແລະ ຂະແໜງ ສິນໃນນ້ຳ ຫວຽດນາມ ຕ້ອງມີວິທີການຮັບມື ເພື່ອແນໃສ່ຮັກສາ ທີ່ຕັ້ງ ແລະ ຮັບປະກັນ ການເຕີບໂຕ.
ກອງປະຊຸມ ສຳມະນາ ຄວາມຕ້ອງການ ແລະ ທ່າອ່ຽງຕະຫລາດ ສິນໃນນ້ຳພາຍ ຫລັງໂຄວິດ-19, ໂດຍສະມາຄົມ ປຸງແຕ່ງ ແລະ ສົ່ງອອກ ສິນໃນນ້ຳ ຫວຽດນາມ (Vasep) ໄດ້ຈັດຕັ້ງ ເມື່ອບໍ່ດົນມານີ້ ຈາກນັ້ນ ທ່ານ ນາງ ເລຮັ່ງ, ຜູ້ອຳນວຍການ ຮັບຜິດຊອບ ການສື່ສານ Vasep ໃຫ້ຮູ້ວ່າ: ຄວາມຕ້ອງການ ສິນໃນນ້ຳ ທົ່ວໂລກ ບັນລຸໄດ້ ລະດັບ ສູງສຸດ ແລະ ຈະຫລຸດລົງ ໃນ 6 ເດືອນທ້າຍປີ 2022. ສະພາບ ການເງິນເຟີ້ ເພີ່ມຂຶ້ນ ເຮັດໃຫ້ການພໍລິໂພກ ສິນໃນນ້ຳ ຫລຸດລົງ, ຜູ້ບໍລິໂພກ ຈະໄດ້ຮັບບຸລິມະສິດ ສຳລັບ ສິນໃນນ້ຳ ຊະນິດຕ່າງໆ ທີ່ມີລາຄາເໝາະສົມ ກັບລາຍຮັບ ທີ່ພວມຫລຸດລົງ. ນັ້ນຈະແມ່ນທ່າອ່ຽງເຊິ່ງ ບັນດາ ວິສາຫະກິດ ສົ່ງອອກ ຕ້ອງມີຄວາມໄຫວພິບ ໃນການຕອບສະໜອງ ເພື່ອ ຮັກສາ ໄດ້ອັດຕາສ່ວນ ໃນໄລຍະ ປັດຈຸບັນ. ໃນໄລຍະຍາວ, ວິສາຫະກິດ ຕ້ອງຮັບປະກັນ ການກຳນົດທິດແບບຍືນຍົງ, ລັກສະນະໂປ່ງໃສ, ຄົ້ນຫາ ໄດ້ຕົ້ນກຳເນີດ, ມີຄວາມຮັບຜິດຊອບ ຕໍ່ສັງຄົມ ແລະ ສິ່ງແວດລ້ອມ ຂອງລະບົບ ການຜະລິດຕ່າງໆ ຍ້ອນວ່າ ບັນດາຕະຫລາດ ຈະເພີ່ມຂຶ້ນ ຫລື ຮັດແໜ້ນບັນດາ ຂໍ້ກຳນົດທີ່ກ່ຽວຂ້ອງ ເຖິງຄຸນນະພາບ ການຮັກສາ ສຸຂະອະນາໄມ ດ້ານສະບຽງ ອາຫານ, ສິ່ງແວດລ້ອມ, ຜູ້ອອກແຮງງານ.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
