ແຫລ່ງຂ່າວຈາກເມືອງທຸລະຄົມ ແຂວງວຽງຈັນ ໃຫ້ຮູ້ວ່າ: ຄະນະຮັບຜິດຊອບ ເຄື່ອນໄຫວເກັບກໍາຂໍ້ມູນສະຖິຕິ ວິໄຈການເຂົ້າເຖິງວິທະຍຸ-ໂທລະພາບລາວ ປີ 2022, ນໍາໂດຍ ທ່ານ ສຸກັນ ສີໄກພັກ ຫົວໜ້າພະແນກສະຖິຕິ, ກົມແຜນການ ແລະ ການຮ່ວມສາ ກົນ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ລົງເຄື່ອນໄຫວເກັບ ກໍາຂໍ້ມູນສະຖິຕິວິໄຈການເຂົ້າເຖິງວິທະຍຸ-ໂທລະພາບຂອງລາວ ຢູ່ບ້ານນາບໍ່ ແລະ ບ້ານພະທາວ ເມືອງທຸລະຄົມ ແຂວງວຽງຈັນ ໃນວັນທີ 24 ສິງຫາ 2022 ໂດຍມີ ທ່ານ ສໍາພັນ ມະນີຈັນ ຮອງຫົວໜ້າພະແນກ ຖວທ ແຂວງວຽງຈັນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຕາມແຜນການເຄື່ອນໄຫວຂອງຄະນະດັ່ງກ່າວ, ສະເພາະຢູ່ແຂວງວຽງຈັນ ຈະລົງເກັບກຳຂໍ້ມູນຢູ່ 3 ເມືອງ, ເມືອງລະ 2 ບ້ານ, ໃນນັ້ນ ເມືອງທຸລະຄົມ ໄດ້ລົງໄປບ້ານນາບໍ່ ແລະ ບ້ານພະທາວ ໂດຍໄດ້ຮ່ວມກັບອົງການປົກຄອງບ້ານ ແລະ 15 ຄອບຄົວເປົ້າໝາຍ ຖືກສໍາພາດ ເພື່ອເກັບກໍາຂໍ້ມູນໃສ່ເອກະສານສອບຖາມແຕ່ລະພາກ, ແຕ່ລະຂໍ້ໃຫ້ຄົບຖ້ວນຖືກຕ້ອງ.
ການລົງເຄື່ອນໄຫວເກັບກຳຂໍ້ມູນດັ່ງກ່າວ, ແມ່ນປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຂະແໜງ ຖວທ ທຸກຂັ້ນທີ່ກໍານົດໄວ້ໃນກົດໝາຍ, ຂໍ້ກໍານົດ ແລະ ນິຕິກໍາ, ໂດຍສະເພາະ ປະຕິບັດຕາມຂໍ້ຕົກລົງຂອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ສະບັບເລກທີ 513/ຖວ ລົງວັນທີ 20 ມິຖຸນາ 2022 ວ່າດ້ວຍການແຕ່ງຕັ້ງ ຄະນະຮັບຜິດຊອບເຄື່ອນໄຫວເກັບກໍາຂໍ້ມູນສະຖິຕິ ວິໄຈການເຂົ້າເຖິງວິທະຍຸ-ໂທລະພາບຂອງລາວ ປີ 2022.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
