ທ່ານສັງເກດເຫັນບໍ່ວ່າຫຼັງຈາກກິນເຂົ້າທ່ຽງອີ່ມແລ້ວ ໃນຕອນບ່າຍທ່ານມັກຢາກນອນຫຼາຍ ຈົນບໍ່ສາມາດເຮັດວຽກໄດ້.
ພຶດຕິກໍາເຫຼົ່ານີ້ບໍ່ແມ່ນຄວາມຂີ້ຄ້ານ ແຕ່ເປັນອາການທີ່ທາງການແພດເອີ້ນວ່າ Food Coma ຫຼື Carb Coma ສາເຫດມາຈາກການກິນອາຫານຫຼາຍ ຫຼື ກິນຄາໂບໄຮເດຣດຫຼາຍ ເຮັດໃຫ້ກະເພາະອາຫານເຮັດວຽກໜັກ.
ເມື່ອທ່ານກິນຫຼາຍ ກົນໄກຂອງສະຫມອງຈະສັ່ງໃຫ້ ການໃຊ້ພະລັງງານຂອງອະໄວຍະວະຕ່າງ ຫຼຸດລົງແລະ ເພີ່ມພະລັງງານໃນການຍ່ອຍອາຫານ ຫຼັງຈາກນັ້ນຮ່າງກາຍຈະຜະລິດຮໍໂມນອິນຊູລິນ ເພື່ອຮັກສາລະດັບນໍ້າຕານໃຫ້ປົກກະຕິ.
ຮໍໂມນອິນຊູລິນ ມີອິດທິພົນຕໍ່ການປ່ອຍ serotonin ແລະ melatonin ທີ່ເຮັດໃຫ້ຢາກນອນຫລັບ ດັ່ງນັ້ນຮ່າງກາຍຈຶ່ງເຂົ້າສູ່ສະພາວະທີ່ພັກຜ່ອນ.
ໃນຂະນະດຽວກັນ ອີກກົນໄກໜຶ່ງຄືການສູບສີດເລືອດ ຂອງຫົວໃຈທີ່ໄປຫາກະເພາະອາຫານ ເຊິ່ງເປັນອະໄວຍະວະທີ່ເຮັດວຽກໜັກ ເຮັດໃຫ້ ປະລິມານເລືອດໃນສະຫມອງຫຼຸດລົງ ດັ່ງນັ້ນ ທ່ານຮູ້ສຶກເມື່ອຍ, ຢາກນອນ ແລະ ຕ້ອງການພັກຜ່ອນ.
