ໃນໄລຍະຜ່ານມາ ເຫັນວ່າ ສື່ສັງຄົມອອນລາຍບາງສື່ ໄດ້ໃຫ້ຂໍ້ມູນແກ່ສັັງຄົມ ກ່ຽວກັບ ສະພາບການນຳເຂົ້ານໍ້າມັນເຊື້ອໄຟ ວ່າ ປະເທດເຮົາ ຈະຂາດນ້ຳມັນເຊື້ອໄຟ ຄືທີ່ຜ່ານມາ ອີກ ໂດຍໄດ້ນຳເອົາຮູບພາບເກົ່າ ຫຼື ຮູບການປິດປໍ້ານໍ້າມັນບາງປໍ້າ ມາສ້າງກະແສ ໂດຍບໍ່ຮູ້ຂໍ້ມູນຄວາມຈິງ ໃນການປິດປໍ້າດັ່ງກ່າວ ເຮັດໃຫ້ສັງຄົມແຕກຕື່ນ ຫຼື ສ້າງຄວາມສັບສົນໃນສັງຄົມ ພາໃຫ້ປະຊາຊົນຈຳນວນໜຶ່ງ ກັກຕຸນນຳ້ມັນ. ດັ່ງນັ້ນ ຈຶ່ງຂໍແຈ້ງມາຍັງທົ່ວສັງຄົມ ຮັບຊາບ ແລະ ເຂົ້າໃຈວ່າ:
ການນຳເຂົ້ານໍ້າມັນເຊື້ອໄຟ ໃນປະຈຸບັນ ແມ່ນດຳເນີນຢ່າງເປັນປົກກະຕິ ສະເພາະ ເດືອນສິງຫາ 2022 ມີ 12 ບໍລິສັດນໍາເຂົ້າ ແລະ ສົ່ງອອກນໍ້າມັນເຊື້ອໄຟ ທີ່ຍັງດຳເນີນການນຳເຂົ້ານ້ຳມັນເຊື້ອໄຟ ຢູ່ໃນລະດັບປົກກະຕິ ແຕ່ລະມື້ ໂດຍນຳເຂົ້າສະເລ່ຍ ປະມານ 3 ລ້ານກວ່າລິດຕໍ່ມື້, ໃນນັ້ນ ນໍາເຂົ້ານ້ຳມັນແອັດຊັງທຳມະດາ ປະມານ 1 ລ້ານກວ່າລິດຕໍ່ມື້ ແລະ ນ້ຳມັນກາຊວນ ປະມານ 2 ລ້ານກວ່າລິດຕໍ່ມື້.
ສຳລັບການຈຳໜ່າຍນ້ຳມັນຂອງປໍ້ານໍ້າມັນເຊື້ອໄຟ ທີ່ເປີດໃຫ້ບໍລິການທັງໝົດ ປະມານ 1.500 ກວ່າປ້ຳນັ້ນ ແມ່ນຈຳໜ່າຍ ສະເລ່ຍປະມານ 2 ລ້ານລິດຕໍ່ມື້.
ສະນັ້ນ ເພື່ອຮັບປະກັນ ການບໍລິໂພກຂໍ້ມູນຂ່າວສານທີ່ຖືກຕ້ອງ ຈຶ່ງຂໍຮຽກຮ້ອງມາຍັງທຸກຄົນໃນສັງຄົມ ໃຫ້ບໍລິໂພກຂໍ້ມູນຂ່າວສານ ຢ່າງມີສະຕິ, ອ່ານເນື້ອໃນລະອຽດ ບໍ່ຄວນເບິ່ງແຕ່ຫົວຂໍ້ຂ່າວ ກ່ອນຈະມີຄຳເຫັນ ຫຼື ກ່ອນຈະແຊ. ພ້ອມນີ້ ບັນດາສື່ອອນລາຍຕ່າງໆ ກ່ອນຈະອອກຂ່າວ, ກໍໃຫ້ມີການກວດສອບເນື້ອໃນ ແລະ ນຳສະເໜີຂໍ້ມູນທີ່ຖືກຕ້ອງ, ບໍ່ບິດເບືອນ ຄວາມເປັນຈິງ.
