ພະແນກສົ່ງເສີມຄວາມກ້າວໜ້າແມ່ຍິງ, ແມ່ ແລະ ເດັກ ຫ້ອງການ ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຮ່ວມກັບ ຄະນະກຳມາທິການເພື່ອຄວາມກ້າວໜ້າແມ່ຍິງ ແລະ ແມ່-ເດັກ, ໂດຍໄດ້ຮັບການສະໜັບສະໜູນທຶນຈາກອົງການ UNFPA ຈັດຊຸດຝຶກອົບຮົມ ພາຍໃຕ້ຫົວຂໍ້: “ສ້າງຄວາມເຂັ້ມແຂງໃຫ້ສື່ມວນຊົນ ການປ້ອງກັນ ການຄ້າມະນຸດ ສຳລັບສື່ມວນຊົນ, ວັດທະນະທຳ ແລະ ຄຸ້ມຄອງການທ່ອງທ່ຽວ” ຂຶ້ນໃນວັນທີ 23 ສິງຫາ ນີ້ທີ່ກະຊວງ ຖວທ; ໂດຍການເປັນປະທານຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ; ທ່ານ ນາງ ມາລ່ຽມ ເອຄານ ຜູ້ຕາງໜ້າຈາກອົງການຢູເອັນເອັບພີເອ ພ້ອມດ້ວຍນັກສຳມະນາກອນຈາກໂທລະພາບແຫ່ງຊາດລາວ, ໜັງສືພິມປະຊາຊົນ, ໜັງສືພິມຂ່າວສານປະເທດລາວ, ໜັງສືພິມພາສາຕ່າງປະເທດ ແລະ ວິທະຍຸກະຈາຍສຽງແຫ່ງຊາດລາວ ເຂົ້າຮ່ວມ.
ຊຸດຝຶກອົບຮົມໃນຄັ້ງນີ້ ເພື່ອໃຫ້ບັນດາສື່ທີ່ເຂົ້າຮ່ວມ ໄດ້ເຂົ້າໃຈເຖິງຂໍ້ມູນຂ່າວສານ ກ່ຽວກັບວຽກງານການປ້ອງກັນ ແລະ ລຶບລ້າງ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເພື່ອເປັນສ່ວນໜຶ່ງໃນການເຜີຍແຜ່ ແລະ ປູກຈິດສຳນຶກ ທົ່ວປວງຊົນໃນສັງຄົມ ໄດ້ຮັບຮູ້ເຂົ້າໃຈເລິກເຊິ່ງ ກ່ຽວກັບຜົນຮ້າຍຂອງການໃຊ້ຄວາມຮຸນແຮງຕໍ່ແມ່ຍິງ.
ເພື່ອເປັນການລົງເລິກເຂົ້າສູ່ບົດຮຽນຕົວຈິງ ໃນຫົວຂໍ້ ວິທີການຂຽນຂ່າວ, ການນໍາໃຊ້ຄຳເວົ້າໃນການຂຽນຂ່າວ ແລະ ວິທີການນຳໃຊ້ຮູບພາບໃນການນຳສະເໜີບົດ-ຂ່າວ, ຄວາມຮູ້ພື້ນຖານກ່ຽວກັບການປ້ອງກັນ ແລະ ລຶບລ້າງ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ກ່ຽວກັບຈັນຍາບັນໃນການຂຽນຂ່າວ ພ້ອມນີ້ໃນຊຸດອົບຮົມດັ່ງກ່າວ ນັກສໍາມະນາກອນໄດ້ສົນທະນາແລກ ປ່ຽນຄຳຄິດ, ຄຳເຫັນ ກັບບັນດານັກວິທະຍາກອນ, ການຝຶກອົບຮົມແມ່ນຈະໄດ້ດໍາເນີນເປັນເວລາສອງວັນ ໃນວັນທີ 23-24 ສິງຫານີ້.
#Medialaos MMD
