ເມືອງແກ່ນທ້າວ ແຂວງໄຊຍະບູລີ ໄດ້ສໍາເລັດຊຸດຝຶກອົບຮົມແນະນຳການນໍາໃຊ້ຫຼັກສູດປັບປຸງໃໝ່ ໃຫ້ແກ່ຄູສອນຊັ້ນປະຖົມສຶກສາປີທີ 4 ທົ່ວເມືອງ ໃນທ້າຍອາທິດຜ່ານມານີ້ ທີ່ໂຮງຮຽນປະຖົມສົມບູນແກ່ນທ້າວ. ໂດຍການເຂົ້າຮ່ວມຂອງ ທ່ານ ສົມພອນ ຈິນດາວົງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະຮັບຜິດຊອບກອງປະຊຸມ, ຄູຝຶກຈາກວິທະຍາໄລຄູຫຼວງພະບາງ, ພະແນກສຶກສາທິການ ແລະ ກິລາ ແຂວງ, ເມືອງ, ຄູສຶກສານິເທດ ແລະ ຄູສອນ ປ.4 ເຂົ້າຮ່ວມ.
ຊຸດຝຶກອົບຮົມໃນຄັ້ງນີ້, ເພື່ອເຮັດໃຫ້ຄູສອນ ປ.4 ເຂົ້າໃຈເນື້ອໃນ, ເຕັກນິກການຮຽນ-ການສອນ ແລະ ອຸປະກອນຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ແລະ ເຂົ້າໃຈກ່ຽວກັບການພັດທະນາວິຊາຊີບຄູແບບຕໍ່ເນື່ອງ, ໂດຍສະເພາະໂມດູນຂອງການຮຽນຮູ້ແບບເພື່ອນຊ່ວຍເພື່ອນ ເພື່ອນຳໄປຈັດຕັ້ງປະຕິບັດຕາມສະພາບຄວາມເປັນຈິງ ໃນແຕ່ລະໂຮງຮຽນ.
ຜ່ານການຝຶກອົບຮົມນັກສໍາມະນາກອນສາມາດຮັບຮູ້ ແລະ ເຂົ້າໃຈບັນດາເນື້ອໃນເອກະສານຕ່າງໆ ເປັນຕົ້ນ: ເຫັນໄດ້ຄວາມແຕກຕ່າງລະຫວ່າງຫຼັກສູດເກົ່າ ແລະ ຫຼັກສູດໃໝ່, ຄວາມຫຼາກຫຼາຍໃນການນໍາໃຊ້ຊື່ອຸປະກອນຕ່າງໆໃນຫຼັກສູດສະບັບປັບປຸງໃໝ່ ພ້ອມທັງກຳນົດວິທີການຮັກສາຊຸດອຸປະກອນຄູໄວ້ຢ່າງປອດໄພ, ໂຄງຮ່າງມາດຕະຖານຂອງບົດສອນຈາກຫຼັກສູດປັບປຸງໃໝ່, ເນັ້ນການປະຕິບັດຕົວຈິງໃນຫ້ອງຮຽນ, ຮັບຮູ້ໄດ້ດ້ານເຕັກນິກໃນການສອນວິທີວັດ, ປະເມີນຜົນ ແລະ ການດຳເນີນກິດຈະກຳຕ່າງໆ.
ທ່ານຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ໃຫ້ກຽດມອບໃບຢັ້ງຢືນໃຫ້ນັກສໍາມະນາກອນ ແລະ ຮຽກຮ້ອງໃຫ້ນັກສໍາມະນາກອນ ນໍາເອົາຄວາມຮູ້ດັ່ງກ່າວ ນໍາໄປຖ່າຍທອດໃຫ້ນັກຮຽນພາຍໃນໂຮງຮຽນຂອງຕົນ, ພ້ອມທັງໃຫ້ການຊຸກຍູ້ຊ່ວຍເຫຼືອຄູໃນການຮຽນຈາກເພື່ອນຊ່ວຍເພື່ອນ ແລະ ການຮຽນຮູ້ດ້ວຍຕົນເອງ.
(ຂ່າວ-ພາບ: ແກ່ນທ້າວ)
