ການນຳແຂວງຄຳມ່ວນນຳໂດຍ ສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ ພ້ອມດ້ວຍຄະນະໄດ້ເຂົ້າຮ່ວມພິທີໂຮມຊຸມນຸມ ປີສາມັກຄີມິດຕະພາບລາວ-ຫວຽດນາມ ທີ່ນະຄອນວິງ ແຂວງເຫງະອານ ສສ ຫວຽດນາມ ເມື່ອບໍ່ດົນມານີ້ ໂດຍມີການນຳຂັ້ນສູງຈາກແຂວງຊຽງຂວາງ, ບໍລິຄຳໄຊ, ຫົວພັນ, ວຽງຈັນ, ສະຫວັນນະເຂດ, ໄຊສົມບູນ ແລະ ແຂວງຄຳມ່ວນ ເຂົ້າຮ່ວມ.
ໃນພິທີ ສະຫາຍ ບຸນຈັນ ສີວົງພັນ ເລຂາພັກແຂວງຊຽງຂວາງ ໄດ້ຕາງໜ້າໃຫ້ບັນດາການນຳຂັ້ນສູງ 7 ແຂວງຂອງລາວ ແລະ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຫວນຄືນມູນເຊື້ອ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ (18/7/1977-18/7/2022) ຊຶ່ງສາຍພົວພັນດັ່ງກ່າວປຽບເໝືອນສາຍພົວພັນສະຫາຍອ້າຍນ້ອງຄອບຄົວດຽວກັນ, ການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ຂອງສອງປະເທດພວກເຮົາໄດ້ມີມາແຕ່ດຶກດຳບັນ, ປະຊາຊົນສອງຊາດຮ່ວມດື່ມນໍ້າຈາກຫຼາຍແມ່ນໍ້າ ສອງປະເທດຮ່ວມແບ່ງທຸກ, ແບ່ງສຸກນຳກັນ, ຮ່ວມເປັນ, ຮ່ວມຕາຍນຳກັນ, ເຂົ້າເມັດຫັກ-ຜັກໃບດຽວກໍແບ່ງກັນກິນ ໄດ້ເສຍສະຫຼະເລືອດເນື້ອເຫື່ອໄຄຮ່ວມກັນເພື່ອຍາດເອົາໄຊຊະນະ, ໄລຍະຕໍ່ສູ້ກູ້ຊາດກໍຄືໄລຍະປົກປັກຮັກ ສາປະເທດຊາດຂອງສອງປະເທດໂດຍແມ່ນ ປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານສຸພານຸວົງ ທີ່ແສນເຄົາລົບຮັກເປັນຜູ້ກໍ່ສ້າງ ແລະ ໄດ້ຮັບການສືບຕໍ່ຂະຫຍາຍຕົວຈາກບັນດາການນຳຮຸ່ນສືບທອດ, ໄດ້ຕັດສິນໄຊຊະນະຂອງການປະຕິວັດຂອງແຕ່ລະປະເທດ.
ການສະເຫຼີມສະຫຼອງສອງວັນສ້າງຕັ້ງສາຍພົວພັນການທູດຫວຽດນາມ-ລາວ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບການຮ່ວມມື ຄົບຮອບ 45 ປີ ຄັ້ງນີ້ແມ່ນເຫດການໜຶ່ງທີ່ຢັ້ງຢືນຢ່າງເລິກເຊິ່ງເຖິງສາຍພົວພັນມິດຕະພາບແບບພິເສດ, ສຸດກົກສຸດປາຍ ລະຫວ່າງ ພັກ-ລັດ ແລະ ປະຊາຊົນຂອງສອງຊາດ ຫວຽດນາມ-ລາວ, ລາວ-ຫວຽດນາມ ເວົ້າລວມ, ເວົ້າສະເພາະແຂວງເຫງະອານກັບບັນດາແຂວງທັງ 7 ແຂວງ ທີ່ໄດ້ມີການພົວພັນກັນຢ່າງແໜ້ນແຟ້ນຕະຫຼອດມາ.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
