“ແມນຢູ” ປະກາດຄວ້າ “ຄາເຊມີໂຣ” ຢ່າງເປັນທາງການ ເປີດຄ່າຕົວ ແລະ ລາຍລະອຽດສັນຍາ

ແມນເຊັສເຕີ ຢູໄນເຕັດ ປະກາດບັນລຸຂໍ້ຕົກລົງຄວ້າຕົວ ຄາເຊມີໂຣ ກອງກາງຂອງ ຣີລ ມາດຣິດ ມາຮ່ວມທີມ.

ເມື່ອວັນທີ 20 ສິງຫາ 65 ທີ່ຜ່ານມາ ແມນເຊສເຕີ ຢູໄນເຕັດ ສະໂມສອນຍິ່ງໃຫຍ່ແຫ່ງເວທີ ພຣີເມຍລີກ ອັງກິດ ຢືນຢັນຜ່ານເວັບໄຊທາງການວ່າ ສາມາດບັນລຸຂໍ້ຕົກລົງໃນການຄວ້າຕົວ ຄາເຊມີໂຣ ກອງກາງທີມຊາດບຣາຊິນ ຂອງ ຣີວ ມາດຣິດ ສະໂມສອນຊັ້ນແນວໜ້າຂອງ ລາ ລີກາ ແອັດສະປາຍ ມາສູ່ຖິ່ນ ໂອລ ແທຣບຟອດ ເປັນທີ່ຮຽບຮ້ອຍແລ້ວ.

” ສະໂມສອນມີຄວາມຍິນດີທີ່ຈະປະກາດວ່າ ໄດ້ບັນລຸຂໍ້ຕົກລົງກັບ ຣິວ ມາດຣິດ ໃນການຄວ້າຕົວ ຄາເຊມີໂຣ ການຍ້າຍທີມໃນຕອນນີ້ ແມ່ນຂຶ້ນຢູ່ກັບຂໍ້ຕົກລົງສ່ວນຕົວ ວີຊ່າໃນການເຂົ້າອັງກິດ ແລະ ການກວດຮ່າງກາຍ. ຄາເຊມີໂຣ ລົງຫຼິ້ນເກມລະດັບອາຊີບຫຼາຍກວ່າ 500 ນັດ ລວມເຖິງ 63 ເກມກັບທີມຊາດບຣາຊິນ ເຂົາຄວ້າແຊັມໃຫຍ່ມາ 17 ຄັ້ງໃນໄລຍະອາຊີບ ລວມເຖິງແຊັມແຊັມປຽນລີກ 5 ສະໄໝ ແລະ ໂກປາ ອາເມຣິກາ ເຮົາທຸກຄົນຕັ້ງໜ້າລໍຖ້າທີ່ຈະໄດ້ຕ້ອນຮັບ ຄາເຊມີໂຣ ສູ່ຖິ່ນ ໂອລ ແທຣບຟອດ “

ສຳລັບຄ່າຕົວໃນການຍ້າຍທີມຄັ້ງນີ້ ຟາບຣິຊິໂອ ໂຣມາໂນ ນັກຂ່າວຈອມແມ່ນຢໍາແຫ່ງຕະຫຼາດຊື້ຂາຍນັກເຕະ ລະບຸວ່າຢູ່ທີ່ລາຄາ 60 ລ້ານເອີໂຣ ບວກກັບເງິນໂບນັດອີກ 10 ລ້ານເອີໂຣ ໂດຍຈະເຊັນສັນຍາຮ່ວມງານກັນ 4 ປີ ຫຼືຈົນຮອດປີ 2026 ພ້ອມທາງເລືອກທີ່ຈະຂະຫຍາຍອອກໄປອີກ 1 ປີ ສ່ວນຄ່າຈ້າງ ຮັບທີ່ 350.000 ປອນຕໍ່ອາທິດ ສູງສຸດເປັນອັນດັບ 3 ຂອງສະໂມສອນ ຮອງຈາກທີ 1 ຄຣິສເຕຍໂນ ໂຣນັນໂດ ທີ່ຮັບຢູ່ 480.000 ປອນຕໍ່ອາທິດ ແລະ ອັນດັບ 2 ດາວິດ ເດ ເກອາ ທີ່ຮັບຢູ່ 375.000 ປອນຕໍ່ອາທິດ

ທັງນີ້ ຄາເຊມີໂຣ ອາຍຸ 30 ປີ ຖືເປັນນັກເຕະໃໝ່ຄົນທີ 4 ຂອງແມນເຊສເຕີ ຢູໄນເຕັດ ໃນລະດູຮ້ອນນີ້ ຕໍ່ຈາກ ທາເຣວ ມາລາເຊຍ, ຄຣິສຕຽນ ເອຣິກເຊນ ແລະ ລິຊານໂດຣ ມາຕີເນສ.