ວັນທີ 22 ສິງຫາ 2022 ນີ້, ທ່ານ ມະໄລທອງ ກົມມະສິດ ລັດຖະມົນ ຕີກະຊວງອຸດສາຫະກຳ ແລະ ການຄ້າ(ອຄ) ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ລີ ຢົງ ຊົນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ເກົາ ຫລີ ປະຈຳ ສປປ ລາວ ໃນໂອກາດທີ່ ທ່ານ ມະໄລທອງ ກົມມະສິດ ໄດ້ຮັບຕຳແໜ່ງເປັນລັດຖະມົນຕີກະຊວງ ອຄ ຄົນໃໝ່.
ການພົບປະໃນຄັ້ງນີ້, ສອງຝ່າຍ ໄດ້ປຶກສາຫາລື ຄວາມເປັນໄປໄດ້ກ່ຽວກັບການກຳນົດວັນ ແລະ ເວລາ ເພື່ອສືບຕໍ່ຈັດກອງປະຊຸມ ຄະນະກໍາມະທິການຮ່ວມ ເພື່ອການຮ່ວມມືດ້ານເສດຖະກິດ, ການຄ້າ, ວິທະຍາສາດ-ເຕັກໂນໂລຊີ ລະຫວ່າງ ສປປ ລາວ ແລະ ສປປ ເກົາຫລີ ຄັ້ງທີ 4 ທີ່ມີແຜນຈະຈັດຂຶ້ນໃນປີ 2016 ທີ່ ພຽງຢາງ ສປປ ເກົາຫລີ ແຕ່ໄດ້ຖືກເລື່ອນມາຮອດປັດຈຸບັນ ແລະ ປຶກສາຫາລືເພື່ອຊອກຫາຊອງທາງ ແລະ ໂອກາດໃນການສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສປປ ລາວ ແລະ ສປປ ເກົາຫລີ ເນື່ອງຈາກໄລຍະຜ່ານມາ ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ຍັງບໍ່ເຂັ້ມແຂງເທົ່າທີ່ຄວນ.
ທ່ານ ມະໄລທອງ ກົມມະສິດ ໄດ້ສະແດງຄວາມຍິນດີຕ້ອງຮັບ ແລະ ຕີລາຄາສູງຕໍ່ ທ່ານ ລີ ຢົງ ຊົນ ທີ່ໄດ້ມາພົບປະໂອ້ລົມ ແລະ ສະແເດງຄວາມຍິນດີ ໃນຄັ້ງນີ້, ເຊິ່ງເປັນການປະກອບສ່ວນສຳຄັນ ເຂົ້າໃນການຮັດແໜ້ນການພົວພັນຮ່ວມມື ໃນທຸກຂົງເຂດວຽກງານ ໂດຍສະເພາະການຮ່ວມມືດ້ານການຄ້າ, ການລົງທຶນ ຂອງສອງປະເທດ ລາວ-ສປປ ເກົາຫລີ ໃຫ້ໄດ້ຮັບການພັດທະນາຂຶ້ນໄປເລື້ອໆ, ເຊິ່ງລັດຖະບານ ລາວ ກໍຄື ຂະແໜງອຸດສາຫະກຳ ແລະ ການຄ້າ ມີຄວາມມຸ່ງໝັ້ນ ທີ່ຈະສະໜັບສະໜູນ ແລະ ສົ່ງເສີມ ໃຫ້ມີການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະ ຫວ່າງ ສອງປະເທດໃຫ້ມີຄວາມເຂັ້ມແຂງ ເນື່ອງຈາກວ່າ ວຽກງານການຄ້າ ແລະ ການລົງທຶນ ລະຫວ່າງສອງປະເທດ ຍັງມີປະລິມານໜ້ອຍຫລາຍ ເຖິງວ່າໃນໄລຍະຜ່ານມາ ຈະມີຄວາມພະຍາຍາມຊຸກຍູ້ສົ່ງເສີມວຽກງານດັ່ງກ່າວ ແຕ່ກໍຍັງມີຫລາຍປັດໄຈ ທີ່ເປັນບັນຫາ ແລະ ອຸປະສັກ ເຊັ່ນ: ໄລຍະທາງ, ບັນຫາດ້ານການຂົນສົ່ງສິນຄ້າ ລວມທັງບັນຫາສາກົນອື່ນໆ ແລະ ໃນອະນາຄົດສອງຝ່າຍຈະໄດ້ເຮັດວຽກຮ່ວມກັນຫລາຍຂຶ້ນ ເພື່ອສົ່ງເສີມວຽກງານດັ່ງກ່າວ ເຊິ່ງກະຊວງ ອຄ ພ້ອມທີ່ຈະສະໜັບສະໜູນ ແລະ ຮ່ວມມື ດ້ານການຄ້າ, ອຸດສາຫະກຳ ແລະ ການລົງທຶນ ຂອງສອງປະເທດ.
ໂອກາດດຽວກັນ, ທ່ານ ລີ ຢົງ ຊົນ ກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີທີ່ໄດ້ໃຫ້ການຕ້ອນຮັບ, ພ້ອມທັງລາຍງານໃຫ້ຊາບກ່ຽວກັບ ສະພາບການພັດທະ ນາເສດຖະກິດ-ສັງຄົມ ແລະ ຜົນສຳເລັດໃນການປະຕິບັດວຽກງານຕ້ານ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ຢູ່ ສປປ ເກົາຫລີ. ພ້ອມທັງ ສະແດງຄວາມຊົມເຊີຍມາຍັງ ທ່ານ ມະໄລທອງ ກົມມະສິດ ທີ່ໄດ້ດຳລົງຕໍາແໜ່ງ ເປັນລັດຖະມົນຕີ ກະຊວງອຸດສາຫະກຳ ແລະ ການຄ້າ ຄົນໃໝ່ ແລະ ຍັງໄດ້ໃຫ້ຄຳໝັ້ນສັນຍາວ່າ ຈະພະຍາຍາມຢ່າງສຸດຄວາມສາມາດ ເພື່ອຊຸກຍູ້ການພົວພັນຮ່ວມມືສອງຝ່າຍລາວ-ສປປ ເກົາຫລີ ໃຫ້ສືບຕໍ່ໄດ້ຂະຫຍາຍຕົວຍິ່ງໆຂຶ້ນໃນຕໍ່ໜ້າ ແລະ ຈະສືບຕໍ່ສະໜັບສະໜູນຊ່ວຍເຫລືອ ສປປ ລາວ ໃນບັນດາໂຄງການຕ່າງໆ ແລະ ກິດຈະກຳການຮ່ວມມືໃຫ້ຫລາຍຂຶ້ນ ເພື່ອສົ່ງເສີມວຽກງານ ຂະແໜງການຄ້າ, ການລົງທຶນ ໃຫ້ມີບ້າດກ້າວຂະຫຍາຍຕົວດີຂຶ້ນ.
#Medialaos MMD
