ທ່ານ ນາງ ວິລະພອນ ທິລາວັນ ຮັກສາການ ຫົວໜ້າໜ່ວຍງານອະນາໄມ – ສົ່ງເສີມ ຫ້ອງການສາທາລະນະສຸກເມືອງຈັນທະບູລີ ໄດ້ໃຫ້ສໍາພາດກັບທີມງານສື່ມວນຊົນວ່າ: ຫ້ອງການສາທາລະນະສຸກ ເມືອງຈັນທະບູລີ ຮ່ວມກັບອໍານາດການປົກຄອງ ກຸ່ມ 5 ຫ້ວຍຫົງ ພ້ອມກັບປະຊາຊົນພາຍໃນກຸ່ມສືບຕໍ່ຈັດຕັ້ງປະຕິບັດ ທໍາລາຍແຫຼ່ງເພາະພັນໜອນນໍ້າຍຸງລາຍໃນທົ່ວເມືອງຈັນທະບູລີ ພາຍໃນກຸ່ມ 5 ຫ້ວຍຫົງ ເປັນກຸ່ມທີ່ມີການລະບາດພະຍາດໄຂ້ເລືອດອອກຫຼາຍກວ່າໝູ່ ແລະ ພາຍໃນກຸ່ມ 5 ຫ້ວຍຫົງ ແມ່ນກວມເອົາ 7 ບ້ານ ຄື ບ້ານ ບໍ່ນາງົວ, ດອນແດງ, ຫ້ວຍຫົງ, ໜອງປີງ, ໜອງທາໃຕ້, ໜອງທາເໜືອ ແລະ ໂພນສະຫວ່າງ ພາຍໃນກຸ່ມມີພົນລະເມືອງຕິດເຊື້ອສະສົມ ພະຍາດໄຂ້ເລືອດອອກກວມເອົາ 40%, ມາຮອດວັນທີ 19 ສິງຫາ ໂຕເລກສະສົມ ມີເຖິງ 406 ຄົນ, ໃນນັ້ນ ເສຍຊີວິດ 2 ຄົນ, ດັ່ງນັ້ນ ໜ່ວຍງານອະນາໄມ – ສົ່ງເສີມ ຫ້ອງການສາທາລະນະສຸກເມືອງຈັນທະບູລີ ໄດ້ຮ່ວມກັບອໍານາດການປົກຄອງກຸມບ້ານ ສືບຕໍ່ຈັດຕັ້ງປະຕິບັດທໍາລາຍແຫຼ່ງເພາະພັນໜອນນໍ້າຍຸງລາຍ, ສໍາລັບການຈັດຕັ້ງປະຕິບັດແມ່ນເລີ່ມແຕ່ຕົ້ນເດືອນມິຖຸນາເປັນຕົ້ນມາ ໃນການຈັດຕັ້ງປະຕິບັດແຫຼ່ງເພາະພັນຂອງໜອນນໍ້າຍຸງລາຍໄດ້ແນະນໍາ ແລະ ອະທິບາຍໃຫ້ປະຊາຊົນຮັບຮູ້, ເຂົ້າໃຈກ່ຽວກັບການປະຕິບັດ 5ປ ທີ່ທາງກະຊວງສາທາລະນະສຸກວາງອອກ ພ້ອມທັງນໍາພາປະຊາຊົນຖາງປ່າບ່ອນທີ່ຮົກເຮື້ອ ແລະ ຖອກນໍ້າບ່ອນທີ່ມີຕີນລົດເກົ່າ, ກະໂປະ, ກະປອງ, ບ່ອນທີ່ມີນໍ້າຂັງ ແລະ ອື່ນໆ ທີ່ເປັນສາເຫດທີ່ພາໃຫ້ເກີດມີໜອນນໍ້າຍຸງລາຍ ແລະ ຜ່ານການຈັດຕັ້ງປະຕິບັດຜ່ານມາປະຊາຊົນກໍມີການຕື່ນຕົວຫຼາຍ ແລະ ໄດ້ເອົາໃຈໃສ່ອະນາໄມຖັງນໍ້າພາຍໃນຄົວເຮືອນຂອງຕົນ, ອະນາໄມຖາງປ່າອ້ອມຮົ້ວພາຍໃນເຮືຶອນທີ່ເປັນສາເຫດພາໃຫ້ເກີດມີໜອນນໍ້າຍຸງລາຍ.
ທ່ານນາງ ວິລະພອນ ທິລາວັນ ໃຫ້ຮູ້ຕື່ມອີກວ່າ: ການຈັດຕັ້ງປະຕິບັດຂອງໜ່ວຍງານອະນາໄມ – ສົ່ງເສີມ ຫ້ອງການສາທາລະນະສຸກເມືອງຈັນທະບູລີ ໄດ້ສົມທົບກັບອໍານາດການປົກຄອງບ້ານ ແລະ ອາສາສະໝັກບ້ານເປັນເຈົ້າການໃນການປຸກລະດົມປະຊາຊົນພາຍໃນບ້ານ ມີສ່ວນຮ່ວມຢ່າງເປັນຂະບວນ ໃນການອະນາໄມ ແລະ ທໍາລາຍແຫຼ່ງເພາະພັນໜອນນໍ້າຍຸງລາຍ ຊຶ່ງເປັນພາຫະນະນໍາເຊື້ອໄຂ້ເລືອດ ອອກມາສູ່ຄົນເຮົາ, ໃນການຈັດຕັ້ງປະຕິບັດແມ່ນອະນາໄມອາທິດລະຄັ້ງໂດຍໝູນວຽນໃນແຕ່ລະບ້ານ.
ທ່ານ ບຸນຖົມ ສີບຸນມາລາ ຮອງນາຍບ້ານດອນແດງ ໃຫ້ຮູ້ວ່າ: ນັບແຕ່ມີການແຜ່ລະບາດຂອງພະຍາດໄຂ້ເລືອດອອກມາຮອດເດືອນສິງຫາ 2022 ມີຜູ້ຕິດເຊື້ອພະຍາດໄຂ້ເລືອດອອກທັງໝົດ 1.016 ຄົນ ໃນນັ້ນ ເສຍຊີວິດ 2 ຄົນ ແລະ ການອະນາໄມ ທໍາລາຍແຫຼ່ງເພາະພັນໜອນນໍ້າຍຸງລາຍເປັນວິທີໜຶ່ງທີ່ສໍາຄັນ ແລະ ຈໍາເປັນທີ່ທຸກຄົນຕ້ອງໄດ້ຮ່ວມກັນເອົາໃຈໃສ່ທໍາລາຍ ເພື່ອບໍ່ໃຫ້ມີການແຜ່ລະບາດຂອງໄຂ້ຍຸງລາຍແຜ່ລາມອອກສູ່ວົງກວ້າງ. ສະນັ້ນ, ການທໍາລາຍແຫຼ່ງເພາະມັນໜອນນໍ້າຍຸງລາຍ ລວມເຖິງການປະຕິບັດ 5ປ ທີ່ທາງກະຊວງສາທາລະນະສຸກວາງອອກ ແລະ ເປັນອີກວິທີໜຶ່ງໃນການສະກັດກັ້ນ ແລະ ຫຼຸດຜ່ອນການຕິດເຊື້ອໄຂ້ຍຸງລາຍ.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
