ຂ່າວຕ່າງປະເທດລາຍງານ ເມື່ອວັນທີ 18 ສິງຫາທີ່ຜ່ານມານີ້, ທ່ານປະທານາທິບໍດີ ເຟີດິນານ ມາກອສ ຈູເນຍ ຜູ້ນຳຟີລິບປິນກ່າວວ່າ ລັດຖະບານກຳລັງພະຍາຍາມເຈລະຈາກັບບັນດາຜູ້ປະກອບການລາຍໃຫຍ່ພາຍໃນປະເທດ ເພື່ອຂໍຫຼຸດລາຄາເຫຼືອ 70 ເປໂຊຕໍ່ກິໂລ ເຖິງແມ່ນວ່າອີກຝ່າຍຍັງຄົງຢືນຢັນວ່າ ຫຼຸດລາຄາໃຫ້ໄດ້ຫຼາຍທີ່ສຸດ 80 ເປໂຊຕໍ່ກິໂລ.
ປັດຈຸບັນ, ລາຄາຂາຍຍ່ອຍນ້ຳຕານຊາຍຂາວບໍລິສຸດໃນຟີລິບປິນຢູ່ທີ່ກິໂລລະ 110-115 ເປໂຊ ໂດຍໜຶ່ງໃນປັດໄຈສຳຄັນທີ່ເຮັດໃຫ້ລາຄາສິນຄ້າດັ່ງກ່າວເພີ່ມຂຶ້ນຄື ອັດຕາເງິນເຟີ້ ຊຶ່ງສະຖິຕິເມື່ອເດືອນກໍລະກົດທີ່ຜ່ານມາເພີ່ມຂຶ້ນ 6,4% ເມື່ອທຽບກັບໄລຍະເວລາດຽວກັນຂອງປີ 2021 ຖືວ່າສູງທີ່ສຸດນັບຕັ້ງແຕ່ເດືອນຕຸລາ 2018 ເຖິງແມ່ນວ່າຈະສູງກວ່າທີ່ນັກວິເຄາະໄດ້ຄາດຄະເນໄວ້ເລັກນ້ອຍຄື 6,2% ແຕ່ຍັງຖືວ່າຢູ່ໃນລະຫວ່າງເກນທີ່ທະນາຄານກາງຂອງຟີລິບປິນຕັ້ງເປົ້າໝາຍໄວ້ຄືລະຫວ່າງ 5,6%-6,4%. ຂະນະທີ່ສຳນັກງານກຳກັບເບິ່ງແຍງນ້ຳຕານຂອງຟີລິບປິນ ຊຶ່ງເປັນໜ່ວຍງານພາຍໃຕ້ການກຳກັບເບິ່ງແຍງຂອງກະຊວງກະສິກຳໄດ້ຄາດຄະເນວ່າ ຜົນຜະລິດນ້ຳຕານຊາຍດິບຂອງປະເທດໃນຮອບປີນີ້ ຊຶ່ງຈະສິ້ນສຸດໃນວັນທີ 31 ສິງຫາທີ່ຈະເຖິງນີ້ຈະຢູ່ທີ່ປະມານ 1,8 ລ້ານໂຕນ ຫຼຸດລົງຈາກການຄາດຄະເນກ່ອນໜ້ານີ້ ຊຶ່ງລະບຸໄວ້ທີ່ປະມານ 1,98 ລ້ານໂຕນ ແລະ ຍັງເປັນປະລິມານ ທີ່ຕໍ່າກວ່າຄ່າສະເລ່ຍໃນຮອບ 3 ປີຫຼ້າສຸດ ຊຶ່ງຢູ່ທີ່ 2,03 ລ້ານໂຕນ ໂດຍເປັນຜົນມາຈາກການປ່ຽນແປງຂອງສະພາບອາກາດໂລກ ເຮັດໃຫ້ການເກັບກ່ຽວຜົນຜະລິດໃນປະເທດຫຼຸດລົງ ແລະ ສະຖານະການໂລກໃນປັດຈຸບັນສົ່ງຜົນກະທົບຢ່າງໜັກຕໍ່ການສະໜອງທົ່ວໂລກ.
ເຖິງຢ່າງໃດກໍຕາມ, ທ່ານ ມາກອສ ຈູເນຍ ເຄີຍກ່າວເມື່ອບໍ່ດົນມານີ້ວ່າ ລັດຖະບານຟີລິບປິນມີແຜນການນຳເຂົ້ານ້ຳຕານ 150.000 ໂຕນ ພາຍໃນທ້າຍປີນີ້ ເຖິງແມ່ນວ່າຍັງບໍ່ມີການຢືນຢັນຢ່າງເປັນທາງການວ່າ ຈະຊື້ຈາກປະເທດໃດ ແຕ່ຈາກສະຖິຕິຕະຫຼອດໄລຍະເວລາທີ່ຜ່ານມາວ່າ ຟີລິບປິນມັກນຳເຂົ້າຕານຊາຍຈາກໄທ ຊຶ່ງເປັນຜູ້ສົ່ງອອກນ້ຳຕານລາຍໃຫຍ່ອັນດັບ 2 ຂອງໂລກຮອງຈາກເບຼຊິນ.
