(ເນື່ອງໃນໂອກາດວັນຊາດອິນໂດເນເຊຍ 17/8/1945-17/8/2022)
ປັດຈຸບັນ, ເນື່ອງຈາກການປະມົງເປັນເສດຖະກິດສໍາຄັນທີ່ອິນໂດເນເຊຍມີທ່າແຮງ ແລະ ມີອຳ ນາດໃນຕໍ່ລອງກັບຕ່າງຊາດສູງ ຊຶ່ງການພັດທະນາເສດຖະກິດສີຟ້າ (Blue Economy) ຂອງອິນໂດເນເຊຍຈຶ່ງເນັ້ນໃສ່ການພັດທະນາຄວາມໝັ້ນຄົງໃນຂະແໜງການປະມົງ ແລະ ຂະແໜງທີ່ກ່ຽວຂ້ອງກັບການປະມົງເປັນຫຼັກເຊັ່ນ: ການອະນຸຮັກຊັບພະຍາກອນທາງທະເລ, ການຈັດການປະມົງທີ່ຍືນຍົງ ແລະ ການແກ້ໄຂບັນຫາ ຜິດກົດໝາຍ, ບໍ່ມີການລາຍງານ ແລະ ບໍ່ມີການຄວບຄຸມ ຫຼື IUU (Illegal, Unreported and Unregulated) ຄຽງຄູ່ກັບການພັດທະນາດ້ານອື່ນໆເຊັ່ນ: ການທ່ອງທ່ຽວ ຊຶ່ງເປັນຜົນພອຍໄດ້ຂອງການຈັດການຊັບພະຍາກອນທີ່ຍືນຍົງ; ການພັດທະນາໂຄງສ້າງພື້ນຖານທາງທະເລ ແລະ ການເຊື່ອມຕໍ່ເກາະຕ່າງໆ ທີ່ເປັນປະໂຫຍດຕໍ່ການຂົນສົ່ງຄົມມະນາຄົມທາງທະເລ; ການຂຸດຄົ້ນຊັບພະຍາກອນທາງທຳມະຊາດເຊັ່ນ ນ້ຳມັນ ແລະ ແກັສທຳມະຊາດທີ່ຍືນຍົງ ຊຶ່ງຈະມີສ່ວນເອື້ອໜູນນະໂຍບາຍການປ່ຽນຜ່ານທາງພະລັງງານຂອງອິນໂດເນເຊຍທີ່ເປັນພາລະກິດສຳຄັນລະດັບຊາດ ແລະ ເປັນຂະແໜງສຳຄັນທີ່ລັດຖະບານອິນໂດເນເຊຍໃຊ້ດຶງດູດການລົງທຶນຈາກທັງພາຍໃນ ແລະ ຕ່າງປະເທດ.
ລັດຖະບານອິນໂດເນເຊຍເຫັນວ່າ ທ່າແຮງຂອງເສດຖະກິດທາງທະເລທີ່ອິນໂດເນເຊຍມີຢູ່ໃນປັດຈຸບັນ ບວກກັບວິທະຍາສາດເຕັກໂນໂລຊີ ແລະ ນະວັດຕະກຳລວມເຖິງການພັດທະນາຊັບພະຍາ ກອນມະນຸດ ຈະຊ່ວຍໃຫ້ອິນໂດເນເຊຍບັນລຸວິໄສທັດໃນປີ 2045 ທີ່ຕ້ອງການໃຫ້ອິນໂດເນເຊຍເປັນ ປະເທດທີ່ພັດທະນາແລ້ວພາຍໃນປີ 2045. ທັງນີ້, ພາລະກິດສຳຄັນຂອງລັດຖະບານໃນປັດຈຸບັນຄື ການສ້າງການປົກຄອງທີ່ດີ (Ocean governance) ຜ່ານການແບ່ງອຳນາດທັງໜ້າທີ່ ແລະ ການມີແນວທາງນະໂຍບາຍທີ່ແນ່ນອນໃນພາບລວມ ໂດຍມີກະຊວງການປະສານງານກິດຈະການທາງທະເລ ແລະ ການລົງທຶນເປັນໜ່ວຍງານຫຼັກທີ່ປະສານງານກັບກະຊວງອື່ນໆທີ່ມີພາລະກິດກ່ຽວຂ້ອງກັບບັນຫາ Blue Economy ທັງລະບົບ.
ລັດຖະບານອິນໂດເນເຊຍໄດ້ບັນຈຸບັນຫາການພັດທະນາ Blue Economy ໃນແຜນການພັດ ທະນາປະເທດໃນໄລຍະກາງ 2020-2024 ແລະ ຢູ່ໃນລະຫວ່າງການພັດທະນາແຜນການພັດທະນາເສດຖະກິດສີຟ້າທີ່ຈະໃຊ້ເຖິງປີ 2045 ກັບເອກະສານຍຸດທະສາດດ້ານການເງິນສີຟ້າ ແລະ ພັນທະບັດສີຟ້າ (Blue Bond) ເພື່ອສົ່ງເສີມການພັດທະນາແບບຍືນຍົງ ແລະ ການລົງທຶນ ຫຼຸດຜ່ອນພາລະທາງດ້ານການເງິນຂອງລັດຖະບານໃນການພັດທະນາເສດຖະກິດ ໂດຍການຊອກຫາຫຸ້ນສ່ວນດ້ານການພັດທະນາ ທັງໃນລະດັບທະວິພາຄີ ແລະ ພະຫຸພາຄີເຊັ່ນ: ຊູແອດ, ທະນາຄານພັດທະນາອາຊີ (ADB) ແລະ ໂຄງການພັດທະນາສະຫະປະຊາຊາດ (UNDP). ນອກຈາກນີ້, ອິນໂດເນເຊຍຍັງເປັນປະເທດໝູ່ເກາະທີ່ມີຊັບພະຍາກອນຈຳນວນມະຫາສານ ມີຕະຫຼາດທີ່ຫຼາກຫຼາຍ ແລະ ມີປະຊາກອນທີ່ຢູ່ໃນໄວທໍາງານ 50% ຂອງປະຊາກອນທົ່ວປະເທດ ຈຶ່ງເປັນໜຶ່ງໃນປະເທດທີ່ມີທ່າແຮງສູງໃນດ້ານ Blue Economy.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
